¹ ఉ ఓ గట్లా ఉంపర్ తీ ఉత్ర ఆయొ జనా, జనేర్ మళావో ఓర్ లారెగె ఇదేక్ ఏక్ కోడేవాళో ఆ ఓనె ధోక్ దే, ² ప్రభూ తార్ ఖాతర్ వతో మనె ఆచో కర్ సకేచి క కో. ³ జేర్ వాసె ఉ హాత్ లాంబో కర ఓనె చీప మార్ ఖతరెజ్, తు ఆచో వేజాస్ క కేతేఖం జనాజ్ ఉ కోడేవాళేర్ రోగ్ ఆచో వేగో. ⁴ జనా యేసు కేని కాయి కేస్ మత్ భేనా, పణ్ తు జా ఉందేనె గవాయిజగు తార్ జీవేనె పుజారీనె దకాళ్ లే మోషా కోజకో భేట్ చడాదేక ఓనె కో. ⁵ ఉ కపెర్న హూమేమా గోజనా, సోసిపాయిరో సర్దార్ ఏక్ ఓర్ డై ఆ ⁶ ప్రభూ, మార్ బాయా పాక్ తీ సుకారోజే రోగేతీ ఆస్మా తరేకర్తో ఘరేమా పడోచె క కే ఓర్ కార్ణే యేసూనె నోరా కీదో. ⁷ యేసు మ ఆ ఓనె ఆచో కరుచు క కేతేఖం. ⁸ ఉ సర్దార్ ప్రభూ, తు మార్ ఘరేమా ఆయెనె మఛాజూని తు వాత్ మాతర్ దే జనా మార్ బాయా ఆచో వేజాచె. ⁹ మ సదా ఏక్ మాలకేర్ హెట్టె చు, మార్ హాతే హెట్టె సిపాయిఛే మ ఏకేనె జో కతో ఉ జావచె ఏకేనె ఆకతో అవచె మార్ బాయానె, ఈ కామ్ కర్ క కతో కరెక జవాబ్ దీనో. ¹⁰ యేసు ఈవాత్ సామ్ ళ విచిత్తర్ పడ, లారె ఆవ్ రెజేనె దేక ఇశ్రాయేలేమా కేని సదా అత్రా విశ్వాస్ ఛేజు మ దీటో కొని క తమేనె సాసీజ్ కేరోచు. ¹¹ ఘణ్ ఆద్మీ ఉగ్మణేతీ ఆ అబ్రాహామేతీ ఇస్సాకేతీ యాకోబేతీ స్వర్గ లోకేర్ రాజేమా బ్యాసచె పణ్. ¹² రాజేమా రేణోజకో బారేర్ అందారేమా ధకేలచె ఒత్తే రోయెరో దాoత్ చాబెరో రచె క తమేనె కేరోచు క కో. ¹³ జనా యేసు అబ్బె జో; తార్ విశ్వాసేర్ నై తోనె వచెక ఓ సర్దారేనె కో ఓ ఘడీ మాజ్ ఓర్ బాయా ఆచో వేగో. ¹⁴ పచ్చె యేసు పేత్రూర్ ఘరేమా జా తావేతీ పడిజె ఓర్ సాసునె దేక. ¹⁵ ఓర్ హాత్ చీప్ తేఖం తావ్ ఓనె ఛోడ్ దీనో జనా ఉ ఉట ఓనె సేవ కరేనె లాగీ. ¹⁶ సాoజ్ పడ్ గీ జనా భూత్ డీ లాగ్ రీ జకో ఘణ్ ఆద్మీనె జ ఓర్ డై లాయె. ¹⁷ ఉ వాతేతీ భూత్ డీయూనె భడ్ కా రోగేవాళూనె సేనె ఆచో కీదో జేర్ వాసె ఊజ్ హమార్ కమ్ జోరేనె పాల్డే హమార్ రోగేనె ఓర్ ఉంపర్ మేల్ లీదో క భక్తిదార్ యెషయా కోజకో వాత్ వేగో. ¹⁸ యేసు ఓర్ డై ఛజకో జనేర్ మళాయేనె దేక పర్ లేవ్ డీ జావ్ ణో క హకమ్ దీనో. ¹⁹ జనా ఏక్ శాస్త్రీ ఆ బోద్ కరెవాళా, తు కతై జావస్తో సదా తార్ లారె ఆవుచు క ఓనె కో. ²⁰ జేర్ వాసె యేసు సాళాయావునె దల్డా ఛే; ఆస్మానేర్ పంకేరూనె మాళా ఛే పణ్ ఆద్మీ ర్ బేటానె మూoడీవాళేనె సదా జాగ్ ఛేనిక ఓనె కో. ²¹ చేలావుమా ఉజ్జేక్ , ప్రభూ, మ ఆగ్ డీ జాన్ మార్ బాపేనె ఖాడేమా ఘలేనె మనె హకమ్ దే క ఓనె పూచొ జనా. ²² యేసు ఓనె దేక మార్ లారె ఆ; మర్గేజకో ఉందేర్ మర్గేజేనె ఖాడేమా ఘాల్ లేదె క కో. ²³ ఉ ఓడా చడో జనా ఓర్ చేలా ఓర్ లారె గే. ²⁴ ఆత్రామా, సమ్ ద్రే ఉంపర్ మోట్ ఆoదీ ఆయి జేర్ వాసె ఉ పడవా హల్లోళేతి బురాగో జనా ఉ నీoద్ లేరోతో. ²⁵ జనా ఓ ఓర్ డై ఆ ప్రభూ మర్ జారేచ; హమేనె జత కర్ క కే ఓనె ఒటాడే. ²⁶ జేర్ వాస్ ఉ కమ్ విశ్వాసేవాళావో, కసెనె చమక్ రేచో? క ఉందేనె కే ఉట ఆoదీన సమ్ ద్రేనె దల్ కార్ తేఖo జనాజ్ అస్మా శాంతి వేగి. ²⁷ ఓ విచిత్తర్ పడ, ఈ కసేక్ ఆద్మీకో; ఆoదీ సమ్ ద్ర ఏర్ వాత్ మా రేచె క కేవు కీదె. ²⁸ ఉ పర్ లేవ్ డీ రజకో గదరేనేర్ మల్కేనె జావ్ తేఖo భూత్ డీ లాగీ జకో దీ ఆద్మీ మసాణే మాయితీ నికళ ఓర్ సమ్నక్ ఆయె ఓ ఆస్మా రీసేతీరే జేర్ వాసె కోయితీ ఓ వాటేనె జాయేర్ వంగాయి కొని. ²⁹ ఓ దేవేర్ బేటా, తోతీ హమేనె కాయి? దాడ్ ఆయొకొని జేరాoగజ్ హమేనె భావేటీ పాడేనె అతై ఆయొ కాయి? క కల్ కారి మారె. ³⁰ ఉందేతి ఘణ్ మే మోటో సూరీర్ డార్ చర్తో రెజనా, ³¹ ఓ భూత్ డీ తు హమేనే భడ్ కా దస్ తో ఓ సూరీర్ డారేమా జాయెదే క ఓనె నోరాకీదే. ³² ఉ ఉందేనె జావో క కేతేఖం ఓ ఓ ఆద్మీ యూనె ఛోడ్ దే ఓ సూరి మాయి డగర్ గె అత్రామా ఉ డార్ సారి గట్లార్ పాక్ తీ మాయితీ సమ్ ద్రేమా జెల్దీ ధాస జా పాణీమా పడ మర్గీ. ³³ ఉందేనె చరాయెవాళ్ ధాస శేరేమా జా హుయొజకో కామ్ సేన భూత్ డీ లాగ్ రీ జేర్ వాతే ఒతై మాలమ్ కీదె. ³⁴ జనా ఓ శేరేవాళ్ సే యేసూనె భళేనె ఆ ఓనె దేక ఉందేర్ మలక్ ఛోడ్ దే జో క ఓనె నోరాకీదె.