¹ Vahwiire, mukuteke vazaazi veenu mwa Simwiine, mukuti iichi chishiyeeme. ² "Kuteke veeso ne vaanyoko" (ngomulawo wentaazi wiina isepiso) ³ "kuti kushiyame kwaako nokuti uwoolye kuhala inakoinde haansi." ⁴ Naanwe va-shaavaana, musiye kuvengesa vaana veenu. Kono, mu vakuza cho ku vaviika munzira ne kuva toondeza kwa Simwiine. ⁵ Vahiikana, mulyiviike kuunsi lyi va simwiine veenu vo muunkanda che kute liina kwiiwulu ne kuchachalyika, muvusakusima vwe inkulo zeenu. ⁶ Mu sepahalye ku valyi siina iiri kwa Kirisiti. Mu siye kusepahala vulyo vasimwiine veenu chi va milolyeete kuti musiye ku saangisa aavo vlyo. Kono, musepahalye siina vahikaana va Kirisiti. Muchite kusuna kwe Ireeza munkulo zeenu. ⁷ Muteende kuzwa munkulo zeenu, siineeri muteenderea Simwiine ising'i vaantu. ⁸ Mwiizive kuti vulotu vumwi ne vumwi vwa chita muuntu, kaawane kuvozekezwa ne Simwiine, naandi muhiikana kapa ulukulukite. ⁹ Naanwe vasimwiine, muchite ziswana ku vahiikana veenu. Musiye ku va tiiza. Mwiizi kuti iiye yoolyi Simwiine aavo naanwe wiina kwiwuulu. Mwiizi kuti kakwiina chilyivonda kwaalyi. ¹⁰ Mamanimani, mukolyere mwa Simwiine ne muziho zaakwe zisena chizikaanga. ¹¹ Muzwaate zizavalo ze Ireeza zoonse ze inkoode, kuti muwoolye kuzimanina zoonse zivilala za maano a satani. ¹² Mukuti inkoondo yeetu kaheena ye nyama ne malaha. Kono, ilwiisa vahitizi ne mubuso wo luhuho ne valaulyi ve ikoko lyo vuvilala, valyiisa luhuho luvilala lwiina kuzivaka zo kwiwuulu. ¹³ Chikwiina vulyo muzwaate zizavalo ze inkoonde ze Ireeza, kuti muwoolye kuzima ni mukolyete mweyinu inako yo vuvilala. Hakuti chi mwaamana chimwi ne chimwi, ka muziime ni mukolyete. ¹⁴ Chikwiinavulyo mukolye, Muchite vulyo hakuti chi mwa lyibaanta cho vusakusima ne kukola inkulo yo kushiyama. ¹⁵ Muchite iichi hakuti chimwa zwaate zo kulyitukizeza ku mateende eenu kuti muwoolye kutwaala ivangelyi yiina chisemo. ¹⁶ Muziintu zoonse mutoolye chitakiso che itumero, chaayo ka muwoolye kuzima milyiinga yoonse yi bukuka yo muvilala. ¹⁷ Mmi muzwaate ikava yo vuhalo ne mulyiinga wo Luhuho, iilyo liinzwi lye Ireeza. ¹⁸ Che itapero imwi ne iimwi ne kukumbira, murapere iinaako zoonse cho Luhuho. Choowo muhupulo, inaako zoonse mutokomere cho kuwoondesa ne ku raperera varumeri voonse. ¹⁹ Hape muni raperere, kuti ni woolye kuheewa mulayezo muni wuula vulyo kaholo kaangu. Muni raperere kuti ni woolye kwiiziviswa cho nini seena lyoowa vusakusima vuwuungwirwa ve ivangeri. ²⁰ I vaka lye ivangeri chiingi ni mizimanine muku suminwa, kokuti chaayo ni woolye kuwaamba muni swaneere kuwaamba. ²¹ Kuti naame mu woolye kwiiziva iitava zaangu ne munihalyira, Tichikasi, mweetu yo sunitwa neaalyi muhiikana wa Simwiine yo sepahala, ka milwiire chimwi che chimwi. ²² Ni vamutimini uuko kweenu cheeri ivaka, kuti muwoolye kwiziva ziintu zeetu, nukuti a woolye ku tontoza inkulo zeenu. ²³ Chishemo chive ku va mweetu, ne irato lyo vusakusima kwe Ireeza ne Isheetu ne Simwiine Jeeso Kirisiti. ²⁴ Mikoonde ive naavo voonse vasuni Simwiine weetu Jeeso Kirisiti che irato lisa mani.