¹ She aipota āmbeupe pee karai kuakuamavare tupaope japohavera miñaka'iare, sheteijy pēnte pyndyryhevava she rãnga pēnte pyryheshava heshavekua Hesukrito hasa'asy'irã hãra mē'ēapojyshyshe verã she shyrēndarã hai oujyma himbipea perã. ² Pingareko kavihe Ñande Tumpa jy'avisha'avy pijahe hereta, pya kavy ryhevēipojyve, haereka vy'ape piniñee rēndushu Ñanderu Tumpa potavape avy piko jy'avishare ñyngarekorã kyrypotireī'ia. ³ Avy piko avishare jaty'õ ijarõī, pikõi mbai kavi hesha pyndyrehe verã rãimi. ⁴ Hesukrito rãnga avisha ñyngareka'ihevasu, ijeshakajyha arape mē'ehapope pente pãkare jurahaverã himbipekue mbai rãmba ñymbai verã ryheva. ⁵ Kyve pee kunumire haereka taupere piñiñomo kuakuamavare ipope, peñemomishi katu, shara Ñanderu Tumpatei oñemõihe oñembotuishava oñemomoshi'iapēi hai heshakashu pya kavi haiva. ⁶ Harã peñemomishī katu Ñanderu Tumpa ipope. Hai pūnūmupūaverã hai jy'arape. ⁷ Opaiteva pyndypyape jopyva piñoshu, shara hai ñyngareko pyndyrehe. ⁸ Pikuakatupi pīndijehe haereka pingareko shara ãña pota piniño porãmba'ia pūri jere'i ñavãpyta karõro'ia raimi haereka heka'ia mbavarapo hou. ⁹ Piñiñohe , pirojakuepe tãnta pēishiape, pikua kavi jyve kyrāva jyha'asy ñonohajyvehea pyndyryvyre hykovepe ko yvy'iãre'ia retaivive. ¹⁰ Ñanderu Tumpa pya kavikueivi pynyrēnomba Hesukrito rupī heko tivisha himbipe evape pevarã, pyhasa'asy sapy'aīrã haiteipo pynymbyheko kavi, pynymypyrãta haereka tãtapo piniñono haereka pynymyhenda kavipo. ¹¹ Shara mē'ēamashu mbai katu jatyhavasu verã arava, kyrãpo. ¹² Silvano rupīi, shyryvy hekope kave'ia ambypaka kõipīi, ko kuatia apyrymykyrēy verã tãnta pypytahe verã Ñanderu Tumpa jyhaihu ãñeteva haereka ñymbai katu ipe. ¹³ Tupaovare Babiloniape'iare Ñanderu Tumpa pyhyrõma vekuajyveshu haereka jyve shyray Marco. ¹⁴ Pynymymarãndu jyhaihu haereka ñykuakuãva ryheve. Pyndy pya vapy opaite pēe pirojava vive Hesurkritore.