¹ Uvakhumbusake ukhuvaheshimu avalongochi na avakhomi ,vavayidihichake nu khuva tayali khwa khila khaasi inofi. ² Uvakhumbuusakhe valekhe ukhuvafanyila avayavo amabaya, viyefyake na mahikhing'ano,vavalekhake avayavo valamule; nu khuvaheshimu vaanu voha. ³ Pakhuva na yuwe twahele na mahocho kekiyacha ni khibuli. Twavele tuyakile, nu khuva vatumwa va vuloho ni anasa. Twavele nu wifu nu vubaya. Twadadilichaka nu khudadilana yuwe. ⁴ Lakhini wakati ulusungu lwa Nguluvi umkhombochi veetu,nu lukhelo lwa mwene khwa vaanu voha pelwavonikhe. ⁵ Sikaali amanofi keetu ketufanyile, naambi, atukhombwe khwa lukano lwa mwene. Atuokwe khwa khutukhalafya khwa khubaabwa vupya nu khuvumbwa vupya khwa njila ya umubepo umwimikhe. ⁶ Khwa njila ya Yesu Klisto ukhombochi vetu uNguluvi atududye Umumbepo Umwimikhe khwa mkino. ⁷ Akhitile ewe nekhe atuyingiche muvuumi wa khudumu, yenetuvalililwe ukhuva ni haki khwa lukano lwa mwene. ⁸ Iyi yivele mola yakhufuwa nayo, ndilonda aka mkachovake bila khuyokopa, nekhe vala yevifuwa nu Nguluvi vavechake ni niya ni khaasi inofi yeyavikhilwe pavulongolo ya vene. Akha koha manofi khangi kana mkinikho khwa vaanu voha. ⁹ Lakhini mwiyefyake na mahiking'ano kekasivele nu luhala, ni simo, na masindano, nukhugongana khwa nongwa ya shelia. Amambo aka sikalini mana wala mkinikho. ¹⁰ Yeyoha yeileta amalekhano umwenyo mumubelake. Vonake mumuonyile imala ya khwanja ni ya khavili, ¹¹ myelewake umuunu ngita uyu ayilekhile injili iya salwesi na afanyile isaambi nu khwihukhumula yumwene. ¹² Yandumutumile uArtemi au Tikito,uyangupake ukhuyicha ukhwangu khuno khu Nikopoli pendilamwe ukhutaama umusikha kwa ng'ala. ¹³ Uyangupake umseng'e uZena yeayimanyile ishelia, nu Apolo bila ukhuyisiwa khiinu. ¹⁴ Avaanu veetu yitakhiwa vifunje ukhufanya ikhaasi inofi chechikusa fyevilonda, nekhe valekhe ukhuuva bila khuhokola amatuunda. ¹⁵ Avali pamwinga naani voha vakhakhuhungila Uvahungilake vala voha yevakhatukhela muvufuuvo. Ulukhano luvechake nanye voha.