Toko faha 21

1 Hoy Yaveh tamin'i Mosesy: "Miresaha amin'ireo mpisorona, ireo zanaka lahin'i Arona, ary lazao izy ireo hoe: 'Aoka tsy hisy na iray aminareo ka handoto ny tenany ho nohon'ny amin'ireo izay maty eo amin'ny olony, 2 afa-tsy ireo havany akaiky azy—ny reniny, ny rainy, ny zanany lahy, ny zanany vavy, ny rahalahiny, 3 na ny anabaviny virjiny izay miantehitra aminy, ambara-pananany vady—fa mety handoto ny tenany nohony aminy izy. 4 Saingy aoka tsy handoto ny tenany amin'ny olon-kafa izy ka handoto ny tenany. 5 Aoka ireo mpisorona tsy hanaratra ny lohany na hanaratra ireo sisin'ny volom-bavany, na hitetika ny tenany. 6 Aoka ho masina amin'ny Andriamaniny izy ireo ary tsy hanimbazimba ny anaran'Andriamaniny, satria ny mpisorona no manome ny fanatitra hohanina ho an'i Yaveh, ny mofon'ny Andriamanitr'izy ireo. Noho izany aoka ho masina ireo mpisorona. 7 Aoka izy ireo tsy hanambady ny vehivavy izay mpivaro-tena sy maloto, ary aoka tsy hanambady vehivavy nisara-bady izy ireo, satria izy ireo dia voatokana ho an'ny Andriamanitr'izy ireo. 8 Hatokanareo izy, satria izy ilay manolotra mofo ho an'Andriamanitrareo. Aoka ho masina aminareo izy, satria Izaho, Yaveh izay manamasina anareo, dia masina. 9 Ny zanaka vavin'ny mpisorona izay mandoto ny tenany amin'ny fahalasanana ho mpivaro-tena manalabaraka ny rainy. Dia aoka ho dorana izy. 10 Izay mpisoronabe eo amin'ireo rahalahiny, izay efa nandrarahana diloilo fanosorana teo amin'ny lohany, ary izay efa nohamasinina hitafy ny akanjo voatokana ho an'ny mpisoronabe, dia aoka tsy hampisarakorako ny volony na handrovitra ny akanjony. 11 Aoka tsy handeha eny amin'izay misy fatin'olona izy ka handoto ny tenany, na ny rainy na ny reniny aza. 12 Aoka ny mpisoronabe tsy handao ny faritry ny fitoerana masin'ny tabernakely na hanimbazimba ny fitoerana masin'ny Andriamaniny, satria efa nohamasinina ho mpisoronabe tamin'ny alalan'ny fanosorana ny diloilon'ny Andriamaniny izy. Izaho no Yaveh. 13 Aoka ny mpisoronabe haka vady virijiny. 14 Aoka izy tsy hanambady mpitondratena, vehivavy nisara-bady, na vehivavy mpivaro-tena. Tsy hanambady izany karazam-behivavy izany izy. Virijiny avy amin'ny olony ihany no azony vadiany, 15 ka tsy handotoany ny zanany eo amin'ny vahoakany, satria Izaho no Yaveh, ilay nanamasina azy."' 16 Hoy Yaveh tamin'i Mosesy, nanao hoe: 17 "Miresaha amin'i Arona ary lazao azy hoe: 'Izay rehetra manana kilema ara-batana amin'ny taranakareo sy ny fara mandimbin'izy ireo, dia aoka izy tsy hanatona ka hanolotra hanina ho an'ny Andriamaniny. 18 Aoka tsy hanatona an'i Yaveh ny olona rehetra izay manana kilema ara-batana, toy ny olona jamba na olona tsy afa-mandeha, izay simba tarehy na sembana, 19 ny olona izay manan-takaitra ny tanana na ny tongotra, 20 ny olona izay misy vokoka ao an-damosiny na kaozatina na fohy, na olona misy takaitra ny masony, na misy aretina, na areti-maso, lagaly, na izay vihy efa torotoro. 21 Tsy misy olona eo amin'ny taranak'i Arona mpisorona manana kilema ara-batana ka hanakaiky mba hanatanteraka ny fanatitra atao amin'ny afo ho an'i Yaveh. Ny olona manana kilema ara-batana toy izany; dia aoka izy tsy hanakaiky ka hanolotra mofo ho an'ny Andriamaniny. 22 Afaka mihinana ny sakafon'ny Andriamaniny izy, na ny sasany amin'ireo masina indrindra na sasany amin'ireo masina. 23 Na izany aza, aoka tsy hiditra anatin'ny lamba fanakonana na hanakaiky ny alitara izy, satria manan-kilema ara-batana izy, mba tsy mandoto ny toerako masina, satria izaho no Yaveh, izay manamasina ireo."' 24 Ka noresahin'i Mosesy tamin'i Arona avokoa ireo teny ireo, tamin'ireo zanaka lahiny, sy ireo zanak'Israely rehetra.