¹ She, Simon Pedro Hesukristo jokueva haere mõndaova, ambypara ko kuatia ñee, pee piroja kavimava ore jyrojaha va rãimi Ñanderu Tumpa haere ñanymondo jepe iva Hesukristo heko kavi rupĩ. ² Airure Ñanderu Tumpape hai mãĩ kavi pyrehe verã jehovasa haere pya vapy pikuarã Ñanderu Tumpa haere Ñanderu Hesukristope. ³ Ñanderu Tumpa mẽ ñande hay ñymbaikatu rupii opava mãinunga jaiko tẽveva jaiko terirã hãrã, jahaihushu verã hekope kavi Ñanderu Tumpa. Jaikuaa ñanyrẽnova hĩmbipekuepe´Gloria haere mãĩnunga heshahava milagro. ⁴ Vokava rupii mẽ ẽha ñande, ñee mẽ ẽha´Promesa kapyry haere tyvishavajy,pee pyheja verã yvy ĩãrẽ õ tyroo potava põrãmbaivi, opa myporãmba yvy ĩãrẽ õvare hykove, ⁵ Haipe peñe hã pimĩ ĩrũ voka pindijy roja teko kavi hãndi, hara pyndy reko kavikue tupũã toho jipive. ⁶ Hamã pyndy reko kavi ijijoko kuaava hãndi, pijijokuava ñaharo kaviva hara ñyharo kaviva jyhaihu Ñanderu Tumpa hãndi. ⁷ Pee Tumpa pyhaihuva piko kavi jipive vokaa piko kavi jyhaihu hãndi. ⁸ Pee imepyre kova mãinunga heta hetave pyndy pyrã pikua reiva rãimi veama Ñanderu Tumpa Hesukristope. ⁹ Kova mba'ety reva hainy hesambava haere hesha kavimba kuvãĩpiva, mbyry mba ẽ shivai katu hesha, hara sarehe ñymbai porãmba japovekua heja reishu vekuaivi. ¹⁰ hara shyryvyre peñehaa pypyta tantapei Ñanderu Tumpa rãnga pyny rẽno haere pynypyhyro vape, hara kyraa pijaporã pe ããpo mbai porãmbape. ¹¹ Kyrãrã Ñanderu Tumpa katu pynymyvãhe verã haere horype Ñanderu ñanymondo jepe iva Hesukristo éévape, himbipe opambaverape. ¹² Harã apyrymy mãndua ñoi kova mãinungare opamatẽ pikuava tantamatẽ pẽi pee ime pyrevape. ¹³ Haikavi sheva rãimi ãimeteri airã apyrỹmboi he verã ko pyrymbo ea heva rupĩ. ¹⁴ Ñanderu Tumpa shymby kuaaka kyy veama po aikorã ko yvy ĩãrẽ. ¹⁵ Tẽvã aimyrõite aipota pynymandua herã opa ara kova, She amanorã. ¹⁶ Hara voka mbe uha pevekua Ñandera Tumpa mbaikatu ryheva haere oujy verã ryheva, ha'ẽã ñee rei yrãkaivi nohe hava. Oretei heshahava arykai yry resa rupiive Hesukristo hĩmbipe haere mbaikatu ĩmerea. ¹⁷ Ore teiva heshaha vekuajy Tuu tei omõmbai haere omombai vasushurã, hara Ñanderu teiva ĩjetarã hei: "Kova hai shy Ray ahaihuva shymby horyva." ¹⁸ Ore rãnga hẽnduha vekuajy Ñanderu Tumpa ĩnjetashurã vekua hará hei: "Kova hay shy Ray ahaihuveva, she ãpyhyrõ vekua." Ore teiva hẽndua vekua vate araivi ĩjetava, ĩmẽha teri ẽ hãndi yvytu rusu mby haikaviavaperã. ¹⁹ Kyrã ore heshaha hekope kavi iko vokava ñimiñẽẽe iare mbeuvekua, hara haikavipo pyrojarã. Vokava rãnga hãi maĩnunga hendy õvã pyntu vape sapeva, kõipeve kõĩ mbija vasu sapeva pyndy pyape. ²⁰ Opava mainunga iarepo pikuaa kavi kova: mba'ety Ñanderu Tumpa ĩñẽẽepe ñimiñẽẽe iare heivekua katuva ñande jahesha, ñanykyrey jaheshava rãĩmi. ²¹ Ñimiñe iareta rãnga haire ĩnjeta ijuhuvi rei. Mba'ety. Ñanderu Tumpa heepe ĩnjeta jyve Espiritu Santo mbyheshakashuva retai mbeu.