¹ Lyinu hanu meve mubazii ve Ireeza, siina vana vaakwe vasunitwa. ² Mmi muyende mukusunwa, moona naye Kirisiti mwa vamisuni mmi nalitovoha chevakalyetu. A valyi ineo ne chitavero, kuva chinukisa munati chisangisa kwe Ireeza. ³ Vuhulye ne mikwa yoonse mivilala kapa kusuna vuhumi kaziswanere kuwaambolwa mukati keenu, moona mukuswanere kuvarumeri. ⁴ Kapa kuwamba zifwinsensoni, kuwamba zisenamaano, kapa zesheya zifwiinsensoni, zisashiyeme. Kono kuve nekulyitumera. ⁵ Mwiizi ichi chovusakusima kuti kakwiina vuhulye, kusajolola, kapa wiina inkulo inkaando, kokucho kuti, ihuulye, wiina vuswa muvusimwiine vwa Kirisiti ne Ireeza. ⁶ Kanzi kuvi ne muntu yo michenga cha maanzwi asene ituso. Chevaka lyeezi zintu vukalyi vwe Ireeza vukeeza hewuulu lya vaana vasazuwi. ⁷ Lyinu musiye kukopana naavo ^{8 9 10 11 12} Mukuti kalye muvalyi mukeerima mmi hanu chimwiseri mwa Simwiine. Lyinu muyende sina vaana veselri. Mukuti chicherantu ze iselyi ziina muvulotu, mukushiyama ne vusakusima. Usake chisangisa kwa Simwiine. Kaanzi ukopani naavo vasimitendo mivilala ye kerima. Kono uva zwisikiza kuunze. Mukuti ziintu zivachita mukulyiwuungula zifwiisa maswe insoni mane nekuziwaamba. ¹³ Ziitu zoonse, hazitoondezwa che iseri chiza zwisikizwa haanze. ¹⁴ Mukuti chimwi ne chimwi chichicha zwisikizwa haanze chicha shinywa. Lyinu kutewa kuti, "Sisimuke, uwe yolyere, mmi uvuuke kuvafwiire, mmi Kirisiti ka veera kwaako." ¹⁵ Lyinu ulyitokomere mooyenda, ising'i sina muuntu yasena maano mmi siina wiina maano. ¹⁶ Musakisisa inako mukuti mazuva kasishiyeme. ¹⁷ Musiye kuvula maano, kono muzuwisisa kuti kusuna kwa Simwiine kwiinavulye. ¹⁸ Kono kaanzi mukolwa iwayini, mukuti itwala kukusinyeha. Kono, mwizulye Luhuho Lujolola. ¹⁹ Muliwambisa che paselema ne zifera ne inzimbo zoluhuho. Muzimbe ne kuteemba Simwiine che inkulo zeenu. ²⁰ Inako zoonse mukulyitumera muzintu zoonse mwizina lya Simwiineetu Jeeso Kirisiti kwe Ireeza Isheetu. ²¹ Mulyiviike wumwi kuunsi lyowumwi chokukuteka Kirisiti ²² Vakulwakazi, mulyiviike kuunsi ava mwihyenwanwe, sina kwa Simwiine. ²³ Mukuti mukwaame njomutwi wo mukulwakazi, sina Kirisiti mwaalyi mutwi we ikereke. Nje muhazi wo muviri. ²⁴ Moona ikereke mwiina kunsi aa Kirisiti, bakulwakazi naavo vave kuunsi lya vakwaame vaavo muchimwi ne chimwi. ²⁵ Vakwaame musune vamwihyenwanwe, moona Kirisiti mwaavasuni ikereke mane nalyitovoha chaayo. ²⁶ Aava chiti bulyo kuti awoolye kuijoloza. Ava ishaanza mumenzi che liinzwi. ²⁷ Avachiti bulyo kuti awoolye kulyiviikira ikereke ijolola, iseena ikwe kapa kunyaana kapa chimwi vulyo, kono ijolola iseena ne chifoseheere ²⁸ Cheinzira iswana vakwaame vaswaneere kusuna vakulwakazi vaavo siina miviri yaavo. Iye yosuni mwihyaavo ulisuni mwiine. ²⁹ Kakwiina ya vatoyi muviri waakwe. ³⁰ Kono, wuutokomere ne kuusuna moona Kirisiti mwaasuni ikereke. Mukuti tuzibalyi zo muviri waakwe. ³¹ Cheeriivaka mukwaame kasiye veesi ne vaanyina a ka kopanywa ne mwiihyavo mmi ava voveere kavave inyama imwiina. ³² Uvu vusakusima vukaando vuwongwirwa, kono niwaamba cha Kirisiti ne ikereke. ³³ Nangatikwiinavulyo, wuumwi ne wuumwi weenu naye uswanere kusuna mwihyaavo iiri njeyemwiine, mmi mukulwakazi a kuteke mwiihyavo.