¹ Go hutsegile toropo e e itaotseng! Toropo e e dikgoka e leswefaditswe. ² Ga a reetsa lentswe la Modimo, le fa e le go amogela paakanyo ya Modimo Yawe. Ga a tshepe Modimo Yawe ebile ga a tle fa pele ga Modimo a mo obamela. ³ Dikgosana tsa gagwe ke ditau tse di dumang mo gare ga bone. Baatlhodi ba gagwe ke diphiri tse di gagolakang bosigo di bo di sa tlogele sepe se se ka jewang mo mosong. ⁴ Baporofiti ba gagwe ke banna ba ba tletseng tsietso ebile ba sa ikanyege. Baperesiti ba gagwe ba leswefaditse se se boitshepo ebile ba sentse molao. ⁵ Modimo Yawe o tshiamo mo gare ga gagwe. Ga a kake a dira bosula bope. Moso o mongwe le o mongwe o tla gasa katlholo ya gagwe e e senang tsietso! ga e kake ya fitlhega mo leseding, le fa batlhoka tshiamo ba sa tlhabiwe ke ditlhong. ⁶ Ke senyakile ditshaba; mabota a bone a itshireletso a thubakilwe. Ke sentse mebila ya bone gore ope a seka a feta ka bone. Ditoropo tsa bone di sentswe gore ope a seka a nna mo go tsone. ⁷ Ka re 'E le ruri o tla ntshaba. Amogela paakanyo gore le seka la lelekwa mo magaeng a lona ka se ke se rulagantseng go se le dira. 'Mme ba nyorelwa ka go simolola moso mongwe le mongwe ka go senyaka ditiro tsa bone. ⁸ Ka jalo nkemela-go bua Modimo Yawe-go fitlhela letsatsi le ke emelang motswa setlhabelo. Gonne tshwetso ya me ke go kgobokanya ditshaba, go phutha magosi, le go ba tshela bogale jwa me, tshakgalo ya me yotlhe, gore lefatshe lotlhe le mediwe ke molelo wa bogale jwa me. ⁹ Mme jaanong ke tla neela batho diteme tsa go bua boammaruri, ke ba bitsa botlhe ka leina la Modimo Yawe gore ba ntirele ba emane nokeng. ¹⁰ Go feta noka ya Ethiopia, baobamedi ba me-batho ba me ba ba phatlaletseng- ba tla tlisa meneelo e e ntshwanetseng. ¹¹ Ka letsatsi leo ga o kake wa tlhabisiwa ditlhong ke ditiro tsa gago tsotlhe tse o di ntirileng .Go tsweng mo letsatsing leo ke tla ntsha botlhe mo go lona ba ba neng ba ipelela boikgogomoso jwa gago, le gore ga o kitla o dira boganka mo thabeng ya me e e boitshepo. ¹² Mme ke tla le tlogela le le batho ba ba ko tlase ba humanegile, o tla bona botshabelo mo leineng la Modimo Yawe. ¹³ Masalela a Iseraele ga a kitla a atlhola mo go seng boammaruri kgotsa ba bua maaka, ga go kitla go fitlhelwa mafoko a tsietso mo melomong ya bone; ka jalo ba tla fula ba bo ba itapolosa, ope ga a kitla a ba tshosa.'' ¹⁴ Opela, morwadia Sione! Gowa, Iseraele. Itumele o bo o ipele ka pelo ya gago yotlhe, morwadia Jerusalema. ¹⁵ Modimo Yawe o tlositse kotlhao ya gago; o ntsheditse baba ba gago kwa ntle! Modimo Yawe ke Kgosi ya Iseraele mo go lona. Ga o kitla o boifa bosula gape! ¹⁶ Mo letsatsing leo ba tla raya Jerusalema ba re,'' O seka wa boifa Sione. O seka wa remega ditokololo. ¹⁷ Modimo Yawe, Modimo wa lona o na le lona.Yo o maatla go le boloka, O tla le itumelela le ka boitumelo o tla le didimalela mo loratong la gagwe. O tla le ipelela a bo a gowa ka boitumelo, ¹⁸ jaaka mo letsatsing la moletlo le le tlhomilweng. Ke tla tlosa dibetso tsa tlholego mo go lona; ga o kitla o di tlhabelwa ke ditlhong. ¹⁹ Bona, Ke gaufi le go otlhaya botlhe ba ba go gateletseng.Ka nako eo ke tla golola digole ke bo ke phutha ba ba latlhetsweng kwa ntle. Ke tla ba dira jaaka bagalalediwa, ke tla fetola matlhabisa ditlhong a bone tlotlo mo lefatsheng lotlhe. ²⁰ Ka nako eo ke tla le etelela pele, ke tla le kopanya ga mmogo.Ke tla dira gore ditshaba tsotlhe tsa lefatshe di le tlotle di bo di le galaletse, fa le bona gore ke le buseleditse,'' Go bua Modimo Yawe.