¹ Dudah kanak berpisah teng belaye'k ngan dah mayan, ² lalu dah kanak njumpa kapal neng yak mberang te Fenisia, kanak ka atu kapal ngen lalu belayar. ³ Waktu kanak dah mula ninget Siprus kerna kapal yak ndisah muatan iyek. ⁴ Dudah bejumpa ngan para murid, kanak tingel ka ngen sekitar ijok ari. Lalu, lewat Roh, belaye'k trus mingkat'n nasehat ka Paulus madak ayek katu ka Yerusalem. ⁵ Waktu kanak ka ngen dah abis, kanak lalu berangket nglanjut pemayan kanak. Belaye'k berabis, suwek ngan anak'a, ngantet kanak sampe iteng ka luar kota. Lalu dah belutut ka pantai ngan bedoa, ⁶ kanak pamit antara neng inyek ngan neng lain. Lalu, kanak ka atu kapal smentara belaye'k urik agik ka diyo. ⁷ Dudah kanak ngkabis pemayan teng Tirus, kanak iteng ka Ptolemais, lalu kanak nyapa dingan-dingan neng seiman, lalu tingel ngan belaye'k skitar inyek ari. ⁸ Ari jak lep'm, kanak berangket lalu mayan te Kaisarea, lalu diam ngan iyek. ⁹ Iyek adek empat na angot perawan neng bernubuat. ¹⁰ Sementara kanak diam ka ngen sampe kida-kida ari, nyeorang nabi neng beginan Agabus disah teng Yudea. ¹¹ lalu dah ngagak kanak, iyek ngaok tali pinggang Paulus lalu ngkebet baring ngan kajak dadep, lalu muah, "Hak lah neng Roh Kudus muah,' Ngan cara hak belana Yahudi ka Yerusalem neng yak ngkebet na neng bisi tali pinggang hak lalu nyerah iyek ka baring bangsa-bangsa neng lain. ¹² Waktu kanak ndingah hal hak, kanak ngan belana neng diam ka ngen mai ka Paulus biar ayek sampe ka Yerusalem. ¹³ Lalu, Paulus nyaut, "Ani neng kunak dako muat, mungsek, lalu ngancur ate ken? Kerna ken dah siap, uken't nyah tingkebet jati, tapi nyah kubes ka Yerusalem demi ginan Tuhan Yesus.' ¹⁴ Lalu, kerna Paulus iyek bisa madak yakin, kanak diam lalu muah, " Biar kemaok Tuhan neng jaji'i." ¹⁵ Dudah ari-ari ngen, kanak siap-siap yak berangket ka Yerusalem. ¹⁶ Adek murid teng Kaisarea nunek mayan kerajah ngan kanak, sambel mebet'n kanak ka diyo Manason, na Siprus, iyek ngen murid neng pertama, ka diyo iyek kanak yak singgah. ¹⁷ Dudah kanak iteng ka Yerusalem, dingan-dingan neng nyeiman nyamut kanak ngan suka cita. ¹⁸ Lalu, hari jak lep'm, Paulus mayan ngan kanak ngagak Yakobus, lalu berabis penatua iteng. ¹⁹ Dudah nyampe salam ka belaye'k, Paulus mula bekisah beberapa hal neng dah Allah ngerja ka antara bangsa-bangsa lain lewat pelayanan Iyek. ²⁰ Waktu belaye'k ndingah laba ngen, belaye'k lalu memuji Allah. Belaye'k ngomong ka iyek, "Tingetlah, dingan, kida ribu na ka antara belana Yahudi ka ngaun neng jaji percaya lalu belaye'k berabis rajin ngan Hukum Taurat, ²¹ belaye'k dah kunak mingkat'n pengertian tentang dako, bahwa ko ngajei berabis na Yahudi neng. udip ka antara belana neng uken't Yahudi madak ningel Musa, ngan ayek nyunat anak-anak belaye'k ngan usah nunek tradisi-tradisi neng dah tegel. ²² Lalu, ani neng harus kanak muat? Belaye'k pasti ndingah bahwa ko dah iteng. ²³ Kerna ngen, muatlah ani neng kanak muah hak ka ko. Adek belana berempat teng kanak neng adek ka panak nazar, ²⁴ Tebet'n belaye'k lalu ti nyuci badan ko kerajah ngan belaye'k. Sangak jengen, berabis na taman bahwa omong kosong, tentang laba neng tlah kunak muah ka belaye'k tentang ko, tapi ko ngak udip nurut Hukum Taurat. ²⁵ Cuma, tentang bangsa-bangsa lain neng jaji percaya, kanak dah nulis suret lalu mutus bahwa belaye'k arus ngindar teng, 'daging neng dah kunak mpersembah ka berhala-berhala, ngan teng darak, lalu ngan ani neng dudah kunak nyekek, lalu teng dosa-dosa seksual." ²⁶ Lalu, Paulus mebet'n belana ngen, pas ari berikut, dudah iyek nyuci badan ngan belaye'k, iyek meyeh ka diyeb Bait Allah lalu mingkat'n pengertian tentang masa penyucian. ²⁷ Pas ampir genap ijok ari, belana Yahudi teng Asia, dah ninget Paulus ka diyeb Bait Allah, ngasut na udah nyah nakap Paulus, ²⁸ sambel ngampak, "He na Israel, tolong! Na hak neng ngajei na ka pe-pe nyah madak nglawan bangsa nak, Hukum Taurat, ngan badah hak. Lalu lebih agik, iyek malah mebet'n belana Yunani ka diyeb Bait Allah ngan dah madak najis badah suci hak!" ²⁹ Sebab sbelum hak, belaye'k dah ninget Trofimus, na teng Efesus, bersama ngan iyek ka diyeb kota lalu belaye'k ngira Paulus dah mebet'n iyek meyeh ka diyeb Bait Allah. ³⁰ Lalu, berabis kota jaji heroh belana iteng bergerombol. Belaye'k nakap Paulus lalu nyeret keluwei teng Bait Allah, lalu lawang-lawang Bait Allah segra kunak nutup. ³¹ Smentara belaye'k brusaha yak ngumes iyek, lalu iteng laporan ka kpala pasukan Roma bahwa berabis wilayah Yerusalem agik ka diyeb kekacauan. ³² Waktu ngen ngak, iyek mebet'n para praJurit ngan para perwira, lalu berdedes disah ka belaye'k. Waktu belana neng udah ngen ninget kpala pasukan ngan para prajurit, belaye'k berenti melasah Paulus. ³³ Dah ngen, kpala pasukan ngagak jeket Paulus lalu nakap iyek, kpala pasukan mingkat'n printah madak Paulus tingkebet ngan due rantai. Lalu iyek mula besikat'n asi Paulus, lalu ani neng tlah kunak iyek muat. ³⁴ Tapi, sebagian na neng udah ngen ngampak laba ngan sebagian neng lain. Waktu iyek ayek dapet naman ngan pasti kerna kerusuhan ngen, iyek mingkat'n printah madak mebet'n Paulus te markas. ³⁵ Waktu iyek iteng ka jakat, Paulus dah arus tinandu ngan para prajurit kerna kenaya belana neng udah. ³⁶ Lalu, na neng udah ngen trus nunek kapu belaye'k, sambel ngampak, "Ti ngumes iyek!". ³⁷ Sementara Paulus kunak mebet'n ka diyeb markas, Paulus ngucap ka kpala pasukan, "Dapetkah ken ngucap sesuatu ka ko?" Lalu, kpala pasukan ngen njawab, "Ko naman bahasa Yunani? ³⁸ Sangak jengen, ko uken't na Mesir neng mino adek muat pemberontakan ngan mimpin empat ribu orang neng biasa ngumes na ka padang gurun?" ³⁹ Tapi, Paulus muah, "Ken hak na Yahudi teng Tarsus, Kilikia, seorang warga teng kota neng penting. Ken mohon, ijinkan ken ngomong ka na neng udah ngen." ⁴⁰ Lalu, waktu kpala pasukan mingkat'n ijin, Paulus tagetn ka jakat sambel mingkat'n isyarat ka belana ngan baring iyek. Lalu, waktu suasana dah jaji sangat teneng, iyek ngomong ka belaye'k ngan bahasa Ibrani, metek disak.