¹ Waktu ngen adek jemaat Anthiokia, nabi-nabi ngan guru-guru, neng beginan Barnabas, Simeon neng kunak metek Niger, Lukius teng Kirene, Menahem neng kunak miara sampe ayuk ngan Herodes, raja wilayah, ngan Saulus. ² Waktu belana agik ibadah ka Tuhan ngan berpuasa, Roh Kudus metek, "Khususkanlah bagi Ken Barnabas ngan Saulus nyah tugas ngen Ken nyaru belaye'k." ³ Lalu dudah puasa ngan berdoa, ngan napok baring belaye'k ka tumung Barnabas ngan Saulus. Belaye'k ngutus na beduek mayan. ⁴ Maka dudah tingutus mayan oleh Roh Kudus, Barnabas ngan Saulus disah ka Seleukia, teng ngen belaye'k berlayar ka Siprus. ⁵ Waktu belaye'k iteng ka Salamis, belaye'k nyebar firman Allah ka sinagoge-sinagoge na Yahudi, lalu belaye'k mebet'n Yohanes nyah jaji pelayan. ⁶ Waktu belaye'k mayan nyusur nyeisi pulau sampai iteng ka Pafos, belaye'k njumpa nyeorang tukang sihir, nyeorang nabi palsu Yahudi, neng beginan Baryesus. ⁷ Iyek bersama ngan Prokonsul Sergius Paulus, na neng cerdas, neng mai Barnabas ngan Saulus iteng ka iyek aus ndingah firman Allah. ⁸ Tapi Elimas, tukang sihir ngen, kerna jengenlah ginan iyek kunak nerjemah, nentang Barnabas ngan Saulus, lalu brusaha mbelok Prokonsul teng iman iyek. ⁹ Cuma Saulus neng juga tingenal sbagai Paulus, penok ngan Roh Kudus, ninget Elimas, ¹⁰ ngan metek," Hei ko, neng penok ngan sgala tipu daya ngan sgala kejahatan, ko ngen anak Iblis, ko ngen musuh teng sgala laba neng benei. Ko ayek pernah berenti mbelok teng jarant Tuhan neng bojor kan? ¹¹ Hak nen, tinget lah, baring Tuhan iteng ka tumung ko ngan ko jak jaji buta ngan iyek bisa ninget betek hari sampe kida-kida ari." Sbentar lalu amutn ngan petek kelap disah ka tumung iyek lalu iyek mayan berputar ngajo na nyah nguluk baring iyek. ¹² Lalu Prokonsul ngen jaji percaya waktu ninget ani neng dudah jaji kerna iyek ncengang ngan ajaran Tuhan. ¹³ Waktu ngen, Paulus ngan belana neng berlayar teng Pafos sampe iteng ka Perga, ka Pamfilia, tapi Yohanes ningel belaye'k lalu urek ka Yerusalem. ¹⁴ Cuma, Saulus ngan Barnabas nglanjut pemayant teng Perga, lalu iteng ka Anthiokia, ka Pisidia. Pas ari Sabat, belaye'k mayan ka sinagoge lalu ijuk ka ngen. ¹⁵ Dah mbaca Hukum Taurat ngan kitab para nabi, kepala-kepala sinagoge madak na muah ka kedue beles rasul ngen, "Dingan berabis, pama ko adek mempunyai kata penghibur nyah belana hak , tuah keh." ¹⁶ Lalu Paulus tagetn mingkat'n tanda ngan baring iyek lalu muah," Hai na teng Israel ngan ko neng bot ngan Allah, tingah lah! ¹⁷ Allah bangsa Israel hak dudah mulik apet uyang nak ngan ninggi drajat bangsa nak slama belaye'k diam ka tana Mesir lalu ngan baring neng kerangket, iyek mimpin belaye'k keluwei teng ngen. ¹⁸ Dah skitar mpat mporok sawak, iyek sabar ngan prilaku belaye'k ka padang rimbak. ¹⁹ Dudah iyek ngumes ijok bangsa ka tana Kanaan, iyek waris tana ngen. ²⁰ Laba ngen terjadi skitar mpat ratus lima mporok sawak. Dudah berabis hal ngen, Allah mingkat'n belaye'k para hakim sampe ka masa Nabi Samuel. ²¹ Lalu belaye'k mai nyeorang raja, lalu Allah mingkat'n belaye'k Saul, nak arai Kish, na teng suku Benyamin, sampe mpat porok sawak. ²² Dudah Allah nyingkir Saul, Allah mbangkit Daud nyah jaji raja belaye'k, Allah dudah bersaksi lalu metek, "Ken dah jumpa Daud, nak arai Isai, na neng cocok ka ate Ken, neng yak ngerja berabis kemaok Ken.' ²³ Teng keturun na hak, Allah, sesuai ngan janji Iyek, mebet'n ka Israel nyeorang Juruselamat, neng ngen Yesus. ²⁴ Waktu Yesus iyeb iteng, Yohanes sebelum dudah nyebar brita tentang baptisan pertobatan ka berabis na Israel. ²⁵ Waktu Yohanes agik ngkabis tugas iyek, iyek metek,"Ko ngira asi ken hak? Ken uken't Iyek, Tapi Tingetlah, adek nyeorang yak iteng dudah ken jak, nglepas sendal ka kajak Iyek pun ken ayek patut.' ²⁶ Dingan-dingan, keturunt kluarga Abraham ngan belana neng adek ka antara dako neng bot ngan Allah, ka anak brita keselamatan ngen dudah kunak nyampe. ²⁷ Sebab, belaye'k neng diam ka Yerusalem ngan para pemimpin belaye'k, neng ayek kenal ngan Iyek ngan ayek paham neng kunak nabi ngucap, neng kunak mbaca tiap hari Sabat, dudah nggenap neng kunak nabi ngucap ngen ngan ngukum Yesus. ²⁸ Biar belaye'k ayek njumpa alasan ani-ani pun nyah ngukum mati, belaye'k mai Pilatus madak ngumes Iyek. ²⁹ Waktu belaye'k nggenap berabis ani neng kunak nulis tentang Iyek, belaye'k ndisah Iyek ngen teng kayu salib lalu ngguring Iyek di ka diyeb kubur. ³⁰ Tapi Allah mbangkit Iyek teng belana udah neng dah kubes, ³¹ berhari-ari, Yesus nyulak dadep ka belana neng ngan Iyek teng Galilea iteng ka Yerusalem, neng nusa'a jaji saksi-saksi Iyek nyah bangsa hak. ³² Kanak mebet'n Kabar Bait nyah dako tentang janji Allah ka apet uyang nak, ³³ kerna Allah dah nepat janji ngen nyah anak, belangot belaye'k, ngan mbangkit Yesus, jiji adek tinulis ka kitab Mazmur pasal due: 'Ko ngen Anak-Ken. Hari hak, Ken dah jaji Bapa-Ko.' ³⁴ Tentang Allah neng mbangkit Yesus ka antara na kubes neng udah, ayek agik urek ka kebinasaan, Allah dah metek, 'Ken yak mingkat'n ka ko berkat neng kudus ngan dapet kunak mercaya, neng kunak mingkat'n ka Daud'. ³⁵ Ngen lah sebab, Iyek metek ka Mazmur neng lain, " Ko iyek mungkin mbiar Na Kudus-Ko ninget kebinasaan'. ³⁶ Dudah Daud nglayan generasi iyek kerna kemao Allah, iyek lalu kubes, kunak nglamun ka antara apet uyang iyek, ³⁷ Cuman Yesus neng Allah mbangkit iyek ka antara na neng kubes, ayek ninget kebinasaan. ³⁸ Kerna ngen, biarlah dako taman, Dingan-dingan, lalu teng Iyek lah pengampunan dosa-dosa kunak metek ka ko, ³⁹ ngan lalu Iyek lah, na neng percayak kunak mbebas teng laba ani-ani, neng teng Iyek ko iyek dapet mbebas ngan Hukum Taurat Musa. ⁴⁰ Jaji, ati-atilah biar neng kunak metek ka diyeb kitab para nabi iyek terjadi ka ko: ⁴¹ Tingetlah, hai na neng galak ngekek! Terkejet ngan binasalah, kerna Ken muat kerja hak ka zaman ko, adek kerja neng ayek ko yak percaya, biar adek na njelas ka ko. ⁴² Sementara Paulus ngan Barnabas keluwei, belana mai mohon agar belaye'k nyampe firman ngen pas hari Sabat ka adap jak. ⁴³ Duda pertemuan ka sinagoge ngen slesai, udah na Yahudi ngan na proselit neng bot ngan Tuhan lalu nunek Paulus ngan Barnabas, neng ngomong ka belaye'k ngan ndorong belaye'k madak trus tingel ka diyeb anugrah Allah. ⁴⁴ Pas hari Sabat neng ka adap, hamper berabis na kumpui yak ndingah firman Tuhan. ⁴⁵ Tapi pas belana Yahudi ninget kerame ngen, belaye'k penok ngan iri ate ngan mula nentang ani neng kunak Paulus metek sambel ngujat. ⁴⁶ Lalu, Paulus ngan Barnabas nyaut ngan brani sambel metek, "Hal hak penting bahwa firman Allah seharus kunak nyampe ka ko dulu. Kerna ko nulek ngan nganggap ko iyek patut bisi udip neng kekal, tingetlah, kanak ngalek buken't ka bangsa -bangsa neng lain. ⁴⁷ Kerna, disak Tuhan mingkat'n perintah ka kanak: 'Ken ndah njaji ko terang nyah bangsa -bangsa neng lain biar ko dapet mebet'n keselamatan sampe iteng ka ujung bumi." ⁴⁸ Waktu belana neng uken't Yahudi ngen ndingah hal hak, belaye'k awan ate ngan memuliakan firman Tuhan. Sekudah neng tlah kunak nentu nyah udip neng kekal, jaji percaya. ⁴⁹ Lalu firman Tuhan nyebar ka berabis wilayah ngen. ⁵⁰ Tapi, belana Yahudi ngasut nana-nana taat neng tingi deraja't ngan belana neng penting ka kota, lalu mbangkit kenaya ka Paulus ngan Barnabas, lalu ngusir na beduek ngen keluwei teng daerah perbatasan belaye'k. ⁵¹ Tapi, sambel ngibas dabu teng kajak belaye'k nyah belana Yahudi neng adek ka ngen, Paulus ngan Barnabas mayan ka Ikonium. ⁵² Lalu, para murid penok sukacita ngan Roh Kudus.