¹ Cware nwe bakwanga, ndati ni rapera shi shishemo shu Rezya, ni bike mimbiri enu ibe shitabero sheshi yimi, shichena, ishsati tishirwa ku Rezya. Yopani ndi seberezo ya tirukera. ² Ni siye kuli kakwira zu lyuvu lyopani, kono niya rumuke shuku shemunwa muku yuvusisa, ni pange zopa shuku yiba atikya zeziqe izire. Ishati shakahara indi ku shakuwa ku Rezya. ³ Cware shilibaka lyi shishemo shindata puwa, ndati zira muyeyi nu muyeyi akune: Ni siye kuyana kana kuli kakura kubbara muku namina, kono, ayanakane zi katuro zeziqa, kozo kwenda shi tumero yu Rezya amata kupa. ⁴ Tandi putina zirama zizinji pu mumbiri muxiki, mi zirama amazaku panga mubberiko muxiki. ⁵ Mwi njira iyati fwana, yetswe babenji tishi rama shixiki ku Keresite, mi kwetu tumumbiri ku yumwe nu yumwe. ⁶ Tina zipewa zati chichana kwenda shishemo shitata pewa. Ati ichimwe ishu mupupo uku porofita, kube akyo kwenda shi tumero akye. ⁷ Ati yiyimwe ichi ku bberika, ni musiye abberike. Ati iyimwe inji ku kutaza, ni mu siye a kutaze. ⁸ Ati yiyimwe injiku gisa, ni musiye agisize. Ati yiyimwe inju kupa, ni musiye adzere kuwuso. Ati iyimwe inji kwendisa, ni siye kube akyopa shuku mamera. Ati iyimwe inji zuxuma, apange nali mwidze. ⁹ Rusuno rudzwe ku kuli kakura. Nitweye wubbi; indi ku mamera wuqa. ¹⁰ Kwenda shurusuno nwe bakwenga, tilibike paxiki. kwenda shuku panga naqa, kuli kutyeka. ¹¹ Kwenda kuzu kuli kataza, ni siye kushuka mulyuqo. Kwenda shu mupupo, Kwenda sha Shikati, ni mubberishire. ¹² Niradze mwi sepo, ni lindire mu mshando, ni beni tumero mwi tapero. ¹³ Ni lipeko kuza mati shaka kuzu bati shaka baba chena uwu rezya. Ni shangane zi njira muna kwi qamina wuqa. ¹⁴ Ni fuyore ibani shandisa; fuyora mi kaku tuta. ¹⁵ Niradze nibati dze; ni lire ni bati lira. ¹⁶ Niba ni ngana ixiki kwenu. Ni siye ku yanakana mwi njira iyi kukuli kakura, kono niti shira ibana peshi. Ni siye ku sauka mumi yanakano enu. ¹⁷ Ni siye ku shusa wubbi shu wubbi. Ni pange wuqa mwa meesho aba yeyi kowo. ¹⁸ Ati kwati kwanahara, tananga nduku zina, ni pare naqa ni bayeyi kowo. ¹⁹ Nati shakuwa, ni siye ku shusa wubbi yenwee, kono nipe wugyu ku Rezya. Ku ñwara, '''ku likanisa ukwanga, ku hweta Shikati.'' ²⁰ Kono ati shira nchwe shafu injara, shipa shulyuwa shilye. Ati shafu linata, shipa ami shunwe. Ati mati panga zopa, mati shanganisa makara pu mushoro akye.'' ²¹ Siya ku kyiruwa ku wubbi, kono ukwire wubbi shuwuqa.