Dianciamilie 1

1 Bi bujiaba, mi koma den tieni u dogu nni. Ya joa n ñani Betelema Jude diema nni den fii leni o pua leni o bijaliediba ki ban kali Moabi dogu nni yogunu ba. 2 Laa joa den yi Elimeleki, o pua mo den yi Naomi, o bijaliediba mo yendo den yi Makiloni o lielo mo Kijoni, bi den tie Yufilata buolu yaaba ki ye Betelema Jude diema nni.Ban den pundi, bi den kali Moabi dogu nni. 3 Naomi calo Elimeleki den kpe ki ŋa o wani leni o bijaliediba. 4 Bi den taa Moabi diema nni, yendo den yi Olipa o lielo mo Luta, bi den kali likani nani bina piiga. 5 Makiloni leni Kilijono moko den kpe ki ŋa Naomi wani obebe. 6 Lani, wani leni o biyuamu den ki ǹani Moabi dogu nni, kelima wan den ye Moabi dogu nni ya yugunu, o den gbadi ke li Miali Diedo goandi o niba ki den puni ba mi jiema. 7 O den ñani wan den ka naankani wani leni o biyuamu, ki taa u sanu ki baa guani Jude diema nni. 8 Lanwani Naomi den yedi o biyuamu: Yi kuli n guani ki kuni yi danba po! L i Miali Diedo n ŋanbi yipo nani yin den ŋanbi npo maama! 9 Li Miali Diedo n teni yikuli n baa bi jaba ki go pa yi mi yemanma yi ciaba diedi nni! O den gobini ba ki cabi ba. 10 O biyuamu yeni den kpaani ki buudi, ki yedi o: Aa, ti baa yegi leni a ki gedi a buolu yaaba po. 11 Naomi den yedi ba: N bisiaba, lebidi mani ki guani. Be yaapo ke yi bua ki ŋoadi nni? Naani n baa fidi ki go maa ya bila n baa tua yi ciaba? 12 N bisiaba lebidi mani ki gedi? Kelima n podi ki pendi yua n go baa kuni joa. Baa n ya yedi: N pia mi suginma, baa dinla ñiagu n ya taani leni joa ki mali bonjala, 13 naani li baa tuo yin guudi hali ban fandi? Naani lani yaapo baa yin yie ke yi kan kuni jatoaba? Kelima yi yaapo baa teni min ya ye leni li paboancianli, ke li Miali Diedo nu mo faligidi nni. 14 Bi go den buudi boncianla, Olipa den gobini o yaana ki cabi o leni mi buama. Ama Luta wani den yie ke o kan ŋuadi o. 15 Naomi den yedi Luta: A polielo lebidi ki guani o buolu yaaba po leni o buli po, amo n lebidi ki guani nani o polielo n guani maama. 16 Luta den goa ki yedi o: Han da tigini nni ke min lebidi ki ŋa ŋa. Han baa gedi naani n baa gedi lipo, ŋan baa ye naani n moko baa ye lankane, a nibuolu baa tua n nibuolu, a Tienu mo baa tua n moko ya Tienu. 17 Han baa kpe naankani n moko baa kpe lankane, bi baa piini nni lankane. 18 Naomi n den la ke o jagi ki baa yegi leni o, o den cedi kaa go yie opo. 19 Bikuli den taani ki yegi hali ki ban puudi Betelema. Ban den koa Betelema dogu nni ya yogunu li den lidini u dogu yaaba kuli opo ke bi puoba tua: Naani li ko tie Naomo yo? 20 O den yedi ba: Yin da go yini nni Naomi, yin ya yi nni Mada kelima U paaciamu Daani gbieni nni leni li paboanli. 21 N den ye mi yemanma nni min den caa ya yogunu, ama Li Miali Diedo guani nni leni nakuomu. Be yaapo yi go yi nni Naomo? Li Miali Diedo diidi nni leni mi yebiadima ki waai nni fala. 22 Maomi n den ñani Moabi diema nni ki kpeni maama n yeni wani leni o biyuaga Moabi diema yua. Bi den pundi Betelema u jetaagu cilima yogunu.