1 Paulo mseng'wa va Khilisiti Yeesu khwa makhelwa ka Nguluvi,nu Timoteo mlongo vetu, 2 khwa vaumini na valongo vaaminifu mwa Khilisiti yevavele kholosai. Lukano yive khwenyo, ni amani khuhuma khwa Nguluvi Baba vetu. 3 Twihecha sengucho khwa Nguluvi, Baba va Mutwa vetu uYeesu Khilisiti,na tukhavanyilikhila mala khwa mala. 4 Tupulikhe ulufuvo lwenyo mwa Yeesu Khilisiti nu lukhelo lwemuvele khwa vala voha yevatengilwe khwaajili ya Nguluvi. 5 Munya lukhelo ulu khwa sababu ya litekemelo lya vuhakika lyelitunjichwe khushanya khwaajili yenyo. Mwapulikhe khuhusu ilitekemelo ilyo lya vuhakika kabula mu licho lya salwesi, ienjili, 6 ambayo yichile khwenyo. Ienjili iyi yibaba amatunda na yienele inyi yoha. yivele yifanyikha edeti mwa mukati mwenyo tangiya isikhu pemwapulikhe nu khwifunja khuhusu lukano lwa Nguluvi mu salwesi. 7 Iyi ndyo enjili yemwifunjiche khuhuma khwa Epafla,mkhelwa vetu mfanyakhasi muyetu, ambaye avele mufanya khasi mwaminifu va Khilisiti khwa niaba yetu. 8 Epafula avufanyile vujulikhane khwetu lukhelo lwenyo mu Mubepo. 9 Khwasababu ya lukhelo ulu, tangiya isikhu petwapulikhe edeti, situlekhili khuvanyilikhila khutya ya mwimemelechwa amaalifa ka makhelwa ka mwene mu hekima yoha nu vumanyi wa numbula. 10 Tuvele twinyilikha khutya mwikenda khwa vustahimikifu wa Mutwa mu njila chechipesesa. Tuvele twinyilikha khutya ya mwibaba amatunda mu khila litendo ilinofi nu khutya ya mwikhula mu maalifa ka Nguluvi. 11 Twinyilikha muwese khusopwa uludali mu khila vuweso ukhulingana nu ludali lwa vuvalache w mwene mu vufumilifu nu vustahimilifu woha. 12 Twinyilikha khutya,khwa ifulaha, yamwihecha isengucho khwa Baba, yeeavafanyile unyenye muwese khuva ni sehemu mu vulisi wa vaumini mu mwanga. 13 Atukhombwe khuhuma mu vutawala wa ng'isi nukhuhamisikhicha mu vutwa wa Mwana va mwene umukhelwa. 14 Mwa mwana vamwene tuna vukhombochi, msamaha kwa sambi. 15 Mwana avele mfano kwa Nguluvi yesiivonekha. Avele msaliwa va khwanja va vuvumbaji woha. 16 Khwa khuva khwa mwene finu fyoha fyaavumbilwe, fila fyefivele khushanya na fyefivele mu inyi, finu fyefivonekhana na fyesifivonekhana. yingava fivele fya enzi au mamulaka au vutawala au bunga ludali, finu fyoha fyaavumbilwe nu mwene na khwaajili ya mwene. 17 Umwene avelepwe kabula ya finu fyoha, nu khwa mwene finu fyoha fikhamulana pamwinga. 18 Nu mwene ndyo mutwe kwa muvili yaani khanisa, umwene avele na msaliwa khuhuma mumiongoni mwa vafwe, ewe, anya nafasi ya khwanja mumiongoni mwa finu fyoha. 19 Khwa khuva uNguluvi akhelichwe khutya uvutimilifu wa mwene woha uishi mukati mwa mwene, 20 nukhupanisa ifinu fyoha khwa mwene khwa njila ya mwana va mwene. Nguluvi aafanyile iamani khulutila idanda ya msalaba kwa mwene. Nguluvi aapatanise ifinu fyoha khwa mwene yingava fivele finu fya inyi au fya khushanya. 21 Naanye, khwa musikha kumonga mwavele vakenji khwa Nguluvi na mwavele mu luhala na matendo amavivi. 22 Lakhini lino avapatanise unyenye khwa muvili kwa mwene khulutila khifo. Aafanyile edeti nekhe khuvaleta unyenye vavalache, yesivaveli ni lawama bila likhosa mbele chakhe, 23 kama mungayendelela mu lufuvo, yemwaimaliswe nu khuva sabiti, pesipaveli khuhecheswa khutali khuhuma mu litekemelo lya vujasili lya enjili yeyitangasichwe khwa khila munu yeavumbilwe pasi pa khushanya. Iyi ndyo enjili ambayo khwa iyo unene, Paulo, ndivele mufanya khasi. 24 Lino ndikhela amapumukho kangu khwaajili yenyo. Naane nditimilisa mu muvili kwangu shekhipungukha khwa mapumukho ka Khilisiti khwaajili ya mwene, ambavo livele likhanisa. 25 Unene ndivele mufanya khasi va khanisa eili, sawasawa nu wajibu wendapevilwe khuhuma khwa Nguluvi. 26 Uvu vuvele vusalwesi wa sili yeyavele yifiyilwe khwa myakha myolofi na khwa fipelela. Lakhini lino yifunuliwe khwa voha yevifuwa mwa Mwene. 27 Yivele khwa vala ambavo uNguluvi alondaka ukhufunula khwenyo khuvele uvutajili wa vuvalache wa sili ya vusalwesi mumiongoni mwa Mataifa. Yivele khutya ukhilisiti avele mukati mwenyo, uvujasili wa vuvalache wewiyicha. 28 Uyu ndyo yetukhamutangasa. Tukhamuvunga khila munu, nukhumuvulicha khila munu khwa hekima yoha,nekhe kwamba tumulete Khila munu umukhamilifu mwa Khilisiti. 29 khwaajili iyi, unene ndikhibadilisa nukhwitanga khulingana nu ludali lwa mwene lwelwifanya ikhasi mukati mwangu mu vuwesa.