¹ Ndatikya, Urezya mata shita bayeyi bakye? Kusiye kuba akyopa. Shuku tikya indime ndu mu Isiraele muyukura Abburahama, uyu rusinga rwa Benjameni. ² Urezya ama shitye bayeyi bakye, bayi zire kare. Kani yi zire shimañoro ngati hweta ku Elija, Shi karu ku ringira Urezya kwa bana ba Isiraele? ³ ''Shikati, bata bbura ba porofita wee, bata vungara ma arutare aye. Myekye ndinda kara, mi bati shaka wuparo wanga.'' ⁴ Kono ikarawo Urezya yatikya ku kye? ''Ndayi bishiri bayeyi ba 7000 baha chire kuxhitira Baale madzi.'' ⁵ Nanga ndipakyo, indi kakanda kapani ku shina ibakara shilibaka lyuku likyetira shi shemo. ⁶ Kono ati ishishi shemo, kwe ngaho kashi misebezi. Ati ingahopa shishemo kali kashi shemo. ⁷ Shikya cware? Ichuto shubaru ku shaka ma Isiraele, yemwa bashi shangane, kono bata shararwa bata shi shangana, mi iwunji kali wuzuwo. ⁸ Tandi shikwata ñoruwa: ''Urezya mata bapa mupupo ukuzungura kwa mesho, atikya basiye ku mwana, mati awo ngasiye ku yuvwa, kuya namushi.'' ⁹ Cware Davida mata tikya, ''Nisiye zi tafure zawo zibe tunyandi indi tupeto, shishi tataliso, indi murandu wati balikana. ¹⁰ Amesho awo ngabe ni karema akya ngasiye ku mwana, araxe kawo mi shana awo kutwara koo.'' ¹¹ Ndatikya, ''Batara qaqara pubata waa?'' Ku siye kuba akyo. Akya, shukuwa kawo, kuya kuwa kwata yera wu lyuvu, atikya bakusiwe ku muna. ¹² Pani ati kuwa kwawo ikuzi tswuwa zu lyuvu, Ati kwi kini kwawo iku zu tswuwa zu lyuywaba, ku mana kwawo shakube kukuru akyare? ¹³ Kono pani ndati hweta kunwe wu lyuvu, mi ku mwana ngaho ndu mu apositora ulyuvu, ndati radze ku mubberiko anga. ¹⁴ Nanga ndipakyo shandi kuse muna kuwu mbiri anga. Nanga ndipakyo shati yakye abamwe. ¹⁵ Ati ku shita kwawo toroka ku shwishizana ni lyuvu, cware ku tamburwa kwawo ishakube akyare kono wuparo ku dzelira ku rufu? ¹⁶ Ati mutamuno mucena zu lyuwa shu wunji zi cena. Ati zizi zicena, indi zitwebe. ¹⁷ Kono ati zintobe zizimwe zat5a njungaka, ati yewe, una ntobe iya Olive ya mwi shumwe, ma bikuwa mu shibaka shayo, indu ku shengena zinzi zayo. ¹⁸ Siya kuli rumba shizi ntobe. Kono ushi lyirumba, kawe mati gisa zinzi, kono zinzi ndizati ku gisa. ¹⁹ Shu tikya he, ''Zinzi zata vunjaka akya yeme ndi shanganehe mu shibaka shazo.'' ²⁰ Injahamu yopa. Shuku hati shira kuzo izata vunjaka, kono yewe mati gipa shi tumero aye. Siya ku yanakena shire shawe ngaho, kono ywapa. ²¹ Ati Urezya ama yakye zintobe za mwi shumwe, indiwe ka muni shaku yakye. ²² Lyaya ko, cware, zisi zi shi shemo indi kuyaka ku Rezya: kuyaka kwataya ku ma Juda ibatawa, kono shi shemo shu Rezya shataya kuwe, ati mati dzera ku wuso murusuno rwa kyee. Indiwe nushu tswuruwe. ²³ Tananga imbo ati amaba ku dzera ku wuso ni tiha tishira kwawo, ishaba shwisizwe muzi baka zawo. Urezya mati kwana kuba shusiza muzibaka zawo nangweza. ²⁴ Ati mati xakuwa ku muti wi olive, iwa mwi shumwe ndu kuya ku kunuwa ku muti olive wo muqa, ingahare kwa kuba ku zintobe, puza ku bikiwa mu muti azo tota? ²⁵ Yemwa ndaku shaka atikya ni ziruwe, bakwanga, zitaba zini, atikya nisiye ku sauka mu miyanakano enu ngaho: Atikya ku zuwupa kwata yera ma Isairaele shuku yira ku twara pushu wulyuvu ishaba ku njjena. ²⁶ Cware papa ma Isiraele pushaba ku yakuwa, tandi shikwa ta ñoruwa: ''Yamati yaka ishadzwe mwi kyo lya Ziyoni. Ishaye ku kusa matoti (milimo) ku Jakowo. ²⁷ Chopa ndisha kwiqyo wu mbiya wanga nawo, pusha ndaku gusa zibi zawo.'' ²⁸ Tandi pwi evangeli yati hwetuwa, bati lyayi shika atikya zira shilyina lyenu, Kono shukuli kyetira, bayeyi wunati shaka shilibaka lya bashukuru betu. ²⁹ Zi pewa indi ku beruwa ku Rezya amaza ku chuchuwa. ³⁰ Ngaha katandzi shiruku shita Urezya, pani nashangana shi shemo shuku hati shira kwawo. ³¹ Mwi njira iyati fwana, pani ma Juda kali baraqyo ibahati tishira. Shimuya nakano wa ngahopa indiwo shaba yakuwe shurusuno rwara quwa kunwe indiwo bachichinjiri rusuno. ³² Urezya maya ziri bayeyi kowomu kuha tishira akya aba mwenise shi shemo koowo. ³³ Oo, wa fuma indu ku yiba izuto zuku sauka mi indi mano Urezya! zi yatura zakyee amaza ku shakisiswa, mi indi zi njira za kyee amaza ku shanganeha! ³⁴ ''I yani mata yiba miyanakano a Shikati kapa i yani ikaru ku zwara? ³⁵ Hali i yani imata ywi tandzi ichuto ku Rezya, akya Urezya amu shusize?'' ³⁶ Shuku tikya izuto koowo zata dzwa ku kyee mi ishakye mi kukye izuto kozo zina. Kube ni rumwenyi kukyee. Amen