¹ Basunwa musiye kuzumina luhuho lumwi ne lumwi, mwi, musakisise inhuho, kuvona naandi zizwa kwe Ireeza, mukuti vaporofita vaangi vasalyi vo vusakusima chivezwiire munkanda yonse. ² Chechi kamwiizive Luho lwe Ireeza - luhuho lumwi ne lumwi luwamba kuti Jeeso Kirisiti aveza munyama luzwa kwe Ireeza, ³ mmi luhuho lumwi ne lumwi lusawambi kaha Jeso kaheena lwe Ireeza, ulo ndoluhuho lwa antikirisiti, lumuvazuwi kuti lukeeza, mmi hunu chilwiina kalye munkaanda. ⁴ Muzwa kwe Ireeza, muvaana vasunitwa, mmi muvavazundi mukuti iye yimwina kwaalyi mukaando kuwiina munkaanda. ⁵ Vazwa munkaanda; lyinu zivawamba zizwa munkaanda, mmi inkaanda ivateeka. ⁶ Uuswe tuzwa kwe Ireeza, umwi ne umwi wiizi Ireeza ututeeka. Iye yasazwi kwe Ireeza kaatuteki. Cheechi twiizi luhuho ne vusakusima ne luhuho lucheenga. ⁷ Basunwa, tulyisune, mukuti kulyisuna kuzwa kwe Ireeza, mmi umwi no wimu wina irato ava zaalwa ne Ireeza. ⁸ Muuntu yasena irato keezi Ireeza. Mukuti Ireeza irato. ⁹ Chevaka lyeechi irato lye Ireeza lyivatondezwa mukati keetu, kuti Ireeza ava tumini Mwaane yeyene munkanda kuti tuhalye chevakalyaakwe. ¹⁰ Iyi ndye irato, ising'i kuti tuvasuni Ireeza. kono mukuti avatusuni, mane natumina Mwaane kuva muzimanini wezivi zeetu ¹¹ Vasunwa, chikuti Ireeza avatusuni mukakumaha, naaswe tulisune vulyo. ¹² Kakwiina ya cha vavoni Ireeza. Chikuti tulyisuni Ireeza uva naashwe mmi irato lyaakwe lyitushiyamisa. ¹³ Lyinu twizivakuti uva kweetu naaswe kwaalyi, mukuti avatuhi Luhuho lwaakwe lumwi. ¹⁴ Hape, tuvavoni, mane nitwaava vashupi vokuti Taayo avatumini Mwaane kwiiza kuva Muhazi we inkaanda. ¹⁵ Umwi no umwi yo zumina kuti Jeeso Mwaana e Ireeza, Ireeza uva naye, mmi naye uva ne Ireeza. ¹⁶ Hape tuvezivi nekuzumina irato lyena naalyo Ireeza kweetu. Ireeza irato, mmi iye yova mweeri irato uva ne Ireeza, ne Ireeza uva naye. ¹⁷ Chevakalyechi, iri irato lyivashiyamiswa mukati keetu, kuti nitukolye mwizuva lye ikatulo, mukuti moona mweena, moona maaswe mwutwiina mweyinu inkaanda. ¹⁸ Kakwiina lyoowa mwi irato. Mukwiina, irato lyishiyeme liswehera lyowa kuunze, Mmi iye wiina lyoowa keeni kuva ne irato lyishiyeme. ¹⁹ Tusuna mukuti Ireeza avatusuni intaanzi. ²⁰ Mmi muuntu hachokuti, "nisuni Ireeza" mmi natoyete mwaake, kawambi vusakusima. Mukuti muntu yasasuni mwaake, uzo yavavoni, keeti cho suna Ireeza, yasanaavavoni. ²¹ Hape, uwu ngomulawo utwiina nawo uzwa kwaalyi: Umwinoumwi yo suni Ireeza uswaneezi kusuna yazalwa naye.