¹ Jesu Kilisiti doagidima yaama ke U Tienu den teni o, ke wan waani o naacenba ya bonla n ba ti tieni ke li kan go waagi. ke o den soani o maleki, o naacemo Jan kani, ke wan teni wan bandi laa bonla kuli. ² jan den tieni siedi, ke wan den laa yaala kuli tie U Tienu maama leni Jesu Kilisiti yaa siedi. ³ Li pamanli ye leni yua n cogi leni yaaba n gba yaa sawali maama n diani ki go kubi likuli mo, kelima li yogunu nagini. ⁴ Mini Jan n diani ya tili n tie ne, Kilisiti n yini yaa nitaanleleeda ya n ye Asi diema nni po. U Tienu yua den kpa ye, ki ye moala, ki ba ti cua leni o Fuoma lelee yaama n ye o balikalikaanu nintuali. ⁵ Leni Jesu Kilisiti yua n tie o siedi-dugika, ki tie o nikpialo yua kpa fii bi tinkpiba siiga; ki tie ŋanduna kuli badiba Bado, wani yua n bua ti, ki den faabi ti, ki ñani ti ti tuonbiadi nni, kelima o soama yaapo, ⁶ ki go teni ke ti tua kopadicianba diema o Baa U Tienu po, wani n yaa die ti kpiagidi leni u paaciamu hali ya yogunu kuli. Amina! ⁷ Diidi , o kpendi a tawala nni , nunbu kuli baa le o , baa yaaba n den muu o. ŋanduna nibuoli kuli baa buudi kelima o yaa po. Yene. Amina. ⁸ O Diedo U Tienu , U Paaciamu Kuli Daano yua n ye , ki den ye , ki go ba ti cua , wani n yedi : Mini n tie alifa len omega. ⁹ Mini Jan, yi kpiilo yua n taa leni yi o falaciamo leni U Tienu diema , leni li juunli nni Jesu nni , bi den gedini nni Patimosa kpendigili kelima U Tienu maama leni Jesu ya siedo po . ¹⁰ O Diedo daali , U Tienu Fuoma den cuo nni , n den gbadi u nialiciamu n puoli , ke u tie nani kakaci yeni . ¹¹ U den tua : ŋan nua yaala , ŋan diani la li liti nni ki soani li Kilisiti n yini yaa nitaan leleeda yaa n ye Efesa Similina , Peligama ,Tiatila , Salida , Filadelifi , leni Layodise dogi nni kuli po . ¹² N den jigidi ki baa bandi yua n maadi leni nni. Lani min den jigidi ya yogunu n den laa wula fidisantuan-kaani lele . ¹³ I fidisantuan-kaani leleedi yeni siiga den pia yua n naani leni o nisaalo bijua ke o laa liadicianli ke li jiidi hali o tafaadi , ki ñaagi o benli po wula ñagidu. ¹⁴ O yuli leni o yudi den pieni pai pai nani ti kunkundi yeni. O nuni den tie nani u mupienu yeni . ¹⁵ O taana den naani leni ban tongi ya kumoandi u maafanu nni ke ti moandi yeni . O nialu mo den tie nani mi ñinciama ya fuugu yeni . ¹⁶ O den muubi ŋmabila lelee o najienu nni. Jugisieñoaliedi yaaga mani den ña o ñoabu nni. O nunga mo den ñuliti nani u yienu n yen kpadi u yensiinu maama yeni. ¹⁷ Min den laa o ya yogunu , n den baa o taana kani nani n kpe yeni. O den maani n po , o najienu ki yedi: Han da jie liba mini n tie o kpialo leni o juodika ¹⁸ leni yua n fo , n den kpe , ama diidi ki le , n go fo ki baa ye hali ya yogunu kuli. N kubi mi kuuma leni bi tinkpiba yekaanu kile. ¹⁹ Lanwani , diani ŋan laa yaala , yaala n ye moala , leni yaala n ba ti yuandi ki cua. ²⁰ Yaala n bundi ŋan la ke n muubi ya ŋmabileleeda n jienu nni yeni , leni wula fidisantuan-kaani lele yeni tie line yo: a ŋmabileleeda tie Kilisiti n yini yaaba nitaanleleeda ya malekinba , fidisantuan kaani lele yeni mo tie Kilisiti n yini yaaba nitaan lelee yeni.