¹ Mme Jona a rapela Yawe Modimo wa gagwe a le mo mpeng ya tlhapi. ² O ne a re, ''Ke ne ka bitsa Yawe Modimo ke le mo tlalelong, ke le mo felong ga baswi mme a nkaraba; o ne wa utlwa lentswe la me. ³ O ntatlhetse kgakala mo boteng mo gare ga mawatle, mme ke ne ke dikologilwe ke morwalela, makhubu le matsubutsubu di ne di ntlola fa godimo , mme kare, ⁴ 'ke ntshitswe mo pele ga matlho a gago; le fa go ntse jalo, ke tla boa ke bona tempele ya gago e e boitshepo gape.' ⁵ Metsi a ne a nkema mo molaleng; morwalela ole mo tikologong ya me; letlhaka la lewatle le ne le nthathile mo tlhogong. ⁶ ka fologela kwa metheong ya dithaba; dipati tsa lefatshe tsa ntswalela go-ya-goileng. Mme wena o ntshitse botshelo jwa me mo bodibeng wena Yawe Modimo wa me. ⁷ E rile moya wame o idibala mo teng ga me, ka gakologelwa Modimo Yawe, thapelo yame ya fitlha ko go wena mo tempeleng ya gago e e boitshepo. ⁸ Ba ba tsibogelang medingwana e e senang mosola ba ganana le boikanyego ja gago mo go bone. ⁹ Mme nna ke tla go neela setlhabelo sa malebogo, se ke se ikanetseng ke tla a se dirafatsa' Poloko e tswa mo go Modimo Yawe!'' ¹⁰ Mme Modimo Yawe a bua le tlhapi, mme ya tlhatsetsa Jona mo lefatsheng le le omileng.