¹ Djésu ama nangame mu buatu, ama wende o disimu dimosi, na ama wende o divule diandi. ² Mbana bama mubeyile dibale diyimbolutu yisilime va tangi. Ano labe yitu yogu, Djésu ama vosa na mutu yimbolutu riè: "Mwanami wara; masumu magu mama utandu." ³ Basonitsi bamosi ba mighagha,bama vosa otsi mirime miogu riè: "mutu eghughu é sabuli." ⁴ Djésu o ama djambange matasa mogu ama vosa riè: "dibandu yi dubile na matase ama bive mu mirime miénu ?" ⁵ Adi diwèlimine uvose : yi " Masumu magu mama tandu" no vose " retsema na wende ?" ⁶ Tumba djabanu riè : mwane mutu ama musuga va butamba mu tande masumu, ama vose na yimbolutu riè : "retseme, bonge tangiagu wende mu ndawaghu." ⁷ Na mutu amaretseme no wende mu ndaghu wandi. ⁸ Ave yinombu amalabile dioni bama base na yiomumu naba ma yitse Nsambi o ama veghe munonghu durumu duéni ombu batu. ⁹ Djésu ano viole vana ama labe mutu énenghulu Mathieu, dimabe ditsana va mbura babolitsi ba lépu na ama mutsingule yiriè : " nduki." ama retseme no muduke. ¹⁰ Djésu na badukitsi bandi bamabe va mulambu mu ndaghu; va mabe babolitsi ba lépu bapuèle na batu abamabe na didume dibive bamabe vo mulambu mu gudji nandi na badukitsi bandi. ¹¹ Bafarisi banolabe nana, bama tsingule badukitsi ba Djésu riè : " dibandu yi fumu enu elili na babolitsi ba lépu na batu bavu na didume dibive ?" ¹² Djésu ano dighulu, ama ba tsingule riè: batu avu polu baghane tsale mubughitsi, bu djoghu abébéli abavu na ntsale mubughitsi. ¹³ Wendanu na widjanu divindugulu diédidi riè : "menu ni labi ubuédji mu yingheba tsiri mu bapaghu mu mbari, nima rughu tsiri mu rombe abe sungame mu dukalughu du dièle tumbe bavayitsi bamabi. ¹⁴ Mbana badukitsi baJean bamarughe ombu ghandi no mutsingule riè : "dibandu yi djétu na bafarisi ti warili nsale, mbana badukitsi baghu baghe divayi ?" ¹⁵ Djésu ama baghuaghule riè : "abé nenghulu va mulambu diwèle bo rungule ube na yinghebe pa buendiri yiwèle yimughetu aki noghu? nési, tumbe bilumbu birughe adji yiwèle yimughetu o barambusulu na vane, bo warile ntsale. ¹⁶ Vaga mutu énamiyi yirendi ayi gone mu tsande adji ghulu, mumbari yirendi ayi gone yiu duta tsande adji ghulu, mbana ju sintsigha upasighe. ¹⁷ Vaga mutu éwitili malamu ma ghone mu mirumbe abi ghulu.Pa ama divaghe mirumbu miyubulighe. Tumbe malamu ma ghone me witulu mu mirumbu mi ghone, na biotsu bibedji bi kelusu buranga. ¹⁸ Avu Djésu ama ba tsingulilanga mambu meni, yidjiéti yimosi yi bajuife va ghari oghu yimaruga no yi kutume va gusu Djésu. no vose riè: "mwanami mughetu amafu, vakabe yitsinghu tumbe rughe na musakiyi dikaka diaghu na o rambughe." ¹⁹ Djésu ama retseme na amamuduke na badukitsi bandi. ²⁰ Mu temu mosi, mughetu a ghuma tsoghanghe puéle na muvuve malunghu mu dighumi na bilime bibedji, amaruga o nsima Djésu mu bemba dungongu du yikutu yiandi; ²¹ mumbari ama vosa riè: "Pa nuirungula ubemba nesi yika dungongu duyikutu yiandi, niu beluga." ²² Mbanana Djésu ama ghelughe, ama mu labe na ama mutsingule riè: mwanami umughetu, ware, yitu yaghu yima ghobule." Na mughetu eni ama sundile ubelughe. ²³ Avu Djésu ama tolile mu ndaghu yidjéti yi mujuife, ama labe batu bama basinganghe mambike na yinombu yinéni yimavaghanghe nduku djinéni. ²⁴ Ama ba tsingule riè: "wendanu dundanu nimbu tsi banfuanghe Mumbari mwana egu umughetu aghafu, tumbe adji yilu."tumba djoghu bamamudèse. ²⁵ Avu yinombu yima palusulu o dulombili, Djésu ama kote o ndaghu na ama mughangha mu dikake; na mwane ama rambugha no retseme. ²⁶ Yilumbi yéni yimaniave mu musiengi wotsu. ²⁷ Mutemu adji Djésu ama rambuyile va mbureni, bidungha bibédji bima yena mudukanghe; va ntsime ; basama toghe gugamughe no vose riè: "tula yinghebe, Djésu mwane David !" ²⁸ Avu Djésu ama tolile o ndaghu, bidunghe biéni bima bambene nandi. Djésu amabawivule riè:" Dui tasi yiri nyiu rungule u disalise ?" Bama muwaghule riè : "nine Fumu." ²⁹ Kaboghu Djésu ama bembe misu moghu na ama batsingule riè: " divaghulu nane yitu yénu." ³⁰ Na misu moghu mama dibugha. Mba Djésu amabarume riè : "vayabe né mutu mosi o dijabe." ³¹ Tumbe batu béni ba bédji bama yene niavise yilumbi mu musiengi wotsu. ³² Ave babale béni babédji bama wendilanghe, na beghe dibale dimabe dibaba na dimabe diganghu na yiniuni yibive ombu Djésu. ³³ Avu yiniuni yiéni yima santsulu, dibabe diéni ama vose.Mughungi umakambulu na bama vose riè: "Didi disake labenanghe mu Israèl !" ³⁴ Tumbe bafarisi bama vose riè: na yivunde yibinyuni bibive esiantili binyuni. ³⁵ Djésu ama nanghangha mavule motsu na mimbu, na ama yène buesanghe ulontse mu ndaghu tsiogu tsi bibenghunu, ama yiena samunangha musamu uboti u bufumu no bélusanghe minonghu miotsu mimali na minonghu miotsu mibibonfi . ³⁶ Ave ama labile mughungi, ama basu na yingebe mu mbari yimabe na mbulighe. Nana mugambe ughambu na mubéyitsi. ³⁷ Ama tsingule badukitsi bandi riè: " Nungi djima roghe tumbe basalitsi bagha puèle. ³⁸ Kaboghu sambilanu fumu nungi, yiri ake tinde basalitsi mu nungiandi."