¹ Dah lepas kerusuhan ngen, Paulus ngundang para murid, dudah nguat ate belaye'k, iyek pamit ngan belana lalu mayan ka Makedonia. ² Dudah iyek nelusur daerah la ngen ngan mingkat'n nasihat ka belana udah, iyek iteng ka Yunani. ³ Ka ngen Paulus diam sekitar taru buran't. Kerna na Yahudi muat sekongkol nyah nglawan iyek pas iyek yak belayar ka Siria, iyek ngaok kepetesan malik kewat Makedonia. ⁴ Paulus kunak Sopater teng Berea ngawan, anak Pirus, oleh Aristarkhus ngan Sekundus, teng Tesalonika, ngan Gayus teng Derbe, ngan Timotius, lalu Tikhikus ngan Trofimus teng Asia. ⁵ Belaye'k dulu berangket lalu nunggu kanak ka Troas, ⁶ cuman kanak belayar teng Filipi dah Hari Raya Roti Iyek Beragi, lalu iteng jumpa belaye'k ka Troas pas lima ari, ka ngen kanak diam sekitar ijok ari. ⁷ Pas ari pertama, waktu kanak kumpui berudah sambel mitah-mitah roti, Paulus ngomong ka belana kerna yak berniat berangket pas hari neng ka adap agik, jaji iyek tetap ngomong sampe tudek ngarep. ⁸ Udah lampu ka ruang atu, badah kanak ngumpul. ⁹ Lalu ka ngen adek na angot arai neng beginan Eutikhus agik ijuk jeket longop lelek ka diyeb bes ngen. Sementara Paulus trus ngomong ka diyeb waktu neng tegel, iyek makin teleb ka diyeb bes ngen lalu manah teng lante ketaru lalu kunak ngangket tapi dah kubes. ¹⁰ Tapi Paulus disah lalu ngruwet dadep ka tumung iyek, ngan ngapang, iyek metek, "Usah ingei kerna pengangsek iyek masih adek ka diyeb iyek." ¹¹ Waktu Paulus ka atu agik, lalu mitah-mitah roti langsung kunak uman, iyek ngomong ka belana ka diyeb waktu neng tegel, sampe subuh. Dudah ngen, iyek. berangket. ¹² Belaye'k mebet'n na angot arai ngen urek udip lalu belaye'k merasa sangat awan ate. ¹³ Tapi dudah mayan dulu ka kapal, kanak belayar ka Asos yak njemput Paulus ka ngen kerna iyek dah ngrencana jengen, iyek ka dadep yak berniat bo te ngun ngan mayan kajak. ¹⁴ Waktu iyek bejumpa ngan kanak ka Asos, kanak njemput iyek, lalu mayan te Metilene. ¹⁵ Dudah belayar teng ka ngen, jak lep'm kanak iteng ka Khios. Ari ka adap, kanak dah jeket Samos, lalu pas nye ari kanak iteng ka Miletus. ¹⁶ Kerna Paulus dah mutus yak belayar lewat Efesus biar iyek ayek ngabis waktu ka Asia kerna iyek yak gopoh it ka Yerusalem, sangak bisa, pas ari Pentakosta. ¹⁷ Teng Miletus, Paulus ngutus na te Efesus lalu madak para penatua jemaat iteng ka iyek. ¹⁸ Waktu belaye'k iteng ka iyek, iyek ngomong ka belana, "Ko dadep pun naman, kuna ken udip ka antara dako tiap ari, mula ari pertama ken napok kajak ka Asia, ¹⁹ sambel nglayan Tuhan ngan kerendahan ate ken, lalu ngan ijok betek, lewat pencobaan-pencobaan, neng nimpak ken lewat sekongkol na Yahudi, ²⁰ kuna ken ayek nahan diri nyah nyiar ka dako ani laba neng berguna nyah ngajei dako ka adap na udah teng diyo neng inyek lalu ka diyo neng lain, ²¹ sunguh-sunguh mingkat'n kesaksian, bait ka na Yahudi maupun belana teng Yunani, tentang pertobatan ka Allah ngan beriman ka Tuhan anak, Yesus Kristus. ²² Hak tingetlah, tingkebet ngan Roh, ken agik mayan ka Yerusalem, ayab arti ani neng yak aboh ka ken ka ngaun, ²³ kecuali Roh Kudus besaksi ngan sunguh-sunguh ka tiap kota ka ken, bahwa penjara ngan siksaan dah nganti ken. ²⁴ Tapi ken ayek nganggap udip ken beraga nyah ken ka dadep shingga ken dapet nyelesai tugas ken ngan pelayanan neng ken nerima teng Tuhan Yesus, nyah besaksi ngan sunguh-sunguh tentang Injil anugrah Allah. ²⁵ Tinget lah, ken taman bahwa aja ka antara dako, neng nyah ko ken mayan-mayan nyiar berita kerajaan, yak ninget bas ken agik. ²⁶ Kerna ngen, ken besaksi ka ko bahwa ken ayek bersalah kerna darak ko berabis. ²⁷ Kerna ken ayek nahan diri nyah nyiar berita hak ka ko tentang berabis rencana Allah. ²⁸ Ti njaga badan ko ka dadep ngan berabis kawan ko. ²⁹ Ken taman bahwa keberangkatan ken, serigala-serigala neng garang yak iteng ka antara dako, iyek kaseh ka kawan dako berabis ngen. ³⁰ Lalu ka antara dako ka dadep yak bangkit belana neng ngucap tentang hal-hal neng sesat nyah narik murid-murid teng belaye'k. ³¹ Kerna ngen, jaga-jaga keh, sambel ngingat bahwa nyawa ngarep, sampe taru sawak, ken ayek berenti mperingat dako masing-masing ngan ijok betek. ³² Nusa'a, ken nyerah ko ka Tuhan ngan ka firman anugrah- Iyek neng sanggup nge'yek ko ngan mingkat'n ko warisan ka antara berabis na neng kunak ngkudus. ³³ Ken ayek aus perak, ato emas, ato pake asi-asi pun. ³⁴ Ko ka dadep ngak taman bahwa baring hak ngelayan keperluan ken ngan belaye'k neng besama-sama ngan ken. ³⁵ Ka diyeb sgala hal, ken dah ntijok ka ko bahwa ngan kerja keras ngan cara hak, nak harus nolong neng lamah ngan ngingat perkataan Tuhan Yesus, bahwa Iyek ka dadep ngucap, 'Lebeh bahagia mingkat'n daripada nerima'k." ³⁶ Waktu iyek dah muah hal-hal ngen, iyek belutut ngan bedoa ngan belaye'k berabis. ³⁷ Lalu, adek udah na mungsek ka antara belaye'k berabis lalu belaye'k ngapang keranan Paulus, ngan munuk iyek, ³⁸ belaye'k sangat sedeh, terutama kerna laba neng kunak iyek metek bahwa belaye'k ayek mungkin ninget bas iyek agik. Lalu, belaye'k ngawan Paulus te kapal.