Toko faha 4

1 Avy eo nitodika ary nanaitra ahy toy ny olona tairina amin'ny torimasony ilay anjely izay niresaka tamiko. 2 Hoy izy tamiko hoe: "Inona no hitanao?" Dia hoy aho hoe: "Mahita fanaovan-jiro vita amin'ny volamena tanteraka aho, miaraka amin'ny fitoeran-diloilo eo an-tampony. Misy lela fanaovan-jiro fito eo amin'izany ary misy fantsona fito eo an-tampon'ny lahin-jiro tsirairay. 3 Misy hazon'oliva roa eo anilan'izany, iray eo amin'ny ilany amin'ny tanan-kavanan'ny fitoeran-diloilo ary ilay hafa eo amin'ny ilany an-kavia." 4 Noho izany dia niresaka tamin'ilay anjely izay niresaka tamiko indray aho. Hoy aho hoe: "Inona no dikan'ireo zavatra ireo, ry tompoko?" 5 Namaly ahy ilay anjely izay niresaka tamiko ary nanao tamiko hoe: "Tsy fantatrao ve ny dikan'ireo zavatra ireo?" Dia hoy aho hoe: "Tsia, ry tompoko." 6 Noho izany dia hoy izy tamiko hoe: "Izao no tenin'i Yaveh tamin'i Zerobabela: Tsy amin-kery na amin'ny tanjaka, fa amin'ny Fanahiko, hoy Yaveh tompon'ny maro. 7 Inona moa ianao, ry tendrombohitra lehibe? Ho tonga tany lemaka eo anoloan'i Zerobabela ianao, ary hitondra ny vato atao tendrony izy mba hihiaka hoe: "Fahasoavana! Fahasoavana ho amin'izany!"' 8 Tonga tamiko ny tenin'i Yaveh, nanao hoe: 9 "Nametraka ny fototr'ity trano ity ny tanan'i Zerobabela ary hamita izany ny tanany. Dia ho fantatrao fa Yaveh tompon'ny maro no naniraka ahy ho aminao. 10 Iza no nanao tsinontsinona ny andron'ireo zavatra madinika? Hiravo ireo olona ireo ary hahita ny vato pilao eny an-tanan'i Zerobabela. (Ireo lahin-jiro fito ireo no mason'i Yaveh izay mijery an'izao tontolo izao.)" 11 Avy eo dia nanontany an'ilay anjely aho hoe: "Inona ireo hazon'oliva roa izay mitsangana eo an-kavia sy an-kavanan'ny fanaovan-jiro ireo?" 12 Nanontany azy indray aho hoe: "Inona ireo sampan-kazon'oliva roa akaikin'ireo fantsona volamena roa izay misy diloilo volamena miraraka avy eo aminy ireo?" 13 Avy eo dia hoy izy tamiko hoe: "Tsy fantatrao ve hoe inona ireo?" Hoy aho hoe: "Tsia, ry tompoko." 14 Noho izany dia hoy izy hoe: "Ireo no zana-diloilo vaovao izay mitsangana manoloana ny Tompon'izao tontolo rehetra izao."