¹ She Pablo, haereka Timoteo Hesukristo jokuevare, mbyparahashu kuatia Hesu ryhevare ẽvã Filipope, tupaope mĩñaka'iare haereka mboryreare. ² Ñanderu Tumpa haereka Ñandeja Hesukristo, tiñohẽ pyndyrehe mbaikavi hãndi pya symyĩkue. ³ Shymandua ãĩ pyndyreherã shyrory ãĩ Ñanderu Tumpa hỹnonde. ⁴ Hãmã airurema ãĩ pyndyreherã, vy'ape ajapo. ⁵ Ñamba'apo rãnga jai Ñẽẽ kaviva ñambeu jairã, jypyite ñañepyrõva arape, ã'ẽ peve. ⁶ She airoja aĩhe Ñanderu Tumpa õñepyrõ mbai haikaviva japo pyndyreherã, japove teripo oho Hesukristo oujy peve. ⁷ Kỹrã opaiteva shymandua pyndyrehe, shara apyryreko shypyape haereka aĩme aĩ peresoperã ti mburuvishare hỹnonde pee shimi'ĩrũpi pyndy Espiritupe, ambeu kavi verã Ñanderu Tumpa ĩñeẽ haereka tãtãngãtu aĩ verã Ñanderu Tumpa jyhaihupe. ⁸ Ñanderu Tumpa rãnga kuaa marãra opaiteva she apyryhaihu, Hesukristo pyryraihu rupii rãnga ñono shypyape apyryhaihu verã. ⁹ Hãrã shiñymboipe airure pyrekove verã jyhaihu, hãndi Tumpa tymeẽpe mbaikuaakue haereka arãndu, ¹⁰ piko verã haikavivevape, kỹrãra pikopo pyndyreko kyambape haereka mba'etypo mbai porãmba he'ia pyndyrehe verã Kristo jy'arape. ¹¹ Pee rãnga pyrahapo tynyhẽ pepope mbaikavi pijapova Hesukristo rupii, jyryhory haereka õñemombai vasushu verã Ñanderu Tumpa. ¹² Shyryvyre, aipota pikuaa kova mbai jehusheva haikavive jyve Ñẽẽ kaviva ryheva mbe'ua verã. ¹³ Opaite syndarore ẽvã mburuvisha vasu hoope, kuaa reta she ãĩme'ãĩ peresope Hesukristo ahaihurã. ¹⁴ Hãrã voka mykỹrẽỹ opaite shyryvyre mbeu verã Ñanderu Tumpa ĩñẽẽ, kyjembape haereka jyrojakue ryheve Ñanderu Tumpare. ¹⁵ Ãñẽte ĩmẽ'ẽjy mbeu'ia Kristo ĩñẽẽ ryheva, pya poshy'ẽ she rãmeĩ haereka shyreshatã ñynoirã, tẽvã ĩmẽ'ẽjy mbeu'ia ãẽte jyrojarã. ¹⁶ Ĩmẽ'ẽ mbeuva Kristo ĩñẽẽ ryheva shy raihurã, shara kuakavi Ñanderu Tumpa shiñono kopeva aĩnjetahe verã Ñẽẽ kaviva. ¹⁷ Ỹngava retany mbeu Kristo ĩñẽẽ ryheva pya porãmba'õ ryheve, haereka pota ha e paite irã. Shara pota haire shy pya mbyvya aĩteve ñynoi ko peresope aĩme aĩrã. ¹⁸ Tẽvã mba'eã she. Hãrã kỹrã ẽrã ti kỹrã tẽvẽrã, ãẽtembape ti ãẽtẽĩ tea pera Kristo ĩñẽẽ ryheva mbe uaraĩ vive she shy mbyvyama. Hama shy mbyvyave teripo oho. ¹⁹ Hama aikua aĩ ãhẽ kavipo kovaivirã, shara pee pirure pẽĩ shy rehe, haereka Hesukristo Espiritu Santo shy mbory rupii ãhẽpo peresoivi. ²⁰ Vokava rãnga hai ãhãrõ aĩvã, hãrã mbaiva peãpo ãñy mymarãnka, koñei pya vasupe ambeu Kristo ĩñẽẽ jepi ajaposea raĩmi, tyhesha shyrehe kuaretare ko Kristo mbai vasuva, jaishu aiko terirã ti amano marã. ²¹ She pe verã Hesukristo ñoĩpo shy rykovepe, hãma amano marã haikavi tevepo shekui. ²² Kỹrãra, aiko teri ko shy rete perã, katupo amba'apo kavi teri ko yvy ĩãrẽ Kristo pevarã, aikũã rãmeĩ rãnga marãvara apyhỹrõpo. ²³ Mõkue maĩ nunga sho py: Shy kyrẽy amanojy aĩme hãndi verã Kristo, vokava hai haikaviveva; ²⁴ tẽvã, tekotevẽ aikovejy pyndy rehevape. ²⁵ Haipe iakua aĩve teri verã pene ndie apyrỹ mbory verã, pupũ ã haereka pyvy a verã piroja vapy. ²⁶ Katu pemombai vasu verã Kristo Hesupe, hãrã she rupii pyvy a vepo Kristo ryheva peva. ²⁷ Peñehã ã piko iko verã reta raĩmi jyroja iva Kristo Ñẽẽ kavivare. Aharã apyryhesha verã, ti mbyrytẽ aikova, tahendu tãnta piko jipiveva pẽnteva pyapeĩ vokava ñyhã ã Ñanderu Ñẽẽ kaviva mbe uha verã. ²⁸ Haereka avy pykyje mba vaivi voka pyndy rehe oñemoĩ ivaivi, vokava rãnga ijeshaka kavi haire oñehũndiva, hãrã pee katy peho jepema, haima vokava ou Ñanderu Tumpaivi. ²⁹ Pee rãnga me ẽha pe ha eã piroja veraĩ Kristore, pyhasa asy verã katy jyve pyhaihurã. ³⁰ Pee haere she rãnga ñaime ñai pẽnteva jepy apypeĩ, voka pee pyheshama vekua shy rehe hãrã ã'ẽ pyhendu kỹraĩ aĩ jyva peresope.