¹ Wumwinowumwi yozumina kuti Jeeso nje Kirisiti avazaalwa kwe Ireeza. Mmi wumwinewumwi yo suni ishoomuntu usuni ne mwaana yavazaalwa nae. ² Chevaka lyeechi twiizi kuti tusuni vaana be Ireeza: chitusuni Ireeza nekuchita milawo yaakwe. ³ Mukuti iiri ndye irato kwe Ireeza: kuti tushalye milao yaakwe mumasuly. Hape milawo yaakwe kailemi. ⁴ Mukuti wumwinowumwi ya vazalwa ne Ireeza uzunda inkaanda. Mmi uku nkokuzunda inkaanda: njo kuzumina kweetu. ⁵ Njeenu yo zuuda inkaanda? Iye yozumina kuti Jeeso mwaana ee Ireeza. ⁶ Uuzu njeye yaveza chameenzi ne malaha: Jeeso Kirisiti. Kanaaveeza chamenzi vulyo, kono cha mweenzi ne malaha. ⁷ Mukuti vashupi vootatwe: ⁸ Luhuho, meenzi, ne malaha. Iizi zotatwe zizuminzaana. ⁹ Hatutambula vushupi bwavaantu, vushupi vyee Ireeza vukaando. Mukuti vushupi vyee Ireeza mbovunu, kuti avavi mushupi cho Mwaane. ¹⁰ Wumwinowumwi yo zumina mu Mwaana ee Ireeza wiina vushupi mwaalyi miine. Wumwinewumi yasazumini Ireeza avamuchuti kuti ave nevusakusima, nukuti kanaavazumini vushupi vwavahi Ireeza cho Mwaane. ¹¹ Mmi vushupi uvu: Ireeza avatuhi vuhalo vusamani, mmi uvuvuhalo vwiina mu Mwaanakwe. ¹² Iye wiina Mwaanakwe wiina vuhalo. Iye yaseena Mwaana ee Ireeza keena vuhalo. ¹³ Ni vaming'olyeri iizi ziintu kuti mwiizive kuti mwiina vuhalo vusamani - kweenu muzumina mwiizina lyo Mwaana wee Ireeza. ¹⁴ Hape, iyi nje seepo itwiina nayo kwaalyi, kuti hatukumbira chimwinwchimwi chokusuna kwaakwe, utuzuwa. ¹⁵ Hape, chikuti twiizi kuti utuzuwa - chimwinichimwi chitukumbira kwaalyi - twiizi kuti twiina chimwinechimwi chitumukumbira. ¹⁶ Mmi wumwinewumwi yovona mwaakwe nachita chivi chisatwalyi kulufu, arapere, mmi Ireeza kamuhe vuhalo. Ni chovana vasizibi zisatwalyi kulufu. Kwiina chivi chitwaala kulufu; Kanicho kuti araperere ichi. ¹⁷ Kusashiyama koonse chivi, kono kwiina chivi chisatwaalyi kulufu. ¹⁸ Twiizi kuti wumwinewumwi yo zwalwa kwee Ireeza kachiti chivi. Mmi iye yozalwa kwee Ireeza umuvavalyera, mmi muvilala kamuwondi. ¹⁹ Twiizi kuti tuve Ireeza, mmi twiizi kuti inkaanda yoonse ilaulwa ne yasashiyeeme. ²⁰ Mmi twiizikuti Mwaana ee Ireeza aveeza mmi avatuhi kuzuwisisa kuti twisive wiina vusakusima. Hape twiina kuwiina vusakusima, mu Mwaane Jeeso Kirisiti. Nje Ireeza wovusakusima ne vuhalo vusamani. ²¹ Vaana vaagu, muzwe kukurapera veereza vavazimu.