¹ దేవేర్ ఖాతరేర్ నై క్రీస్తూయేసూర్ అపోస్తలేర్ నై ఛజకో పౌలున్, భాయిఛజకో తిమోతోన్. ² కొలసీయుమాఛజే దేవేర్ జనేనన్ క్రీస్తూమా విశ్వాసేతీఛజే భాయిబoదేనే క్వొసళ్ కన్ కేన్ లకేజకో అపణ్ బాప్ ఛజకో దేవ్ తమేనే కృపాన్ శాoతి దేజా. ³ హమ్ తమార్ వాసు అరజ్ కరాజనా, అపణ్ ప్రభు యేసు క్రీస్తూర్ బాపేనే అమేసా వందనం కర్ రేఛ. ⁴ కస్నెకతో క్రీస్తు యేసూపర్ తమేనే ఛజకో విశ్వాస్, దేవేర్ జనూతీ తమేనే ఛజకో ప్రేమేర్ కార్ణే హామ్ సామళేఛ. ⁵ డై ఆయొజకో ఆచ్ ఖబరేర్ సాసో బోధార్ కార్ణే, ఉ దజే నీరీక్షణేర్ కార్ణే, తమ్ ఏర్ ఆoగెజ్ సామ్ ళేఛో. ⁶ లోకేమా తమార్ వాసే అటకళేతీ రకాడ్ మెలేజకో నీరీక్షణేపర్ తమార్ విశ్వాసన్, ప్రేమ్ ఆధార్ వేన్ ఛే తమ్ దేవేర్ కృపార్ కార్ణే సామ్ ళన్, సాసేనే మాలo కర్ లీదేజేదాడూతీ, ఈ ఆచ్ ఖబర్ సారీజగేమా ఫ్యాలన్ పాచ్ రీ జు, తమమా సదా పాచన్ ఫ్యాల్ రీఛే. ⁷ ఎపఫ్రా కన్ కజే హమార్ ప్రేమేర్ సాతీఛజకో, దేవేర్ దాసేర్ కార్ణే తమ్ ఏ ఖబరే సీక్ లీదేఛో. ⁸ ఊ హమార్ కార్ణే క్రీస్తువాసే నమ్మకమేతీ కామ్ కరేవాళో ఆత్మతీ బర్ పూర్ ఛజే తమార్ ప్రేమేనె ఉ హమేనె మాలoకిదో. ⁹ ఏర్ కార్ణే, తమార్ వాత్ సామళేజనాతీ తమార్ వాసే అరజ్ కర్ రేచ దేవేర్ మనేర్ కార్ణేర్ తెల్వీతీన్ ¹⁰ ఆత్మదజకో గ్యానేతీ, కళేజేత్తీ తమేనె భర్ ణోకన్ దేవేనె హామ్ పూచ్ రేఛ. ¹¹ జనా తమ్ ప్రభు కుoతేజు బoచ్ తే, ఓర్ ఖాతర్ ఆవేజకోజ్ కామ్ హామేశా కర్ తేరోనకోఛో సేనే ఓఫ్ క్యాతీ ఓర్స్ లోజు, దేవేర్ మహిమాతీ ఆవెజే జోర్ సేతీ తమ్ ధాకత్ పావోఛో. ¹² దేవ్ వజాళేర్ రాజేమా ఓర్ జనేవాసు అటకళేతీ మేలోజకో భాగ్యమేమా హాసోలేనే తమేనే హక్ దారేర్ నై కీదోజే ఓనె ఖుషీతీ వందనం కో. ¹³ కస్నెకతో, ఉ అoధారేర్ జోరేతీ అపణేనె ఛోడాదేన్ ఓర్ ప్రేమేర్ బేటార్ రాజేమా అపణేనె అటకళేతీ లాయొ. ¹⁴ ఓర్ కార్ణే అపణ్ చూటన్ ఛా, అపణ్ పాప్ రద్ వేగో. ¹⁵ క్రీస్తు, దిసాయెనీజే దేవేర్, దిసావెజకో సురత్ ఉ ఆగ్ డీ హుయొజకో బేటా పేదకీదోజే సేతి మోటో. ¹⁶ కస్నెకతో ఓత్తీ స్వర్గ్ లోకేమా, ఏ జగేమా ఛజకో సేనే దేవ్ పేదకీదో కతో, దిసారెజ కోన్, దిసాయెనీజకో, ఆత్మార్ జోరన్ ప్రభన్, అధికారీన్, హక్ మేరన్ పేదకిదో దేవ్ ఓర్ కార్ణే ఓర్ వాసు జగ్ సారీనె పేదకీదో. ¹⁷ సేర్ ఆoగెజ్ ఉ రే ఓత్తీ ఏక్ వేజేనే ఉoదేనే ఛాజేజకో జాగ్ ఛే. ¹⁸ సoగ్ కన్ కజకో శరీరేనే ఉజ్ మాతో ఓర్ శారీరేర్ దమ్మేనే ఊజ్ జడ్ సేమా ఓనెజ్ అగ్ డీర్ జాగ్ రజు, మర్గేజేమాయితీ ఉటాడోజకో అగ్ డీహుయొ జకో బేటా యీజ్. ¹⁹ బేటామా దేవేర్ గొణ్ పూరో రేణో కన్ దేవ్ ఘట్ కిదో బేటార్ కార్ణే జగ్ సారీనే ఓర్ డై లాయెనే దేవ్ ఘట్కిదో. ²⁰ సిలువ ఉoపర్ ఓర్ బేటార్ మ్వోతేతీ దేవ్ రాజీకరన్ స్వర్గ్ లోకేనన్, జగేర్ ఉoపరే ఛజకో సేనే ఓర్ డై ఫేర్ లాయొ. ²¹ ఏక్ హప్తా తమ్ దేవేతీ ఘణ్ మరేన్, కేలేన్ కిదేజకో ఖరాఫ్ కామేర్ కార్ణే దేవేర్ వ్యారీవాళ్ వేగే. ²² పణ్ అబె తమేనే పవిత్రన్, ఆచోన్, దోషి ఛేనిజకోన్, దేవేర్ ముణాoగె లాయేనే ఓర్ బేటార్ మ్వోతేర్ కార్ణే దేవ్ తమేనే ఓర్ దోస్తీవాళేర్ నై కర్ లిదో. ²³ తమ్ కాటో బునాది ఉoపర్ నమ్మకమేతీ హూబ్ రేన్, తమ్ అగ్ డీ ఆచ్ ఖబరేనే సామ్ ళే జనా, తమామా ఛజకో నీరీక్షణేతీ కుణీ తమేనె హలాయెనీజు దేక్ లో జగ్ సారీమా ప్రచార్ కర్ రేజకో ఆచ్ ఖబరేర్ కార్ణే ²⁴ అబె మ తమార్ వాసే కర్ రోజకో భావేటీర్ కార్ణే మ ఖుషీకర్ రోఛు యేసుక్రీస్తూ శరీర్ ఛజకో సoగమేజగు ఉ కర్ రోజే భావేటిమా కమ్ ఛజేనే, మ మార్ భావేటిర్ కార్ణే పూరోకర్ రోఛు. ²⁵ తమార్ మేలే వాసే ఈ కామ్ మనె దినోజకో దేవ్, సoగమే సారూ బాయార్ నై మనె కిదో. ²⁶ నరేర్ జాతేనే న మాలమ్ కరజు, పేనార్ దాడూతీ గోక్ మేలెజకో వాత్ పణ్, అబెఉ ఓర్ జనూనె మాలమ్ కిదోజకోజ్ ఉ పూరో ప్రచార్ కరేర్ కామ్. ²⁷ కసన్ కతో ఈజ్ దేవేర్ నియo జన్ సేనే లాగెజకో మోట్ మహిమార్ గోకేర్ వాతేనె ఓర్ జన్ సేనే బారె పాడెరజ్, ఉ గోకోజకో ఈజ్ క్రీస్తూ తమామా ఛే జేర్ వాసే తమ్ దేవేర్ మహిమామా హాసొలేరేఛో. ²⁸ హనూజ్ క్రీస్తూనె హామ్ సేనే ప్రచార్ కర్ రే ఛా హర్యేక్ క్రీస్తూతీ ఏక్ వేన్ పూరో వదజు, దేవేర్ ముణాoగె ఓనె హూబ్ రకాడేనె హర్యేకేనే సే గ్యానేతీ కబర్ దాన్ కేన్ బోద్ కర్ రేఛ. ²⁹ హనూ కరేనే మార్ మా కామ్ కర్ రోజే క్రీస్తూర్ మోటోజోరేతీ భావేటీకరన్ లడాయిమార్ రోఛు.