^{1 2 3 4} Muvwiime chesemo mane mu twahalyere inewo ze luhuho,ahulu kuti mu porofite.Mu kuti iye yo waamba mu lulyimi ka wambi ne vantu mi ne Ireeza.Mukuti ka kwiina yo mu zuwiseza cheivaka lyo kuti u wamba zintu zi hungwiirwa mu luhuho.Mi iye yo porofita u wamba ne vantu ku va zaka,ku va koza,ne ku va humbulyera.Iye yo wamba mu lulyimi u lyi zaka,mi iye yo porofita u zaka ikereke. ^{5 6} Lyinu ni saka kuti mu vonse ni mu wamba mwi indimi.Mi mane ku zamba aho,ni saka kuti ni mu porofita.Iye yo porofita mukaando mwaalyi iye yo wamba mwi indimi(mbwiita umwi ha talusa kuti ikereke e zakiwa.)Mi hanu,vakwaangu chikwaame,haiva ni niiza kweenu nini wamba mwi indimi, mu ni mu vozekeza vulye? keeti cheni,mbwiita ha ni wamba naanwe che kutondezwa,nandi kwiiziva,nandi chiporofiti,nandi kuruta. ^{7 8 9} Haiva zitendeso zisena vuhalo zi panga mulyumo-siina ifulutu nandi iharipa-mane ka zi pangi milyumo i siyeene siyeene, umwi u woola kwi iziva vulye mulyumo u zaanwa ne ifulutu nandi iharipa? Mukuti haiva itorompita i zaanwa che mulyomu u sa sepahalyi,umwi ke izive vulye inako ha e sika ye kulyi vaakanyeza inkoondo? Kwiina vulyo cheenu.Haiva no u waamba lyinzwi lyi seena maano,umwi kaa zuwiseza vulye che u va wambi? Mo ve kuwamba,mane ka kwiina yeeti na ku zuwiseza. ^{10 11} kwiina indimi zingi che kusa verera mwi inkaanda,mane ka kwiina e seena chishupo.Mi haiva nini seezi italuso ye lulyimi,mu ni ku veere mwiina ishira ku yo waamba,mane yo wamba mwa ku veere mwiina ishira kwaangu. ^{12 13 14} Mu kwiina vulyo ka henu.mukuti mu sakite ahulu zishupo zo luhuho,mu nyoterwa mu ku zaaka ikereke.Lyinu iye yo wamba mu lulyimi u lukeere ku rapera kuti a taluse.Mukuti haiva nini rapera mu lulyimi,luhuho lwaangu lu rapera,mi ingaana yangu ke yi zaalyi. ^{15 16} Ni lukeere ku chita nzi? mu ni rapere che luhuho lwaangu,mi ka ni rapere ni ku zimba che ingaana yangu.Maanoamwi,haiva ni u temba Ireeza che luhuho,wo kunze ka wambe vulye,'' Ameen'' che uha vuitumero haiva naa seezi cho kweete u wamba? ^{17 18 19} Mukuti muha vuitumero mushiyeme ku lyikeene, mi muntu umwi keeti a ku zaakitwa.Ni lyi itumerisa Ireeza kuti ni wamba mwi indimi ku mu zamba mu vonse.Mi mwi ikereke kwiina vutuka ni ni wamba manzwi ena five che ku zuwiseza kwaangu kuti mwendi ni kayere vamwi,kunze lya mahuko ena ten tawuzendi mu lulyimi. ^{20 21} Vangwaangu chiswisu,sanzi muvi vawirezana mu ku nahana kweenu.Vutuka,kaha vuvilaala,mu swane siina inkeke.Mi mu ku nahana kweenu mu kulye.Mu mulawo ku ngolyetwa,'' Cha vantu ve ndimi zi tiiza ni che milomo ya vasezivitwa ka ni wambe naava vantu.Nako lyinu keeti ni va ni zuwe,'' ku wamba Ireeza. ^{22 23} Lyinu indimi chishupo,insini ku varumiri,mi ku vasarumeere.Mi ku porofita nkwe chishupo,insini ku vasarumere,mi varumeri.Haiva,lyinu,ikereke yonse iza hamwiina mane vonse va wamba mwi indimi,mane veenakunze ne vasarumere veeza mukati,keeti va cho kuti mu burumuka? ^{24 25} Mi haiva mu vonse mu vaalyi ku porofita ne yasarumeri nandi yozwahanze neeza mukati,mwa woolwa ne zonse za zuwa.Ka watulwa ne zonse zi wambiwa.Zilyihungwire ze inkulo yaakwe ka zi zavulwa.Niiri mavolyero,kawe hansi che chifateho chaakwe che ku rapera Ireeza.Ka wambe kuti Ireeza vusakusima wiina mweenu. ^{26 27 28} Chinzi chi ichirira lyinu,vakwaangu chiswisu? Ha mwiiza hamwiina,umwi ne umwi wiina kazimbo, ituto,isenurero, lulyimi,nandi italuso.Mu chite chimwi ne chimwi kuti mu zaake ikereke.Haiva umwi na wamba mu lulyimi,ka kuvi voveere nandi kuzima vuutatu,mane umwi ne umwi mu chivaka.Mane umwi u lukeere ku talusa chi wambiwa.Mi haiva ne ku seena yo talusa,umwi ne umwi waavo a tontolye mwi ikereke.Umwi ne umwi a wambe yeyeena ne kwe Ireeza. ^{29 30} A vaporofita voveere nandi vootatwe va wambe,mane vamwi va tekesa che ku vona chi wambiwa.Mi haiva isenurero ni hewa yo wikeere mu iseverezo,iye cho kweete ku wamba a tontolye. ^{31 32 33} Mukuti umwi ne umwi weenu u woola ku porofita vumwina che vumwiina kuti umwi ne umwi a lyitute ne vonse va kutazwa.Mukuti inhuho za vaporofita ziina mwi itawulo za vaporofita.Mukuti Ireeza ka hena Ireeza wa kanzungulye,mi we ikozo.Ichi nje mulawo mu makereke onse a varumeri. ^{34 35 36} Vakulwakazi va lukeere ku tontola mu makereke.Mukuti ka va zumininwa ku wamba.Kunzelyovulyo, va lukeere ku va mu ku lyi twaala,siina mulawo nawo mu wamba.Haiva ni kwiina chimwi chi va saka ku lyi tuta,ka va vuuza vakwaame vaavo kwi irapa.Mukuti ku twaalaisuvi mukulwakazi ha wamba mwi ikereke.A Lyinzwi lye Ireeza lyi vaazwi kweenu? A njonwe nunweena ku lyi vasiki? ^{37 38} Haiva umwi nahaha naalyi muporofita nandi weluhuho, u lukeere kutambula kuti zintu zi ni mu ngolyera itawulo ye Ireeza.Mi haiva umwi naasa lyimuhi ichi,saanzi iye a lyimuhiwa. ^{39 40} Lyinu hanu,vakwaangu chiswisu,mu sune ku porofita ahulu,mane saanzi mu vindisa ini nandi ini ku wamba mwi indimi.Mi zintu zonse zi chitwa nenza ne mwi izamayiso.