¹ Waktu ngen, para Rasul ngan dingan-dingan nyeiman neng adek ka Yudea ndingah bahwa belana neng uken't Yahudi dudah ngaik firman Allah. ² Kerna ngen, Petrus sampe ka Yerusalem, belana neng bersunat berselisih paham ngan iyek, ³ muah," Ko bo ngan belana neng iyek bersunat lalu uman ngan belaye'k". ⁴ Tapi Petrus mula njelas secara urut ka belaye'k, wana, ⁵ "Ken agik berdoa ka kota Yope, ngan keadaan yeb sadar, ken adek peninget, adek laba jiji nyelembar kain neng lebar disah ka panak, ngulur ke mpat siku'u teng ringit, laba'a tadi ngagak jeket ken. ⁶ Lalu ken mandang, ken ngkelek'e ngan ninget dak-dak berkajak mpat adek ka bumi, dak-dak liar, dak-dak ngrayep, ngan manuk-manuk ka atu. ⁷ Ken ndingah adek suara muah ka ken, 'Angket, Petrus, timaleh ngan inanlah!' ⁸ Cuma ken metek,' Ayek, Jubata. Sbab aja neng haram ato najis neng meyeh ka diyeb babak ken'. ⁹ Tapi suara ngen nyaut nyah ke duek sida teng ringit, 'Ani neng dudah Allah mbersih, usah dako nyesida-sida metek ngen haram!' ¹⁰ Hal hak sampe ngulang taru sida, lalu berabis laba ngen kunak narik agik ka ringit. ¹¹ Tinget, hak a nen't, adek na bertaru neng kunak ngutus iteng ka ken, ka badah ken, teng Kaisarea. ¹² Lalu Roh muah ka ken madak mayan ngan belaye'k tanpa ragu agik. Berenum dingan nyeiman hak, mayan ngak ngan ken lalu kanak meyeh ka dio na ngen. ¹³ Iyek nyampe ka kanak, kuna iyek ninget malaikat tagetn ka dio ngen lalu metek,' Madaklah na te Yope lalu mailah ka Simon neng kunak nyebut Petrus iteng ka hak, ¹⁴ iyek yak muah pesen't ka ko, neng kerna pesen't ngen ko lalu kunak na nyelamat, ko ngan berabis na neng diam ka dio ko. ¹⁵ Waktu ngen ken mula metek laba, Roh Kudus disah ka tumung belaye'k, sama ngan neng dudah aboh ka kanak. ¹⁶ Lalu ken teringat Tuhan metek, waktu Iyek muah,' Yohanes mbaptis ngan pin't, tapi ken yak mbaptis ko ngan Roh Kudus.' ¹⁷ Jaji, misal Allah mingkat'n karunia neng sama ka belaye'k, sama jiji Iyek mingkat'n ngak ka anak, dudah nak percaya ka diyeb Tuhan Yesus Kristus, asi ken hak singga ken dapet ngalangi Allah? " ¹⁸ Waktu belaye'k ndingah hal neng jengen, belaye'k jaji tenang lalu muji Allah sambil metek, " Sangak jengen, Jubata galak ngak mingkat'n kurnia ka belaye'k neng uken't Yahudi betobat neng nuju ka udip." ¹⁹ Lalu belana neng kancai biyai kerna nganiaya neng aboh ka Stefanus, nyebar sampe iteng ka Fenesia, Siprus, ngan Anthiokia, ayek nyebar firman Tuhan ka asi-asi pun, kecuali ka belana Yahudi. ²⁰ Cuma adek inyek due orang teng belaye'k, ngen belana teng Siprus ngan Kirene, neng iteng ka Anthiokia lalu ngomong ka belana Helenis, sambil nyebar brita tentang Tuhan Yesus. ²¹ Baring Jubata nguluk belaye'k, berudah na neng jaji percaya lalu malik ka Tuhan. ²² Brita teng belaye'k iteng ka keringek jemaat ka Yerusalem, belaye'k madak Barnabas ka Anthiokia. ²³ Waktu Barnabas iteng ngan ninget kasih kurnia Allah, iyek bergembira ngan mingkat'n nasihat ka belaye'k berabis madak tetap setia ka Tuhan ngan ati neng tabah. ²⁴ Kerna Barnabas ngen na neng bait, penok ngan Roh Kudus ngan iman, belana neng berudah kunak mebet'n ngadap ka Jubata. ²⁵ Lalu Barnabas mayan ka Tarsus nyah ngajo Saulus. ²⁶ Dudah iyek jumpa, iyek meben't iyek ngen ka Anthiokia. Nyesawa belaye'k bejumpa ngan jemaat lalu ngajeir na udah. Ka Anthiokia, murid-murid ngen nyah pertama kali kuna metek "orang Kristen". ²⁷ Waktu ari ngen, due taru nabi disah teng Yerusalem iteng ka Anthiokia. ²⁸ Adek na nyeorang teng belaye'k beginan Agabus, tagetn lalu ngramal ngan pertolongan Roh neng ngira yak adek kelaparan neng hebat ka sluruh dunia. Kelaparan ngen waktu masa pemerintahan Klaudius. ²⁹ Lalu para murid metes madak ngirim sumbangan, sesuai ngan kemampuan belaye'k masing-masing, ka dingan seiman neng diam ka Yudea. ³⁰ Lalu belaye'k ngirim sumbangan ngen ka para penatua lewat baring Barnabas ngan Saulus.