¹ Сыс лав Яхвэ кэ Иона, кэ чаво́ Ама́фии, соб тэ пхэнэ́ лэ́скэ. ² «Вшты, и джя дэ Нине́вия, баро́ фо́ро, и роспхэ́н, со лэ́нгирэ на́ лаче де́лы догинэ́ кэ Дэвэ́л». ³ И вштыя́ Ио́на, соб тэ нашэ́л Дэвлэ́стыр дэ фо́ро Фарси́со, и згия́ дэ Йа́ффо. Попэя́ кара́блё, саво́ джя́лас пэ Фарси́со, покиндя́ и загия́ пэ лэ́стэ, соб тэ уджя́л Дэвлэ́стыр дэ Фарси́со. ⁴ Нэ Дэвэ́л бичядя́ ба́ри бава́л пэ мо́рё, и гадыя́пэ дрыва́н ба́ри бава́л дэ мо́рё дя́кэ со кара́блё чуть на розмардя́пэ. ⁵ Здара́ндынэ мануша́ пэ кара́блё, и годла́са, заракирдэ́ кэ пэ́скирэ дэвэла́. И вычурдэ́нас кораблё́стыр саро́ пхарипэ́н, ваш дова́, соб кора́блё тэ авэ́л локхэды́р. А Ио́на змэкья́пэ машкира́л дэ кора́блё, и пасия́ тэ совэ́. ⁶ Кэ ёв подгия́ капита́но кораблё́ско и пхэндя́ лэ́скэ: «Со ту совэ́с? Вшты, и ма́нгпэ годла́са кэ пэ́скиро Дэвэ́л. Мэк тыро́ Дэвэ́л шунэ́ла и заракхэ́ла амэ́н, и амэ́ на хасёва́са!» ⁷ И сарэ́ ракирэ́нас ек екхэ́скэ: «Авэ́н, чурда́са жре́биё и уджина́са, пал-конэ́стэ явья́ ^# адая́ би́да». И чурдынэ́ жре́биё, и ёв сыкадя́ пэ Иона́стэ. ⁸ И пхэндэ́ лэ́скэ: «Роспхэ́н амэ́нгэ, пал-конэ́стэ явья́ ^# адая́ би́да? Со́са ту залэ́спэ и катсы́р ту традэ́с? Савэ́ ту форо́стыр и савэ́ндыр ту манушэ́ндыр?» ⁹ И пхэндя́ лэ́нгэ: «Мэ биболдо́ ^# , мэ патя́в дэ Яхвэ, Ёв Дэвэ́л болыбна́ско, Саво́ скэрдя́ мо́рё и пхув». ¹⁰ И здара́ндынэ дрыва́н мануша́ и пхэндэ́ лэ́скэ: «Пал со ту дава́ кэрдя́н?» Мануша́ уджиндэ́, со Ио́на нашэ́л Дэвлэ́стыр, ёв кокоро́ роспхэндя́ лэ́нгэ. ¹¹ И пхэндэ́ лэ́скэ: «Со амэ́ тэ кэра́с ту́са, соб тэ уштылё́л мо́рё ваш амэ́нгэ?», пал дава́ со мо́рё дрыва́н гадыя́пэ. ¹² И пхэндя́ лэ́нгэ: «Лэ́нте ман и вычурдэ́н дэ мо́рё, и мо́рё уштылё́ла. Мэ джина́в, со тумэ́ попэнэ́ дэ дая́ би́да пал ма́ндэ». ¹³ И сарэ́ зорья́са мануша́ кэрэ́нас дова́, соб тэ докэдэ́пэ кэ пхув, нэ лэ́ндэ на выджя́лас, пал дава́ со мо́рё дрыва́н гадыя́пэ и лэ́нгэ сыс дрыва́н пхаро́. ¹⁴ И загодлынэ́ кэ Я́хвэ и пхэндэ́: «О! Я́хвэ, мэк амэ́ на хасёва́са пал адалэ́ манушэ́стэ, и мэк на загинэ́лапэ амэ́нгэ нанэ́ банго́ рат. Пал дова́, со Ту Я́хвэ, кэрдя́н дова́, со Ту́кэ трэ́би!» ¹⁵ Ёнэ лынэ́ Иона́с и вычурдынэ́ дэ мо́рё, и мо́рё заштылыя́. ¹⁶ Здара́ндынэ адалэ́ мануша́ Дэвлэ́стыр Я́хвэ затринскирдэ́пэ дрыва́н. И зачиндэ́ жэ́ртва ваш Я́хвэ и дынэ́ Лэ́скэ лав. ¹⁷ И бичадя́ Я́хвэ барэ́ маче́с тэ проглотинэ́л Иона́с, и Ио́на сыс машкира́л дэ адалэ́ маче́стэ трин дэвэ́с и трин ратя́.