1 Na pelelo, kubhomba imbombo peka, tukubhalabha imwe mtahaposhele uwinza wa Mulungu pepatali na majawabu. 2 Pe akulonga, "Ahabhalilo hehitishile naliihinza kukwinyu, nisiku ilya kwokolewa na bhavwizye." Yenya, lelo habhalilo hehitishile. Yenya, lelo lisiku ilya kwokolewa. 3 Tutakubhiha iwe ilya shidindizi mwilongolela mwa mundu wowondi, pe kuti tutakuyazila imbombo yinze kwa kusalifwa ukubhibhi. 4 Inga wuyo tukuyenyelezya tunetwe kumambo gitu gondi, pakutintwe bhaputi bha Mulungu. Twe bhaputi bhakwe kuwinji uwa kujimbili la amalabha, amayimba, ubhugomu uwa kudila, 5 kuhomwa, kupinywa, aharanga, kwa kubhomba imbombo kumaha, kukosa utulo, ubhusiku na kunzala, 6 na kuwinza, injere, kujimbilila, uwinza na kwa Mpepu Umfinjile, nakulugano lwe lukuloleha. 7 Twe bhaputi bhakwe kwinzwi ilyiyoli, kumaha ga Mulungu. Tuli ni silaha iya yoli tuturulwe kunyobhe ya bhuluto nushomi. 8 Tukubhomba imbombo kwa kwiha nakutwisya, kwa kulonganya nukupara. Tukulongwa kuti twebhilenga na habhalilo twebhiyoli. 9 Tukubhomba imbombo pakuti tutakumanyihana natushili kumanyihana ihinza. Tukubhomba imbombo ihinza abhafwe na - Yenya! - tushili tukudila. Tukubhomba imbombo inza bhebhekulongwa kugebhakubhomba nteiza bhala bhebhahabhalonga nukubhagoga. 10 Tukubhomba imbombo inza bhebhakuswiga, pea masiku gondi tukwisha. Tukubhomba imbombo inzabhebhatali navwo, pelelo tukubhonjezya abhinji. Tukubhomba imbombo ngati tutalinaho nahamu pelelo inzavwe tulinavwo vwondi. 11 Tulonjile iyoli yondi kukwinyu, Wakorintho, na moyo ginyu giguliwe kubhupiti. 12 amoyo ginyu gatakudindilwa inintwe, ilelo nkudindilwa ni sibho zyinyu munemwe. 13 Kwa kugalulanya kuyoli - ingulonga inza kubhana - yigulaji amoyo ginyu kubhupiti. 14 Mtabhanjepeka na bhebhatakwitiha. Kwe kukuli nakwitihana kubhiyoli ne mbibhi? Kuli nu kwa vwana kwoni kubhuzelu na kuhisi? 15 Kukwitihana kwoni uKilisiti angabha nakwo nu Beriali? Na ghula weayitishile angavwana bhuli peka nawakuhana? 16 Nakuli nakwitihana kwoni kwe kulipo kushibhanza sha Mulungu we mwumi? Peintwetwe shibhanza sha Mulungu we mwumi, inza vwe Umulungu alonjile: "Indiyihala pakasi papabho. Indibha ne Mulungu wabho bhope bhalibha bhandu bhani." 17 Pelelo, "Yepi pakasi yabho, na muyefwe nabho," alonga Utata. "Mtahaleme inshindu inshinyali, indibhakalibisya imwe. 18 Indibha nemwene winyu inimwe mulibha mwebhana bhani abhashisahala na bhashandanda," aonga Umwene Mwenyezi.