¹ Gauta e leswafaditswe; ao, ka fa gauta e tlhwatlhwa kgolo e fetogileng ka teng! Makgabana a a boitshepo a gasagasegile le dikhutlo tsa mebila mengwe le mengwe. ² Barwa ba Sione ba ne ba le tlhwatlhwa go lekana le gauta e e tlhotlhilweng, mme gone jaanong tlhwatlhwa ya bone e fetwa ke ya dijana tsa letsopa, tiro ya mmopi wa letsopa. ³ Le bophokoje ba amusa bophokojwane, mme morwadia batho bame o setlhogo jaaka bonche mo sekakeng. ⁴ Maleme a masea a anyang a ngaparela magalapa ke lenyora; bana ba kopa dijo, mme ga di yo. ⁵ Ba ba neng ba tle ba je dijo tse di tlhwatlhwa kgolo jaanong ba bolawa ke tlala mo mebileng; ba ba godisitsweng ba apara dilwana tse di tlhwatlhwa kgolo jaanong ba nna mo dithothobolong. ⁶ Kotlhao ya morwadia batho bame e feta ya Sotoma, e ne ya ribegediwa ka ponyo ya leitlho mme ga seka ga nna ope go tsholetsa lebogo go mo thusa. ⁷ Baeteledipele ba gagwe ba ne ba le phepa go feta kapoko, ba le basweu go feta mashi; mebele ya bone e le bohubidu go feta korale, go tsabakela ga bone go feta ga safire. ⁸ Ponalo ya bone jaanong e le bontsho bo bo fetang ba mosidi; ga ba lemosege mo mebileng. Matlalo a bone a ngaparela mo marapong; a omeletse jaaka logong. ⁹ Ba ba bolailweng ka tshaka ba ne ba itumela go feta ba ba bolailweng ke tlala, bone ba ba bopameng, ba tlhabilwe ke go tlhoka thobo go tswa mo masimong. ¹⁰ Mabogo a basadi ba ba kutlwelobotlhoko a besitse bana ba bone; ba nna dijo tsa bone motlha wa fa morwadia batho bame a senngwa. ¹¹ Modimo Yaweh a supa bogale botlhe ba gagwe; a tsholola bogale ba gagwe bo bo boitshegang. A gotsa molelo mo Sione o o nyeleditseng metheo ya gagwe. ¹² Dikgosi tsa lefatshe tsa seka tsa dumela, le fa e le banni ba lefatshe ba sa dumele, gore go na le mmaba kgotsa moganetsi yo o ka tsenang ka kgoro ya Jerusalema. ¹³ Se sa diragala ka lobaka lwa boleo jwa baporofiti ba gagwe le boikepo jwa baperesiti ba ba tsholotseng madi a basiami mo magareng ga gagwe. ¹⁴ Ba kgarakgatshega ba foufetse mo mebileng. Ba leswafaditswe ke madi a ebile go sa letlelelwe ope go kgoma diaparo tsa bone. ¹⁵ ''Tswayang! Lona ba le leswafetseng!'' Batho ba lelela mo go bone. ''Tswayang! Tswayang! Se tshwareng!'' Ba kgarakgatshega; batho ba bua mo merafeng, ''Ga ba kitla ba ba nna fa.'' ¹⁶ Modimo Yaweh ka sebele o ba phatlaladitse; ga a sa tlhole a ba disitse. Ga ba a ka ba tlotla baperesiti, gape ga ba a supa kutlwelobotlhoko mo bagolong. ¹⁷ Matlho a rona a ne a felelwa ke go leba, go sena thuso epe e re e bonang; mme mo go lebeleleng ga rona ra seka ra bona morafe o o ka re falotsang. ¹⁸ Ba latela dikgato tsa rona, ra palelwa ke go tsamaya mo mebileng ya rona. Phelelo ya rona le malatsi a rona a ne a badilwe, bokhutlo jwa rona bo ne bo tsile. ¹⁹ Ba ba re alotseng ba ne ba le bofefo go feta ntsu mo loaping.Ba re lelekela kwa dithabeng ba bo ba re lalela mo sekakeng. ²⁰ Mowa mo dinkong tsa rona - motlodiwa wa Modimo Yaweh - ke ene yo o tshwerweng mo mahuting a bone; yo o go builweng ka ga gagwe gotwe, ''Ka fa tlase ga moriti wa gagwe re tlaa tshela mo gare ga merafe.'' ²¹ Itumele o bo o ipele morwadia Etome, wena yo o tshelang mo lefatsheng la Use. Senwelo se tlaa fetisediwa kwa go wena; o tlaa tagwa, mme o tlaa ikapola. ²² Morwadia Sione, kotlhao ya gago e tlaa fela, ga a kitla a leelefatsa go ya lejwa ga gago; mme morwadia Etome, o tlaa mo otlhaya, o tlaa senola maleo a gago.