¹ Nanaiky ny fahafatesany i Saoly. Ka nanomboka tamin'io andro io ny fanenjeana lehibe hanoherana ny fiangonana izay tao Jerosalema; ary ireo mpino rehetra dia niparitaka nanerana ireo faritry Jodia sy Samaria, ankoatra ireo apostoly. ² Ireo lehilahy matahotra anÁndriamanitra dia nandevina an'i Stefana ary nanao hira fisaonana azy. ³ Fa Saoly dia nanimba tanteraka ny fiangonana; nitety trano izy ary naka ireo lehilahy sy ireo vehivavy, ary nandefa azy ireo tany an-trano maizina. ⁴ Fa ireo mpino izay niparitaka dia nandeha nitory ny teny. ⁵ Filipo dia nidina tany amin'ny tanàn-dehiben'ny Samaria ary nitory an'i Kristy tamin'izy ireo. ⁶ Rehefa nandre sy nahita ireo famantarana izay nataon'i Filipo ny vahoaka maro, dia nifantoka tsara tamin'izay nolazainy izy ireo. ⁷ Ireo fanahy maloto dia nivoaka tamin'ireo maro izay nidirany, nihiaka mafy, ary maro tamin'ireo malemy sy kilemaina no sitrana. ⁸ Noho izany dia nisy fifaliana lehibe tao amin'ilay tanàn-dehibe. ⁹ Fa nisy lehilahy iray nantsoina hoe Simona tao amin'ny tanàn-dehibe, izay vao haingana no nilalao ody; matetika nampitolagaga ireo vahoakan'ny Samaria izy, rehefa manambara fa izy dia olona manan-danja. ¹⁰ Ireo Samaritana rehetra, manomboka amin'ny kely indrindra ka hatramin'ny lehibe indrindra, dia nihaino tsara azy; ary hoy izy ireo hoe: "Io lehilahy io dia ilay fahefan' Andriamanitra izay antsoina hoe Lehibe." ¹¹ Izy ireo dia nihaino azy, satria izy dia nampitolagaga azy ireo efa nandritry ny fotoana ela tamin'ireo odiny. ¹² Fa rehefa nino an'i Filipo izy ireo noho izy nitory ny filazantsara momba ny fanjakan'Andriamanitra sy ny anaran'i Jesosy Kristy, dia natao batisa izy ireo, na ireo lehilahy na ireo vehivavy. ¹³ Na i Simona aza dia nino, ary taorian'ny nanaovana batisa azy dia nijanona niaraka tamin'i Filipo foana izy. Rehefa nahita ireo famantarana sy asa lehibe izay niseho izy, dia gaga. ¹⁴ Ary rehefa henon'ireo apostoly ao Jerosalema fa nandray ny tenin'Andriamanitra Samaria, dia nalefan'izy ireo tany amin'izy ireo i Petera sy Jaona. ¹⁵ Rehefa nidina izy ireo, dia nivavaka ho azy ireo izy ireo, mba mety handraisan'izy ireo ny Fanahy Masina. ¹⁶ Fa nandrapahatongan'izany fotoana izany, dia mbola tsy nisy nilatsahan'ny Fanahy Masina mihitsy izy ireo; fa vita batisa tamin'ny anaran'i Tompo Jesosy fotsiny ihany. ¹⁷ Avy eo i Petera sy Jaona dia nametraka ny tanany teo amin'izy ireo, ary dia nandray ny Fanahy Masina izy ireo. ¹⁸ Ary rehefa hitan'i Simona fa ny Fanahy Masina dia natolotra teo an-tanan'ireo apostoly tamin'ny alalan'ny fametrahan-tanana, dia nomeny vola izy ireo. ¹⁹ Hoy izy hoe: "Omeo ahy ihany koa izany fahefana izany, ka izay rehetra ametrahako tanana dia mety handray ny Fanahy Masina." ²⁰ Fa hoy i Petera taminy hoe: "Ho levona miaraka aminao anie ny volafotsinao, satria ianao nieritreritra ny hahazo ny fanomezan'Andriamanitra amin'ny alalan'ny vola. ²¹ Ianao dia tsy manana anjara na ampahany amin'izany zavatra izany, satria ny fonao dia tsy marina amin'Andriamanitra. ²² Noho izany mibebaha amin'ny faharatsianao, ary mivavaha amin'ny Tompo, sao mba mety hamela ny fanirian'ny fonao Izy. ²³ Fa izaho mahita fa ianao dia voapozin'ny lolom-po sy voafatotry ny fahotana ianao." ²⁴ Simona namaly ary niteny hoe: "Mivavaha amin'ny Tompo ho ahy, mba tsy hisy hitranga amiko ireo izay nolazainao." ²⁵ Rehefa nijoro vavolombelona sy nanambara ny tenin'ny Tompo izy ireo, dia niverina tany Jerosalema i Petera sy Jaona, nitory ny filazantsara tamin'ireo tanàna maro ao Samaritana. ²⁶ Ary nisy anjelin'ny Tompo niresaka tamin'i Filipo sady niteny hoe: "Mitsangàna ary mandehana mianatsimon'ny lalana midina avy any Jerosalema mankany Gaza." (Io lalana io dia any an'efitra.) ²⁷ Dia nitsangana izy ary nandeha. Indro, nisy lehilahy avy any Etiopia, tandapan'ny Kandasy, mpanjaka vavin'ireo Etiopiana. Izy no niandraikitra ny hareny rehetra. Tonga tany Jerosalema izy mba hidera. ²⁸ Ary nody izy ka nipetraka teo amin'ny kalesany, ary namaky ny tenin'i Isaia mpaminany. ²⁹ Ary ilay fanahy niteny tamin'i Filipo hoe: "Mandehana ary aza miala lavitra an'io kalesy io." ³⁰ Ka dia nihazakazaka nanatona azy izy, ary nandre azy namaky ny teny tao amin'Isaia mpaminany, ary niteny hoe: "Azonao ve io vakianao io?" ³¹ Niteny ilay Etiopiana nanao hoe: "Ahoana no hahafantarako, raha tsy misy olona mitari-dalana ahy?" Niangavy an'i Filipo izy mba hanatona ny kalesa ary hipetraka hiaraka aminy. ³² Ary ny andalan-tsoratra masina izay novakian'ilay Etiopiana dia nanao hoe: "Noentina ho vonoina tahaka ny ondry izy, ary tahaka ny zanak'ondry moana eo anoloan'ny mpanety azy, noho izany dia tsy niloa-bava izy. ³³ Fa tamin'ny fanalam-baraka azy dia nesorina taminy ny rariny. Iza no afaka hamaritra tanteraka ireo taranany? Nohon'ny ainy nesorina teto an-tany." ³⁴ Noho izany dia nanontany an'ilay tandapa i Filipo, nanao hoe: "Mitalaho aminao aho, iza no resahan'io mpaminany io, ny tenany ihany ve, sa olon-kafa?" ³⁵ Nanomboka niteny i Filipo, ary nanomboka tamin'izany soratra masina izany no nitoriany ny filazantsara momba an'i Jesosy taminy. ³⁶ Rehefa nandeha teny an-dalana izy ireo, dia nanatona teny amin'izay nisy rano izy ireo ary hoy ilay tandapa hoe: "Indro, misy rano eto. Inona no mahasakana ahy tsy atao batisa?" ³⁷ (Fanamarihana: Hoy Filipo hoe: "Raha mino amin'ny fonao manontolo ianao, dia afaka atao batisa." Ilay Etiopiana namaly hoe: "Mino aho fa Jesosy Kristy no Zanak'Andriamanitra.") ³⁸ Ka nasain'ilay Etiopiana najanona ilay kalesa. Nidina nankeny amin'ny rano izy ireo, i Filipo sy ilay tandapa, ary nataon'i Filipo batisa izy. ³⁹ Rehefa nivoaka ny rano izy ireo, dia noentin'ny Fanahin'ny Tompo i Filipo, ka tsy hitan'ilay tandapa intsony izy, fa nandeha tam-pifaliana teny amin'ny lalany. ⁴⁰ Fa i Filipo dia niseho tany Azota ary nitety io faritra io izy, nitory ny filazantsara eraky ny tanan-dehibe rehetra mandrapahatongany tany Kaisaria.