¹ Ahabhabhuzya ishiholanyo kuti bhamulabhaje insiku zyonti bhatahatambaje. ² Ahabhabhuzya ahati, ''Alipo uhakimu munhaya yimo, watahamwogopaga Umulungu habhili atahasajilaga abhantu. ³ Munhaya yiniyo alipo umwantanda umufwile, 'Ahabhalaga ahinji, kulabha kuti amwavwa, ahatiji ufumwe uwamulo umulungu wanu aleshe kunjivwa.' ⁴ Insiku inyinji zihashila ahajendelela kuhana kumwavwa pe kuwumalilishilo ahayisibha mu moyo wakwe, 'Shepope intakumwogopa Umulungu awe kusajila abhandu, ⁵ Ilelo kunongwa ye umufwile unu akunjivwa nhani ishi intifumwe uwamulo kumwavwa, inga aleshe kunjivwa winza.'' ⁶ Pe umwene ahati, 'Tejelevwa she abhombile uhakimu ula. ⁷ Ishi Umulungu atangahola kumubhombela ahinza abhasabhulwa bhakwe bhebhakumulabha shamusanya na shawunsiku? Anga, habha kubhavwa? ⁸ Inkubhabhuzya kuti atibhabhombele na lubhilo. Ishi umwana wa muntu we akugaluha munsi ahayibhalola abhantu bhebhamwitishile?' ⁹ Pe ahabhabhuzya kushilolanyo abhantu bhebhakulolaga kuti bhahondeye na kubhasholanya abhantu abhanji, ¹⁰ ''Abhantu bhabhili bhabhalile kuputa mwilinga: umo amile Mufarisayo uwamwabho msonshizya nsonho. ¹¹ Umufarisayo ahaputa ishinunu ahati, 'Mulungu, inkusalifwa kunongwa ye ine intali anza bhantu abhanji, anzu umusonshezya nsonho unu. Ine inkuyima kulya habhili kumalungu. ¹² Inkufumwa imfinjile muvintu vwani vwonti. ' ¹³ Ilelo umusonshezya nsonho, ayimile ukutali asuhamiye pasi atahalinjizya pope kwenya kumwanya, ahayihoma pa shifubha shakwe ahati, 'We Mulungu, undolele ishisa ine ne wimbibhi.' ¹⁴ Inkubhabhuzya kuti ahagaluha kuhaya atuyiliwe imbibhizyakwe uwa mwabho ula atahatuyiwa hala, kunongwa ye umuntu wowonti we akuyizuvwa ahayimwisya, wakuyisya ahayimuzuvwa. ' ¹⁵ Abhantu bhahamletela bha abhansi kuti abhasaye, abhalandati bhakwe webhalola shinisho, bhahabhalongana. ¹⁶ Pe u Yesu ahabhabhilishila kukwakwe bhaleshe, ''Abhana abhansi bhinze kukwani lashi mtabhadindaje nhala. Uwumwene wa Mulungu wakwanza abhantu bhebhali inza bhana abhansi. ¹⁷ Nalyoli inkubhabhuzya, umuntu wowonti watakumwitiha Umulungu anza umwana umunsi atangahola kwinjila nga heka mu wumwene wa Mulungu. ' ¹⁸ Umupiti umo ahamubhuzya, ahati, ''Wemumanyizyi, 'Umwinza, imbombe ilyoni kuti inhaposhele uwumi uwa wila?' ¹⁹ U Yesu ahamwamula ati, 'Honi he ukumbuzya kuti ne mwinza? Atalipo we mwinza, lyoli Umulungu mwene. ²⁰ Uzimanyile indajizyo zye zikuti, utahabhembushe, utahagoje, utahibhe, utahafumwe uwuketi uwilenga, umushindishe, u Yise waho nunyina waho. ²¹ Uwene ahati, ''Indajizyo zinizyo zyonti nzilemile kufuma kuwana wani. ' ²² U Yesu we ayivwa ganago, '''Ahamubhuzya ahati. Ubhulililwe na hantu heka bhalaga ukazye vwonti vwe ulunavyo uhabhagabhile abhapina pe utibhe na vwe usenguye kumwanya inga pe uyinze undandata.' ²³ Udumbwe wayivwa ganago, ahasungma nhani, kunongwa ye amile ni shuma ishinji. ²⁴ U Yesu, we amulola kuti asungama ahati, ''Abhadumbwe inhayibha pagomu kwinjila kushina mwene sha Mulungu! ²⁵ Amayimba gi ngamila kushila mu haziaha insindanu, mansi kushila udumbwe kwinjila mushina mwene sha Mulungu.' ²⁶ Bhe bhivwizye ganago bhahati, 'Wunanu we, angatulwa?' ²⁷ U Yesu ahabhabhuzya ahati, 'Zye abhantu bhakupotwa kwa Mulungu zi kubhombeha.'' ²⁸ Pe u Petro ahamubhuzya, 'Itwe tuvileshile vwonti tukulandatile iwe. ' ²⁹ U Yesu ahati, 'Inkubhabhuzya, kuti umuntu wowonti we aileshile inyumba, yakwe awe umushi wakwe, kunongwa ya wumwene, wa Mulungu, ³⁰ Wuuyo we akuposhele ivwinji kushila vwe, habhili ahayiposhela uwumi uwawila na wila. ' ³¹ Ahabhega ishumi na bhabhili, ahabhabhuzya ahati, ''Yenya, tukubhala ku Yerusalemu, zyonti zye abhakuwi bhasimbile ku zya mwana wa muntu zilibhombeshe. ³² Ahayitwalwa kubhantu ipo bhahayimusholanya na kumuliga na kumuswila amati. ³³ Habhili bhahayi muhoma ni sambogo na kumugoga isiku ilya watatu ahayizyula. ' ³⁴ Bhatahazyaganya angazyeka zye ahabhabhuzyaga, bhafisiwe amazwi ganago bhatahamanyile hakulonga. ³⁵ U Yesu we apalamila ku Yeliko, umuntu umo we atahalolaga amiso ayi haye pambali pidala ahalabha kuti bhamwavwe, ³⁶ We ayivwa abhantu abhinji bha kushila ahabhuzilizya kuti nhoni hafumila. ³⁷ Bhahamubhuzya kuti u Yesu uwa kunazareti akushila. ³⁸ Pe ahabhilishila ahati, We, 'Yesu, mwana wa Daudi, undolele ishisa.' ³⁹ Bhalabhebhahajendaga bhala muhajila kuti apume ilelo uwene ahonjezya kumubhilishila nhani ahati. We mwana wa Daudi, undolele ishisa. ⁴⁰ U Yesu ahimilila ahalajizya kuti bhamulete kukwakwe. Umufwe amiso ula, u Yesu ahamubhuzilizya ahati, ⁴¹ Ukwanza inkubhombele lyoli?' Ahati, 'Wemwene, ikwanza kulola.' ⁴² U Yesu ahamubhuzya ahati, 'Uyande kulola. Ulwitiho lwaho lwe lwakuponia. ' ⁴³ Ahabhalilo hanaho, 'Ahanda kulola, ahamulandata u Yesu kumo akumupala Umulungu. Abhantu webhazilola zinizyo bhope bhahamupala Umulungu.