1 Ine ne mzabibu uwa yoli, nu tata wani mulimi uwa mzabibu. 2 Kila mbaswa mukasi yani lyeli takupapa amatunda ingulyefwa, ni mbaswa ye yikupapa amatunda ingulyozya ingelipape amatunda aminji. 3 Imwe tayali mwebha zeru kunongwa ya ujumbe wimbelile imbabhuzizye. 4 Mwihale mukasi yani, nine mukasi yinyu. Inze vweimbaswa yitangawezya kwihala yene lingelitabha mmuzabibu, sheshisho nimwe, ingemtihala mukasi yani. 5 Ine ne mzabibu, imwe mwe mbaswa. Wakudila mkasi yani nine mukasi yakwe, umundu unu akupapa amatunda aminji, kubha indabha ine mutangawezya kubhomba ijambo lyolyondi. 6 Inge umundu wowondi tasyale mukasi yoni, atitugwe ngati mbaswa na kwuma; abhandu bhakubhunganya imbaswa na kutaga mumwoto, na kupwa. 7 Inge mwadila mukasi yani, ninga mazwi gani ingega dila mukasi yinyu, labhaji lyolyondi lyemukwanza, nimwe mutibhombelwe. 8 Kulili Utata wani apalilwe, kuti mukupapa amatunda aminji n akuti mwebhanyili bhani. 9 Inza utata wani vwanganile ine, nine bhulo imbaganile imwe; mudilaje mulugano lwakwe. 10 Inga mwazilema iamri zyani, mutidile mulugano lwani inzashe nzilemile iamri zya Tata wani na kudila mulugano lwakwe. 11 Nalonga amambo iga kukwinyu inga kuti kusha kwani kubhe mukasi yinyu na inga kuti kusha kwinyu kubhombeshe kubha kufishile. 12 Ini yendajizyo yani, kuti muganane munemwe kwa munemwe inza weimbaganile imwe. 13 Nawumo umundu weali nulugano ulupiti kuhila ulu, kuti agafumwe amaisha gakwe kwaji ya bhamanyani bhakwe. 14 Imwe mwebhamanyani bhani inga mkubhomba gala geingubhalajizya. 15 Indakubhita bhasondelezya, pekuti umusondelezya atakumanya shila sheakubhomba umwene wakwe. Ingubhita imwe bhamanyani, kunongwa imbabhuzizye amambo gondi genivwizye kufuma kwa Tata. 16 Mutasebhile ine, yoli ine nabhasebhile imwe na kubhabhiha mubhale mupape amatunda, na itunda lyinyu lipate kwihala. Ili liliishi inga kuti shoshondi shemukulabha kwa Tata kwizwi lyani, atibhape. 17 Amambo iga ingubhalajizya kuti mganane kila mundu nu wamwabho. 18 Inga uwulimwengu wutibhilamwe, mumanye kuti wanilamwilwe ine wewushi kubhilamwa imwe. 19 Inge mwamile mwebhamwulimwengu, uwulimwengu hani wubhaganile inza bhakukwabho; Ile kunongwa yetemwebhawulimwengu, na kunongwa ye nabhasebhile kufuma kuwulimwengu, kwajili yini uwulimwengu wukubhilamwa. 20 Mukumbuhaje izwi lyenabhabhuzizye, ;'Umusondelezye temupiti kuliko umwene wakwe.' Inge bhandesile ine, bhatibhatese nimwe bhulo; inga bhalemile izwi lyani, hanibhalilema nilyinyu bhulo. 21 Bhatibhabhombele amambo iga gondi kwajili yi tawa lyani kunongwa ye bhatamumanyile ula wansondelezizye. 22 Ingindizile na kubhabhuzya bhuzya, hani bhatabhombile imbibhi; ilelo ishi bhatali nuudhuru kwimbibhi yabho. 23 Wakunilamwa ine akumwilamwa nu Tata bhulo. 24 Ingeindabhombile imbombo muhati yabho bhenumo hata weka wayibhombile, hanibhatali ni mbibhi; ile ishi bhabhombile gondi gabhili bhalolile na bhnilamwilwe ine nu Tata wani. 25 Ili likufumila inga kuti izwi lifishile lye lyisimbiwe mu sheria yabho: 'Bhakunilamwa bila nongwa.' 26 Ahabhalilo umujinjizyi ayinza, windi msonde kwinyu kufuma kwa Tata, unu wewu, Wu Mupepu uwa yoli, weakufuma kwa Tata, atishudile. 27 Imwe bhulo mukushudila kunongwa yemuli peka nine kukuwandilo.