¹ Tin maadi yaa maama kuli , mi siiga yaalin pia li mayuli tie ke ti pia yaa kopacianbado n kali tampoli U tienu yua n pia ti kpiagidi balikalikaanu o jienu po . ² Lan kane ke O tuuni u kaangagidiŋamu nni O Diedo wani O yaaba n sieni ya gbandiemoanli , ke o nisaalo ka sienli . ³ Kopadicianbado kuli bi yen dini o ke wan yaa kpendi nni U tienu kani bu paabu leni a pada ; naan kani ke li tie tiladi Jesu moko n yaa pia wan baa pa yaala . ⁴ O yaabi ye ki tingi n po , O kaa bi tie ba kopadiciamo moko kelima yaa kopacianba n kpendi nni mi buama nani li balimaama n bili maama da ye . ⁵ Ban tuuni ya tuonli yeni , tie yaali n tiendi tanpoli , li nannanli leni li junjungu .nani U tienu n den kpa wani Musa maama wan den ba sieni li gbandieli ya yogunu ki yedo : ŋan yaa faami ki tieni li kuli bonŋanla nani ya nannanli ke wani ŋa li juali po yeni . ⁶ Ama moala , Jesu pia yaa tuonli n ŋani ki cie lani , kelima O tie ya ŋantaado n ŋani ki cie yaa candanbaalo . yaa ŋantaado n se u ñoanianŋamu po . ⁷ Kelima o ŋantaadi cialo yaa den pia poado ba kuli , laa den pundi yaala ban lebido leni o bonyuanlo . ⁸ Kelima li tie leni i jaligi ke O Diedo den maadi leni isaleleenba yaaba ki yedi : diidi O Diedo yedi ke u yogunu kpenda yaa yogunu ke n baa kuani o ŋantaadi pano Isaleleenba yaaba leni Juda yaaba siiga . ⁹ Ya ŋantaado n ka ta leni min den kuani leni bi yajanba yua . Min den cuo bi nii ya daali ki dadi ki ñani ba Ejibiti diema nni . kelima baa den tuo ki kubi n ŋantaado , n moko mii den yagi n yama kelima bi po ; O Diedo n yedi maama . ¹⁰ Diidi mani min baa kuani ya ŋantaado leni Isaleleenba yaaba buolu . O Diedo yedi li yaa puoli , n baa kuani n balimaama bi yantiana nni , n baa diani ma bi pala nni , n baa tie bi Tienu bi mo baa tie n nuba . ¹¹ O baa kuli kan go cogini o yieninlielo , bi o kpiilo ki yedi o ; bandi O Diedo , kelima yua kuli baa bandi nni . ki cili bi siiga ki bonwaaga kaa ca hali o nikpelo . ¹² Kelima n baa paba sugili leni bi tudima kuli po , n kan go yaa tiadi bi tuonbiadi . ¹³ Nani wan yedi : o ŋantaadi paano yeni li tie ke O doagidi waani ke o ŋantaadi kpialo kpeligi . ki sua yaali n kpeligi mo tie yaali n podi , lan mo n tie yaali n pendi .