¹ Shy ryvyre, ime ẽ oava pyny mbytepe mbai porãmbaperã, pee pikova Espiritu Santo potava raĩmi pymboryshu puãjy verã. Tẽvã pijapo pyakavi ryheve, hãrã pepentẽĩ pingareko ijehe mahẽ peeave peajy vekui mbai porãmbape. ² Piñymbory katu pyraha verã mbai pohy peeva, kỹrã opapo pijapo peho Kristo ĩñeẽ. ³ Ĩmẽ'ẽ pyny mbytepe moa hai mbai vasuvarã, tẽvã mba'erã irã, ijupi ñymbytavy. ⁴ Hãrã pepenteĩpo maĩ ijehe hykovere, ñandu ijehe iko hekope kavirã, ha ẽ ãpo ñimbivachehe verã ỹngavare. ⁵ Shara Ñanderu Tumpa hỹnonde pepenteĩpo raha mbai japova ha ei ña ãpova. ⁶ Opaite heko mboeava ko ñeẽ haikaviva ryhevape, mbijaopo jyveshu mboirea opaite hipityva. ⁷ Avy pei piñymbytavy: Mba'ety ñymby horyhe verã Ñanderu Tumpare. Opaite ñande ñañotyva, ñandeipo ñamynõ jykui. ⁸ Kuaretare hykovepe ñoty mbai porãmba vekuarã, mbai porãmba vekuaivi mynõpo ñymano. Tẽvã ñoty Espiritu Santo pota varã, Espiritu Santoivi mynõpo tykove opamba verã. ⁹ Hãrã avy ñany kangy jajapo verã mbai haikaviva; hãrã ñanate ỹãrã vãhẽ pokui ara ñamyno verãpe. ¹⁰ Hãrã katu teri jajapo mbai haikaviva opava retare, tynonde ẽ ñandy ryvyre Hesukristo jyroja heare. ¹¹ Pymaihe kova marãra shepope tei ko ñeẽ marẽrẽỹ ambypara aĩpee kuatiape. ¹² Opaite pinimiñerã iare hãkue pichĩchĩnka verã, japo pota pyta kavi hãndi kuareta retarã haereka potã moñahã reta ñeẽ Kristo kurusu ryheva reherã. ¹³ Hãrã opaite hãkue chĩchĩnka vekuare, opa aĩtei japo jyve reta Moise mbypara vekua heiva raĩmi. Tẽvã haire pota peĩ hãkue pichĩnchĩnkashu, hei verã haire pyrãta, pee japo verã haire potava. ¹⁴ She ny katuã mbaivare airoja ai shi jehe, Hesukristo kurusu rẽĩ rãnga. Shara Hesukristo kurusure mano rupii, she pevarã ko yvy manoma, hãrã she amanoma jyve ko yvy pevarã. ¹⁵ Ñañymy pẽnte hãndi Hesukristorã, mba'eã he'ise ñande hãkue chĩnchĩãra ti mba'etyra; kõñei haikaviva hai ñande jareko verã tykove py'ahuva. ¹⁶ Tyreko pya symyĩ haereka jypareko opaite ikova ko ñeẽ heiva raĩmi, opaite tẽnta Israel hãndi Ñanderu Tumpa ryhevare. ¹⁷ Ã'ẽ vaĩ aipota veamapo mbava ñonokui shy raperãpe mbai porãmba, shara ĩmẽ area mby pereava shy retere, heshaka she haiva Ñanderu Hesu jokuerea. ¹⁸ Shy ryvyre, Ñanderu Tumpa opaiteva tiñohẽ pyrehe, mbaikavikue. Amen.