¹ Hena hubho imereoke iti twaremwa kugurumia mno tubhonie iti ni chedi tushighwe athene uswi bhenye. ² Tukamtuma Timotheo; mndwetu na mhiri ndima wakwe Izubha hena injili yakwe Kristo, bhabhagere ngoro na kubhashingira hena luingidaki lwenyu. ³ Tuhirie hubho esa asiketike mndu eilimanywa ni bhuasi ubhu. Amu nywi bhenye mumaije iti ni hena ibhio tuitangwe. ⁴ Ni kididi iti igheri tookie henyu turongore kubhabhura iti tukiidima kubhetia bhuasi , kikarefumia hubho, naunywi mumaije. ⁵ Hena hubho nimereoke iti nisiidima kugumiria wa, nitumane esa nimanye bhula mohomuendelea na ulo luingidaki. Hengi ula mbhibhi aza abhaetia maghesho na kuketa ila ndima tuhiorie ioke bhesho. ⁶ Kake Timotheo ekimetuzie kufuma henyu etuetie ndumi jedi ja luing'idaki lwenyu na lukundo lwenyu. Etubhurie iti muoho mutukumbuka misi yose, na iti mohomusikia nyami kutubhona sabhundu naswi tohotusikia nyami kubhabhona. ⁷ Hena hubho bhamndwetu, mtushingire mno na ulo luingidaki lwenyu igheri la bhuasi na kubhinyika kwetu. ⁸ Amu iki tohotuikaa, kakicha mnereimuka timu hakwe Mzuri. ⁹ Amu ni haika ani tuidima kumuinga Izubha hena mburi yenyu, kutuinga kuizihiriwa msongorana ha Izhuba? ¹⁰ Kio na hemsi tohotutasa na ng'iria esa tuingwe kutorana tubhainge icho echo chaduika hena luing'idaki lwabho. ¹¹ Shigha Izubha na Papa wetu yemwenye, na Mzuri wetu Yesu, atuete henyu. ¹² Shigha Izubha abhaongejie lukundo ghati yenyu na ha bhandu bhose, sabhula naswi tuhete lukundo nanywi. ¹³ Shigha ahire hubho esa kujiinga ngoro jenyu zinya jioke jisina ibhaa, na jishenete msongorana hakwe Izubha wetu na Papa, hena kuza kwake Mzuri Yesu na bhala bhose bheshenete.