¹ Paulusi, mu apositola a Jeso shuku shaka ku Rezya, indi Timotea mukwetu. ² Ku baba chena wu Rezya indi bati sepahara bakwetu ku Keresite ibana mo Kolose. Shishemo shibe nanwe, indi shixamu kudzwa ku Rezya Shetu. ³ Tati kambira ku Rezya, Shee a Shikati etu Jeso Keresite, indi hape nikatiti ni raperera. ⁴ Tata yuvwa ku tishira kwenu ku Jeso Keresite indi rusuno runi sitye ku bayeyi kowo wo Rezya baba chena. ⁵ Nina rusuno shilibaka li sepo ina bishirwa mwi lyiiro. Natata yuvwa zi sepo yopani piri mu lyiyi li njahamu, wurumiwa. ⁶ I yataya kunwe. I tumero yopani yati bika zi pata hape yati kura mu lyuvu kolyo. Yatisi akyopa mo kunwe kudzwa liba lyumata yi yuvwa indi kuli tuta zi shixamu shu Rezya mwi njahamu. ⁷ Wopani ndi wurumiwa tandi shimata li tuta woo ku Epafrasi, mbiyetu yamati shakuwa, yamata sepahara muvuya a Keresite kutswe. ⁸ Epafrasi mata yibahaza kutswe zurusuno rwenu mu mupupo. ⁹ Shu rusuno ropani, kudzwa lyiba litata yuvwa zopani amati siye kuni raperera. Nikatiti rungira akya niyire ingana koyo yuku sauka indi ku yuvusisa shu mupupo. ¹⁰ Ni katiti rapera atikya ni yendye mwi njira yi chena ya Shikati iyati mwidze kawu. Ni katiti rapera atikya ni bike zipata muzisi zenu zeziqa indi akya ni kwire mwi ngana iyu Rezya. ¹¹ Tati rapera atikya nigisuwa mwiqumu koyo shu kwenda mu liseli kolyo yuku yuvusisa indi kuba mutima womure. ¹² Tati rapera atikya shani radze kupa ku rumba ku Shetu, yamatani panga akya ni kwene kwiswana bayeyi wu Rezya baba chena mu liseli. ^{13 14} Matati yaka kuku khomuwa ku karema indi kuti twara ku mu wuso amwana kye. Mutati ka shangana ku yakuwa, ku paturwa ku zibe. ¹⁵ Inje indishi swaniso shahati mwanahara shuRezya, ywi tandzi kuzi panguwa kozo. ¹⁶ Shayeye izuto kozo zata panguwa, izina mu lyiro indi mu lyuvu, zati mwanahara indi zahati mwanahara. Kapa shurwo shuwu Shikati, injenduso, muwuso, izuto kozo zata panguwa shaye mi izakye. ¹⁷ Yeye ndiyana puwuso wazo kozo, shayeye izuto kozo zati shanganusuwa. ¹⁸ Inje ndumu shoro umu mbiri, i kereke. Yee ndi makarero iywi tandzi mwikyo lyabafu, shibaka shitandzi ichakye mwi chumwe ni chumwe. ¹⁹ Urezya mata radze kawo muku yira kura kukye. ²⁰ Indi ku shusiza izuto kozo shu Mwana kukye. Urezya mata panga shixamu shingazi ushi bambiro shakye. Urezya mata shusiza izuto kozo koku kye, iza mu lyuvu kapa iza kwi lyiiro. ²¹ Mwi nako ixiki indinwe kali ni yeni ku Rezya mi kali nizira zakye mwa mano indi muzisi zezibi. ²² Kono pani matani shusiza shumu mbiri akye shurufu. Matarsi akyo atikya ani bike kubaba chena, baba njemwa wubbi, baba njemwa shibbi pumaso akye. ²³ Ati nati dzwera puwuso ni tumero, ni panguwe indi ku gipa, ni siye kudzwa mwi sepo yi wurumiwa wuna yuvu. Lyopani ndiliyi lyeli chena ilyati zirwa muyeyi kwekye yamata panguwa mwishi lyi lyiiro. Wopani nduwu rumiwa wu mye, Paulusi, ndabi muvuya. ²⁴ Pani ndaradze mu mashando anga kunwe, hape ndati yiza inyama anga zezi njemwa ku shiwumbuwa sha Keresite shumu mbiri akye, yoyo i kereke. ²⁵ Ishi ikereke nanga ndali ndi muvuya, kwenda shiza tidzwa ku Rezya izata pewa kume shayenwe, kuyiziriza lyiyi lyu Rezya. ²⁶ Yopani ndi njahamu yata zukuwa kudzwa kare kono pani yaraqewa kwa bato wu Rezya baba chena. ²⁷ Ikuwo Urezya karu ku shaka ku yiba haza wufumu wu kurumba injahamu izukuwa mwikyo lyuwu lyuvu, i Keresite kunwe, i sepo yu liseli. ²⁸ Tati hweta izakye, ku ruta kowo ku sauka koko, nduku tikya tu kwene ku mwenisuwa uyumwe nu yumwe ku kara ku Keresite. ²⁹ Sha zopani ndati bberika indi shanda shilibaka lyi mata ake ingati bberika kume shi qumu.