Sura ya 6

1 Imwe mbhana mbhatinihaje abha pafi bhinyu mwa Mulungu, kwe kuti izi zyana lyoli. 2 "Umtinishe uyise waho" (Ini ndajizyo ya kwanda iya lusubhilo), 3 "Angayibhe kwashi kukwinyu anaa nibhanje na kudila na kwihala ukwinji mnsi umu.'' 4 Ni mwe mbha tata, mtabha visyage abhana kha kubha letela ulwisi, yoli, mbhasungaji mnsoshi na mndajizyo zya Mulungu. 5 Imwe bhabhombi, myunduje kubhasongo bhinyu ibha mnsi mnumu kuyisyaa uku piti na kuyinga kuga mmoyo ginyu. Mbhe nu wu tonsu kukwabho anza vwe mlinu tihiho kwa Krisiti. 6 Uwutonsu winyu wutahabhe pala pe abha songo bhinyu bhaku bhenya kubha khobhosya. Yoli ikuti mbhe mwabhatonsu ngati bhabhombi bha Krisiti. Bhombaji izya Mulungu kufuma mmoyo ginyu, 7 bhabhombelaje kumoyo ginyu gonti pemkumbho mbela wumwene te bhandu, Ikuti mmanye kuti imbombo ye nyinza umindu ya kubhomba, 8 aha yiposhela uwinza kufuma kwa mwene, anga mbhombi ewe umntu umsatushe. 9 Ni mwe bha bhombewi bho mji shinisho kubha bhombi bhinyu. Mtabhogofwage mmane kuti usongo wa bhondi wuwula wali kumwanya. Mmanye kuatakusebhanya iwene. 10 Iwinza, mbhe na maha mwa mwene na kudaga mmaha gakwe. 11 Kwati ivi lwilo vyonti ivwa Mulungu anga mkwi milila shingunga ni ndingo zya syetani. 12 Ibho lyitu te libhanda ni nyama, yoli inhani mumupiti na maha iga mipepu na bhebhihaliye insi kuwulugu iwimpepu imbibhi mnsi iyashi mpepu. 13 Ishi, kwati ivilwo vwondi ivwa Mulungu, anga mbhe namaha kwimilila ahinza kuma bhibhi kuha bhalilo iha aha bhibhi we mwa mala gonti mwimilele inhani. 14 Ishi yimilaji kumaha. Myipinye ilambi nu wanalyoli na vwezili mshifubha. 15 Mbhombaje ishi we mkwatile uwanalyoli mvinama vwinyu uwa kutangazya indumbililo uwalute ngano. 16 Mmadala gondi mwegaje inkwela lya lwitiho, yinga yana kuzimanya ipalala mbhiula. 17 Kwataji inkofwela ya kuponela ni panga lya mpepu, lyelizwi lya Mulungu. 18 Peka ni mputo ni ndabho. Putaji kwa mpepu ahabhalilo hondi. Mgonelelaga mgiga na kujina kubha putila abha sangalusu bhondi. 19 Putaji kwajili yani, anga impewe izwi winkugubula ilomu lyani. Lawaji kuti imanyisye kumaha lyoli yeyi fisishile mndu mbilili. 20 Kwa kulumbilila inena balozi ni nkungiwe ni nkusa izya majera anga kuti mkasi yabho indoje. Muwudanda mzu anza vwinjiganile kulonga. 21 Ishi nimwe bhulo mmanye gindi nago navwi inkujendelela, uTikiko uwa mwitu unkundwa nu mbhombi umwinza kwa mwene, atibhabhuzye inongwa nzyondi. 22 Imsondelezizye kukwinyu kunongwa ingomu anga yoli mmanye zyezilipo itwe, awezye kubhasubhizya amoyo ginyu. 23 Ulutengano lubhe kwa nholo, nulugano peka nulwitiho kufuma kwa Mulungu utata nu mwene witu uYesu Krisiti. 24 Uwila wubhe peka nabho bhebha kuganwa nu mwene uYesu Krisiti kulugano lula lwe luta kufwa.