Dianyendu 1

1 Daliyusa bali binlieli binli, ciluoba dakpiali daali, Li miali Diedo den maadi leni osawalipualo Aje, o den soani o Juda gufeneeli, salitieli bijua Solobabeli kani leni bi kopadicianba bado, Yehotidaka bijua Josue kani. O den soani ki yedi: 2 Ke wani li miali Diedo upaciamu kuli daano yedi yaa maama n tiena: Ya nibuolu n tiena tua ke ban baa goa ki maa n diegu yaa yogunu daa pundi. 3 Lanwani Li miali Diedo den soani osawalipualo Aje bi kani ke wan yedi ba ya maama n tiena, 4 naani yi sua ke li hani yin yaa ye a diehama ya pia mi ñuadima ke n ya diegu nan mumudi ki se diejengu? 5 Lane li miali Diedo upaciamu kuli daano den yedi ba ya maama n tiena: diidi mani yaa yema n baa yi. 6 Yi buu boncianla ki nan yendi waamu, yi di ama yii guodi, yi ñu ke yi ñuulu naa gbendi, yi bobi ti tiadi ke wadi naa gbendi, yua n tuuni ki gaani panpaani li nani o hu li boagicibinli nni yeni. 7 Li miali Diedo upaciamu kuli daan go yedi ke yin kpaagi yaala n baa yi na po. 8 Li miali Diedo den yedi do mani li juali po ki ban pedi ti daadi ki tugi ki cuani ki maa n diegu lane n pali baa mani ke yi kpiagidini nani lan pundi maama. 9 Yi den daani ke yi baa ba ti kpaandi boncianla ama yi baa waamu bebe. Yi tugi lani moko ki kulini yi denpo ke n piebi ke li yayadi. N tieni la kelima yi ha ke n diegu mumudi ki se diejengu, ke yi siiga yua kuli nan moandi ki hanbi o ya diegu. 10 Li tie lani yaapo yo ke tanpoli yie ke o kan teni mi ñima, ki tinga mo yie ki kan luoni. 11 N teni ke uyialu cua mi diema nni, ke ajuana yula po kuodi, alikama kuani kuodi, duven tiidi kuani kuodi, olifie tiidi kuani kuodi, yaa bonbulikaala n sieni kuli kuani kuodi, ti yandi leni bi niba kuli laadi li po fala, yi nii tuona kuli biafanma. 12 Salitieli bijua Solobeabeli leni Yehotisadaka bijua bi kopadicianba bado Josue leni ya niba n sieni kuli den tuo ki huadi li miali Diedo bi Tienu maama, bi den tuo ki huadima nani U Tienu n den soani osawalipualo Aje ke ocua ki caaba maama. li fangili den cuo bi niba kuli li miali Diedo nintuali. 13 Li yaa puoli U Tienu tondo Aje den caaba li miali Diedo tondu yu n tiena: N baa ye leni yi, mini li miali Diedo n yedi yeni. 14 Li miali Diedo den fundi Juda gufeneeli Solobalobeli leni bi kopadicianba bado Josue leni yaa niba n sieni kuli yantiali. Bi den fii ki cili ki maa li miali Diedo upaciamu kuli daano diegu. 15 Daliyusa bali binlieli binli ciluoba piilie n danaali daali.