¹ "Koityi malaikayat ne bo kaniset nemi Epeso sir: 'Mwae tuguchu inendet ne name kokelik tisab eng eunyi nebo tai ako inendet ne wendote kwenutab kelyek tisab chebo taisiek che bo tahabu, ² "' Anget boisioniguk, ak boisiengung’ ne nyigis, ak muitaengung’, ak anget ale memuchi imuite agobo biko che yaachen- ak kiityem icheket che kurege che kiyoktoi, ago ma choto, ako kiinai ile kiplembechonik. ³ Ak itinye muitaet ak kiimuite agobo kainenyu, amechaas. ⁴ Ago ating'enen ngolyo, ale kiimete chamnyeng'ung’ ne bo tai. ⁵ Inan anyun ole kiibute. Sigu ak iyai bocsionik che kiyae eng tai. Ngot ko mesigu anyonjinin ak aiste keldab taingung’ eng’ ole mito. ⁶ Ago itinye ni: Isase boisonikab Nikolaitik, che asase agine. ⁷ Inendet ne tinye itit, kogas kito ne mwachini Tamirmiriet kanisosiek. Inendet ne iterteri agochini koaam che bunu ketitab sobondo, ne mi paradiso ne bo Jehovah."' ⁸ Ak isirji malaikaiyatab kaniset ne bo Smurna: Ngalek che bo inendet ne bo tai ak ko ne bo let, inendet ne kigakome ak kosob kogeny: ⁹ "Anget nyalilwogikuk ak banandang'ung', ago ii mogorio. Anget chubisietab icheket che mwae kole yahudik icheket, ago ma Yahudik icheket. Icheget ko sunagogitab chesawil. ¹⁰ Ameiywei nyalilwogik che legit inyoru. Ogeero! Machei chesawil kotoorji korgoret alak eng’ okwe si kobiit ketiemak, ak inyoru nyalilda eng betusiek taman. Egu ne kiyani ogoi meiyat, si agonin kutwet ne bo sobondo. ¹¹ Inendet ne tinyei itit, kogas kito ne mwachini Tarmirmiriet kanisosiek. Inendet ne iterteri ko manyoru ng’wanindo eng’ meet ne bo aeng. ¹² Ak isirji malaikaiyatab kaniset ne mi Pergamo: Ngalek che bo inendet ne tinye rotwetab chok ne ng’atiben komoswek tuwai: ¹³ "Anget ole imenye, ole mi ng’echeretab laitornatet ne bo chesawil. Ak ikwore kainenyu missing. Anget ale metai kayaneng'ung' eng ane, agot eng betusiekab Antipa baoriandenyu, nenyu ne bo iman, ne kigibar eng kwenung'wong, ole menye chesawil. ¹⁴ Ago atingenen ng’alek che ngering: Itenye alak eng oloto che kigonaam kanetisietab Balaam, ne kiinet Balak kondeno kanagutiet taitab logokab Israel asi koam amitwogik che kigochini kanamonik ak kosokso. ¹⁵ Itinye kora ko u noto, alak che rube kanetisietab Nikolaitik. ¹⁶ Sigu anyun! Ngot ko mesigu, anyonjinin achogu oborie icheket eng rotwetab chok ne mi kutinyu. ¹⁷ Inendet ne tinye itit, kogas kito ne mwachini Tamirmiryet kanisosiek. Inendet ne iterteri, agochini mana che ung'otin, ak agochini koita ne leel ne kigesirji kainet ne leel eng koiata, kainet ne mainget chi kobate inendet ne taache." ¹⁸ "Koityi malaikayat ne bo kaniset nemi Tuatera sir: Ilechi, 'mwae ng'alechu Weritab Jehovah, ne tinye konyek che liblibendos kou mat ak kou kelyekchi taet ne tabulul: ¹⁹ "Angen boisioniguk: chamnyeng’ung' ak kayaneng’ung’ ak muitaeng’ung. Anget ale chang’ boisioniguk che bo let kosiir che bo tai. ²⁰ Ako ating’enen ng’oly, ale ichamjini chnepyoset, jezebel, ne kuuregei maotio; ak koneti kiboitinkyuk ak kogoigoi kosokso, ak koam tuguk che kigochin kanamonik. ²¹ Ak kiogochi kasarta ale si kosik, ago machame kosik eng soksennyi ²² Ogeer anyun! Awirjini kitogut ne bo miendo ak ichek che ibegei koboto inendet koba nyalida ne o, ngotko masig eng boisionikyi. ²³ Ak abare legukchi komeiyo, ak konai kanisosiek tugul kole anendet ne isiachi kabwatutik ak mugulelwek. Ak agochini age tugul eng akwe ko u boisionikwok. ²⁴ Ako amwawok akwek che ong’etunotin eng’ Tuatira, tugul che matinyei konetisioni che maingen tuguk che kure alak tugukab orit chebo Chesawil- ko eng akwe amwae ale mateswok milet age. ²⁵ Ago ko u noto, okwar missing noto otinye akoi aitu. ²⁶ Ak inendet ne iterteri ak koyai boisionikyu agoi kagesunet, kotun agochini kimnatet koboi bororiosiek. ²⁷ 'Ak koboi eng’ kiroktab karnet, ak kotuei ko u terenikab cheptereniot komengechitu koek rokyonick.' ²⁸ Ak ko u yo kiataach agine kobun Kwandanyu, agochini inendet kokeliet ne bo koriron. ²⁹ Inendet ne tinye itit, kogas kito ne mwachini Tamirmiriet kanisosiek."