¹ Kumanizhya, nobakwesu, cakuhinizhya twalomba kuli ndimwe alimwi a kumusumpula muzhyina lya mwami wesu Jeso. Mbuli mbomutambula malailile kuhvwa kuli ndiswe a mbuli mbomweelele kwenda alimwi a kutembaula Leza, anywe mbubona amweende, kutewa kuti mucite nokuba kwiinda waawo. ² Nkaambo mulinhyi malailile mbwaabele ngotwakamupa kwiinda mumwami wesu Jeso. ³ Oku nkokuyanda kwa Leza, kumusalazhya, kuti muleke mamambe, ⁴ umwi aumwi ahibe kuba amukaintu wakwe mwini cakusalala alimwi akulemeka, ⁵ Kutali mukucita zhyintu zhyibwabi (mbuli bamahi ibatahyi Leza). ⁶ Kutabi muntu usoloka na kulubizhyaizhya munyina kumakani aya oonse, nbubona mbotwakamwaambila kale a kumulungulwila. ⁷ Tabuli bubwaabi bwa Leza mbwaakatwiitila pe, pele kukusalala. ⁸ Nkaambo kaako, oyo ukaka ceeci takaki bantu, pele Leza, uupa moza usweesya kulindimwe. ⁹ Heelele a kumulembela makani aaya, akuyandana kwabunyina, nywebo lwenu nobeni mwakayiihiwa kale kuti Leza kuyanda umwi amwenhyinyina. ¹⁰ Ncobeni, mulacita eeci kulibabunyina boonse bali moonse mu Macedonia. Pele tulamusumpula, nobakwesu, amucite ceeci mukwiindilizhya. ¹¹ Amusungwaale kuyanda kukkala muluumuno, alimwi mubambilile makani a milimo yenu nobeni, a kubeleka amatanhi enu, mbubona mbuli mbotwaka mwaambila, ¹² kutewa kuti mweende kabotu kumbele lyabaabo ali ansengwe, alimwi akutabula cimwi cintu. ¹³ Tatuyandi kuti nywebo mukkale kakunyina ncomuzhyi, nobakwesu, kumakani abaabo boona, kutewa kuti mutakapezhewi mbuli bamwi, aabo banyina bulangizhyi. ¹⁴ Nakuti tulahyoma kuti Jeso wakahwa alimwi wakabuka, mbocibele Leza antomwe a Jeso bakabunhya baabo boonse bakoona mulinguwe. ¹⁵ Muli ceeci twamwaambila a Jwi lihvwa kuli Leza, kuti swebo notupona noyutikazhyaalile kukuboola kwamwami, mahimpe tatukabataangunini abo boona pe. ¹⁶ Nkaambo mwami lwakwe mwini uyakuselemuka kuhvwa kujulu. Uya kuboola a mukunga, a Jwi lya mungele, alimwi a mpeta ya Leza, alimwi bakahwa muli Klisto baya kutaanguna kubuka. ¹⁷ Ono swebo tobaumi, tuyakubwezhelwa mumakumbi kuya kuswaangana a Mwami mumulenga-lenga. Muliceeci tuya kukkala lyoonse a Mwami. ¹⁸ Boobo, amumbulizhyane a majwi aaya.