1 Cilele ŋmaalo piilie n danyenli, Li Miali Diedo den maadi leni o sawalipualo Aje ki yedi o: 2 Maadi leni Salitieli bijua Solobabeli, Juda gufeneelo leni Yehosadaka bijua bi kopadicianba bado Josue leni ya niba n sieni kuli ya maama n tie ne: 3 Yinba bi diidikaaba, yi siiga pia yaaba n den kpa laa ku naa diegu n den pia ya kpiagidi bi? Moala mo yi nua gu lede? yii nua ke kuu pia fuoma te. 4 Moala, Solobabeli, paagi a pali! Li Miali Diedo n yedi yeni. Paagi a pali, Yehosadaka bijua Josue o kopadiciamo leni ya niba n sieni kuli ki ye mi diema nni, paagi mani yi pala Li Miali Diedo U paaciamu daaano n yedi: Fii mani ki yaa tuuni, kelima n baa ya ye leni yi, Li Miali Diedo U paaciamu daano yedi yeni. 5 N kubi min den pia leni yi ya ŋantaado yi den ñani Ejipiti diema nni ya yogunu, n Fuoma ye yi siiga yin da jiemani. 6 Kelima Li Miali Diedo U paaciamu kuli daano yedi: Li go sieni yogunu waamu, n baa teni tanpoli leni ki tinga digibi, mi ñincianma leni ki tinkuonga. 7 N baa tigibi i nibuoli diema kuli, n baa gbieni ku naa diegu leni n kpiagidi. Li Miali Diedo U paaciamu kuli daano n yedi yeni. 8 Ki tinga wula leni ki ŋalinjufa kuli tie min die yaale. Li Miali Diedo U paaciamu kuli daano n yedi yeni. 9 Ku naa dieyuangu ya kpiagidi baa yabi ki cie ku diekpiagu, L i Miali Diedo U paaciamu kuli daano n yedi yeni. Li tie ya kaanu n tie ne niinne ke n baa pa yi mi yanduanma. Li Miali Diedo n yedi yeni. 10 Ciyie ŋmaalo piilie n dannaali, Daliyusa bali binlieli binli. L i Miali Diedo den maadi leni o sawalipualo Aje. 11 Li Miali Diedo den yedi: Buali bi kopadicianba ya buali n tie ne ban guani apo. 12 O nilo ya gbabini o tiadi ya nangu n gagidi U Tienu po, ke o tiadi yeni sii dupen, kpintiidi, kpama, bi jiemaba laa jiema baa gagidi U Tienu po bi? B i kopadicianba den A a! 13 Aje go den yedi: O nilo ya sii kpiemo ki joagini o yuli U Tienu po ki gi sii jiemaba, naani laa jiema baa gagidi U Tienu po? Bi kopadicianba den goa ki yedi: Mi jiema baa joagini U Tienu po. 14 Lanwani Aje den guani ki yedi: Li Miali Diedo den yedi mi naa diema leni bi niba leni ban tuuni ya tuona kuli tie yene npo. Ban padi npo yaala kuli tie yaala n joagini. 15 Li Miali Diedo yedi: Kpaagi mani yaala n den tieni leni yaala n tiendi moala. Hali yin daa den cili n diegu maama ya yogunu. Nilo ya bi den gedi ki baan ñani o senbili nni dibaabuodi piilie, o yen sua ke baabuodi piiga bebe n ye. 16 Nilo ya bi den gedi duven tuodikaanu po ki baan ñani taditi piimu, o yen sua ke taditi piilie bebe n ye. 17 N den tieni ke yi kuani biidi ke u diyianu leni a tatana moko den biidi yi kpaangu. N den biidi yi nii n soani yaa tuonli. O Diedi yedi: Ba yeni mo yii den lebidi ki guani nkani. 18 Kpaagi mani bohanla yaala n den kpa tieni yi ki pundi hali ki cili ciyia ŋmaalo piilie n dannaali, ki cili hali yaa daali yi cili L Miali Diedo diegu maama. Yin kpaagi mani lipo bohanla. 19 Naani yi jiema go sieni yi senba nni bi? Ba i tiluonke, i kankandi leni ya tibuoli kuli n sieni ki luoni ya bonluonkaala n ŋani liba kuli ki go luoni. Ama ki cili dinli leni dinla liiga, n baa teni n sela n jiidi ki yabidi yipo. 20 Ciyia ŋmaalo piilie n dannaali daali yeni. Li Miali Diedo go den maadi leni Aje mi taaliema ki yedi: 21 Yedi juda gufeneelo ya maama n tie ne: N baa teni tanpoli leni ki tinga n digibi. 22 N baa fiini bi baditieba bi balikalikaani po ki bolini i nilanbuoli diema paalu ki go bolini bi toatieba leni bi toateliti kuli. N baa pua ki yedi i taami leni yaaba n jagi ba kuli. Bi baa kpa bi taami, yaaba n jagi ba mo baa kpa biyaba leni mu jugisiemu. 23 Li Miali Diedo yedi: Laa daali n baa ta Salitieli bijua Solobabeli n naacemo ki teni ŋan tua maalima kelima n den gandi fine, Li Miali Diedo U paacianu kuli daano n yedi yeni.