¹ Enam ahi abis iyak Yesus di imbai Petrus, Yakobus, seta Yohanes menyadik Ia, Ia ngemaik sidak naki gunung yang tinggik. Diak hanya sidak magang. ² Yesus behubah dadap sidak; mua Ia becehaya baka mata ahi, utan di pakai Ia jadi tehang baka cehaya. ³ Pantau meh, sidak alu tepantau ke Musa dengan Elia agik tengah ngomong dengan Ia. ⁴ Petrus nyaut alu bandai ahung Yesus," Tuhan, bait benah kami ada dituk. Entik Nuan mauk, aku jekak ngawai tiga kemah dituk-- sutik pakai Nuan, sutik pakai Musa, sutik lagik pakai Elia." ⁵ Sementaha sidak agik tengan ngomong, nda lamak tuhun meh awan yang cemehlang ngelingkup sidak, sidak ninga ada suaha yang keluah dahi awan iyak, bandai," Ituk meh Anak yang Aku kegauk, Ia meh yang di kemauk Aku." Dinga meh apa yang Ia omong." ⁶ Seta muhid-muhid ninga iyak, sidak jatuk tesunggkuh sidak pun ngasa abis penakut. ⁷ Yesus alu datang neguk sidak alu bandai," Angkat meh anang takut." ⁸ Sidak pun alu mantau katas tapi sidak nisik ngeliat sepa-sepa selain Yesus. ⁹ Sambil nuhun gunung, Yesus mehintah sidak, jekuk Ia," Anang madah penglihatan ituk ahung sepa magang sampai Anak Mensia dibangkit dahi mati Ia." ¹⁰ Muhid- muhid betanyak," Entik baka iyak, ngapa dik padak ahli Taurat madah Elia ahus datang lebih duluk?" ¹¹ Yesus nyaut alu bandai," Elia saja benah-benah datang seta nyemait semua utan. ¹² Tapi Aku bandai ahung nuan, Elia udah datang, tapi sidak nda ngelalak ia. Malah sidak ngawai ia sengalah ke ati sidak. Baka iyak ugak meh Anak Mensia bulih pemedih empadai sidak. ¹³ Ketiga muhid Ia pun ketau bahwa Yesus tengah bandai tentang Yohanes pembaptis. ¹⁴ Empak sidak pulang ahung kumpul uhang banyak iyak, alu datang meh suhang laki ahung Ia, bungkuk dadap Ia, alu bandai," ¹⁵ Tuhan, gauk meh dengan anak aku, ia gila babi, saja abis pemedih. Kehena ia kalak jatuk kalam api atau kalam aik. ¹⁶ Aku udah ngemaik ia ahung padak muhid Nuan, tapi sidak nda nyahuk nyembuh ia." ¹⁷ Yesus nyaut alu bandai,"Oi, angkatan yang nda pecayak seta yang jat ituk, apa pelamak lagik Aku ahus besama dengan nuan? Apa pelamak lagik Aku ahus ngetat pemedih besam dengan nuan? Baik meh anak iyak ahung Aku." ¹⁸ Yesus nyengka ia alu keluah meh ruh jat iyak dahi ia. Biak laki iyak alu sembuh sekini iyak ugak. ¹⁹ Padak muhid alu datang kuang Yesus, waktu sidak kedihik magang alu bandai,' Apa nacah kami nda talah ngusih ruh jat iyak keluah?" ²⁰ Yesus nyaut sidak," Iyak empadai nuan kuhang pecayak. ²¹ Sesungguh iya Aku bandai ahung nuan, entik nuan bisik iman walau sebesah igik ensawi magang, nuan tau bandai ahung gunung ituk, pindah dahi ahung ituk kiun, gunung ituk pun pindah, nda bisik yang nda masuk akal bagi nuan. ²² Sementaha sidak diam di Galilea, Yesus bandai ahung padak muhid Ia," Anak Mensia jekak di enjuk kalam tangan uhang-uhang, ²³ sidak pun jekak munuh Ia, alu pada ahi ketiga Ia dibangkit." Padak muhid alu jadi sedih. ²⁴ Seta Yesus dengan pada muhid Ia datang di Kapernaum, datang meh suhang penagih pajak kuang Petrus alu bandai," Udah nda guhu nuan mayah pajak setengah syikal?" ²⁵ Petrus nyaut," Auk." Tapi seta Petrus tamak kehumah, Yesus bandai ahung ia lebih duluk, jekuk Ia," Apa pendapat nuan Simon? dahi sepa meh haja-haja di dunia ituk nehimak pajak atau upeti? dahi hakyat atau dahi uhang asing?" ²⁶ Jekuk Perus," dahi uhang asing," Yesus bandai ahung ia," Kalau baka iyak hakyat nda mayah pajak. ²⁷ Tapi sepaya kita nda nyuhuh penagih pajak iyak bedosa, angkat meh ke laut, tikam meh kail, alu tahit meh ikan yang duluk nuan tangkap. Bukak mulut ikan iyak, nuan akan nemu sesyikal. Baik alu behik ahung penagih pajak iyak untuk Aku dengan untuk nuan."