^{1 2} Hanu ni mu kumbulusa,vakwaangu-chiswisu,ka ha manzwi a ni va mu wambiri,a mu va taambulyi mane a mu ziimeene hateni.Nje chaa manzwi kuti mu kweete ku hazwa,haiva ni mu ngambasira ahulu lyinzwi lye ni va mu chumayeri,mbwita ha mu va zumini mahala. ^{3 4} Mukuti ni va mu lyeteri sineeri nche musula we ntanzi cheni va taambulyi naame: kuti Kirisiti ava fwiiri zivi zeetu kuya che mingolo,kuti ava wungwa,mane kuti ava vuswa mwi izuva lyo vuutatu kuya che mingolo. ^{5 6 7} Ne kuti ava voneki kwa sipasi,kuzwaho ku veena twelve.Kuzwaho ava voneki ku vakweetu chiswisu veena 500 inako yi mwiina.Vungi vwaavo va sihala,mi vamwi chi valyeere.Kuzwaho na vonika kwa Jakovo,kuzwaho ku vaapositola vonse. ^{8 9} Chikongera zonse,a va voneki kwaangu,sineeri ku muwire ava zaalwa inako isalyi njoyo.Mukuti ni mu neeni wa vaapositola. Ka ni swaneerwa ku sumpiwa muapositola ivaka lyo kuti ni va nyandisa ikereke ye Ireeza. ^{10 11} Mi che isehuhazo ye Ireeza ni veere chi niiri icho,mane isehuhazo yaakwe mwangu ka hena a valyi mu mahala.Kunzelyovulyo, ni va teendi ahulu ku va zamba vonse.Ni saalyi ime,mi isehuhazo ye Ireeza yiina naame.Lyinu nandi njeeme nandi njovo,vovulyo tu chumayera mane vovulyo mu va zumine. ^{12 13 14} Lyinu haiva kirisiti na wambiwa na vukite mwaavo va fwiire, kwiza vulye vamwi veenu hava woola ku wamba ka kwiina ku fuswa kwa vafu? Mi haiva ne ku seena ku vuswa kwa vafu,lyinu naaye Kirisiti ka hena ava vuuswa.Mane haiva kirisiti ka hena ava vuswa,lyinu ku chomayera kweetu kwiina mu mahala,ne itumero yeenu yiina mu mahala. ^{15 16 17} Mane tu waanwa ni tulyi va shupi vamapa kaha Ireeza,cheivakalyokuti tuva shupi kunze lye Ireeza, kuti ava vusa Kirisiti ne a sena avalyi.Mukuti haiva vafu ni va sa fuswa,nanta naye Kirisiti ke hena ava fuswa.Mane haiva Kirisiti ne a seena ava vuswa,itumero yeenu ina mu mahala mane mu siina mu zivi zeenu. ^{18 19} Lyinu avo vava fwiiri mwa Kirisiti naavo vava zovi.Haiva vulyo movu vuhalo twiina ku zumina kwe zikeeza mwa Kirisiti,cha vantu vonse tu yendere ku zuwirwa vutuku. ^{20 21} Lyinu hanu Kirisiti ava vuuswa mu vafwiire, zihantuntanzi zaavo vava fwi.Mukuti haiva lufu lu veeza cho muntu,cho muntu naako ku veeza kuvuka kwa vafu. ^{22 23} Mukuti siina mwa Adami vonse vafwa,lyinu vulyo mwa Kirisiti vonse kava vuuswa.Mi umwi ne umwi che izamayiso yaakwe:Kirisiti,zihantuntanzi,mane kuzwaho avo valyi va Jeeso kava hazwa ha kwiiza kwaakwe. ^{24 25 26} Kuzwaho ka kuve mamani-mani, Kirisiti china ha Ireeza Tayo muvuso.Aha mpoho heti naa sinya milawo yonse ne kulawula konse ne inunuho.Mukuti u lukeere ku vusa ku kasika mu ku viika zira zaakwe zonse kunse lya mateende akwe.Chira cha mamanimani kwi ihayiwa nje lufu. ^{27 28} Mukuti'' ava tuulyi chimwi ne chimwi kunsi lya mateende akwe.'' Mi ha icho '' ava tuulyi zonse,'' ku tamalyeere kuti ichi ka chi njirikite iye yo viika chimwi ne chimwi mwi itawulo ku kavuhakwe.Zintu zonse che ziina mwi itawulo yaakwe,lyaho Mwaana-swisu kavuhakwe kave ku lawuulwa kwaalyi iye ava lawulyeri chimwi ne chimwi kwaalyi.Ichi kachi chitahalye kuti Ireeza taayo ava zonse mu zonse. ^{29 30} Chipoo njechihi cheeti avo ni va chichitire vafwire vakolovezwaa? Haiva vafwire ka va vuuswa konse,chinzi lyinu ha va vakolovera? Mane chinzi ha twiina mu matata inako yimwi ne yimwi? ^{31 32} Ni fwa izuva ne izuva.Chi ni wamba cho kulyitemba kwaangu mweenu,vakwangu chiswisu, avo va niina naavo mwa Kirisiti Jeeso Siwiine weetu.Ni waana nzi,mu ku lola kwe vantu,haiva ni va lwe ni zivata kwa Efasisasi, haiva vafu ka va vuuswa? '' Ka tu lye ne kunywa,mukuti izoona tufwa.'' ^{33 34} Sanzi mu ziyezwa: '' vulyikani vuvilaala vu hirikanya vuntu vu shiyeme.'' Muzwiwa kukolwa! muhalyi kushiyama! Sanzi mu zwiriza kuchitavuvilaala.Mukuti vamwi veenu ka vula kwiiziva Ireeza. Ni wambira ichi kuku swava kweenu. ^{35 36} Mi umwi kaati,'' vafu va vuuswa vulye? Mane ka veeze ni mu viri wiina vulye? Ka mwiizi ahulu! Chi mu vwaala keeti ne chitaange ku kula mbwiita ha chi fwa. ^{37 38 39} Mane chi mu va vwaalyi ka hena muviri yeti nuve,mi imbuto e kanzame.E woola kwiza kuva mahira nandi chimwi aho.Mi Ireeza kaa chihe muviri siina mwa saalyira,ne kwi imbuto imwi ne imwi muviri waayo.Ka hena inyama zonse zi swana.Kunzelyovulyo,kwiina inyama e mwiina ya vantu,ne yimwi inyama ye zinyolozi,ne yimwi inyama ye zizuni,ne yimwi inyama ye inswi. ^{40 41} Kwiina naako miviri ye kwi iwulu ne miviri ye inkaanda.Mi kuveranga ko muviri we iwulu mushovo umwi ne kuverenga kwe muviri we inkaanda nje umwi.Kwiina kuverenga kumwi kwe izuva,ne kuverenga kumwi ko mweezi,ne kuverenga kumwi kwe inkaani.Mukuti inkaani imwi ka e swani ne inkaani imwi mu kuverenga. ^{42 43 44} Lyinu naako kuvuka kwa vafu mu kwi ikalyire.Chi vwaalwa chi vola,ne chi vuswa ka chi volyi.Chi vwaalwa mu kusakutekwa; chi vuuswa mu ku verenga. Chi vwaalwa mu ku vula ziho;chi vuuswa mwi inunuho.Chi vwaalwa muviri u vumbitwa; chi vuuswa muviri we luhuho.Haiva ni kwiina muviri u vumbitwa,naawo muviri we luhuho ku wiina. ^{45 46} Lyinu vuvulyo ku ngolyetwa,'' Unkosi we ntanzi Atami a vavi luhuho lu hala.'' Atami wa manimani a vavi luhuho -luha vuhalo.Mi cheluhuho ka hena chi veeza ntanzi mi kuvumbwa,ne kwe ichirira cheluhuho. ^{47 48 49} Unkosi we ntanzi njiwe nkaanda,na pangitwa che ivu.Unkosi we vuveeri u zwa kwi iwulu.Siina vulyo iye yo pangitwa kuzwa mwi ivu mweena,vovulyo mu veena va pangitwa che ivu.Mane siina Unkosi we iwulu mweena,vovulyo mu veena valyi ve iwulu.Siina mu tu va zwaati chiswano cho Unkosi we ivu,ka tu zwaate vovulyo chiswano cho unkosi we iwulu. ^{50 51} Lyinu ichi nichi wamba,vakwangu chiswisu, kuti inyama ne malaha kufwa kulyavuswa muvuso we Ireeza.Nangati icho chi mana kulyavuswa icho chi sa mani.Muvone! ni mu lwiira chihumbitwa cho vuniti: keeti ne tu fwe tu vonse,mi ka tu sandulwa tu vonse. ^{52 53} Ka tu sandulwa mu kavakazana,muku kavakava kwe lyinso,kwi itorompita ya manimani.Mukuti itorompita ka yi lyire, ne vafu kava vuusikizwa kusafwa,mane ka tu sandulwa.Mukuti uwu muviri u vola u lukeere ku zwaata chi sa volyi,ne muviri uwu u fwa u lukeere ku zwaata ku sa fwa. ^{54 55} Mi uwu muviri u vola ha u zwaata chisa volyi,ne uwu muviri u fwa ha u zwaata kusafwa,lyinu ka kwiize lyinzwi lyi ngolyetwa,'' Lufu chilwa minwa mu kuwoolwa.'' ''Lufu,ku woola kwako kwi nahi? Lufu,kusuma kwaako kwi nahi?'' ^{56 57} Kusuma kwe Lufu vuvilaala,ne inunuho ye vuvilaala mulawo.Mi vuitumero kwe Ireeza,yo tuha kuwoola cha Simwiine weetu Jeeso Kirisiti! ⁵⁸ Lyinu,vakwaangu chiswisu va sakahala, mu kolye ne kusanyungoka.Inako zonse mu njihe mu musevezi wa Simwiine, mukuti mwizi kuti musevezi weno mwe Ireeza ka hena mahala.