¹ Ti kpiiba n bua yin bandi U tienu ŋanbili n doagidi Maseduna jandiena yaaba po maama . ² Ba leni ban den la fala boncianla , bi den ye leni li pamancianli . ba leni bi luokandi kaama kuli , bi den fidi ki puni mi todima bonŋanla . ³ N tie bi siedo , bi den puni leni bi pala kuli nani yua kuli n fidi maama , ke li den pendi ki cie ba bi fidu bianu . ⁴ Bi go den mia ti leni mi tiginma ke tin tieni bi po li ŋanbili ban moko n fidi ki todi U tienu ni gagidiŋanba . ⁵ Bi den tieni ki cie ba tin den tama maama kelima bi den kpa puni bi yula O Diedo , ki den yuandi ki puni bi yula tinba leni U tienu yanbuama . ⁶ Lan wani , ti den mia Tita wan ŋanbi ki dudi yaa tuonŋanli ke o den cili yeni . ⁷ Nani yin ye liiga li bonli kuli nni maama yeni , yaalin tie yi dandanli nni , mi maama nni , mi bandima nni , li yankoaliali li bonli kuli nni , leni yi buama ti po ,yin tieni ŋania ki yaa go ye liiga laa tuonŋanli yaa niini . ⁸ Laa tie ke n bili yi po ñoabonli ka , ama n togidi yi nitoaba n pia yaa yankoali . ki bua ki biigi ki lee , yi buama ya tie buamoanma . ⁹ Kelima yi bani ti Diedo Jesu Kilisiti ŋanbili , wan yua n den tie piado , o den tua luodo kelima yi yaa po . lan tie O luoma , nni yin tua piada . ¹⁰ N wani yi min la maama li po ; n la ke lani n dagidi leni yi . yinba yaaba n den kpa cili ki tendi yi todima . lan bebe ka , yi den pia laa yantiali hali jeli . ¹¹ Yin tieni ki dudi yin den cili yaa tuonŋanli leni yaa yankoali ke yi den cili ki ba . ¹² Li yankoali yaa ye , li tie yaali n dagidi U tienu po . kelima o baa kuli kan fidi ki teni wan kaa pia yaala . ¹⁴ Laa tie ke n bua yin kpaadi yin pia yaala ka ki teni nitoaba ; ama n bua li bonli kuli n yaa da leni li yala . ¹³ ke moala n po yin pia yaala ke li kandi n tua todima ban luo yaala Ke ban moko n pia yaali ke li kandi n todi yi moko yin luo naani , lani n tie li bonli kuli n dagidi cain . ¹⁵ Nani lan diani maama : yua n wodi boncianla naa pia ke li kandi , yua mo n wodi waamu laa poadi o . ¹⁶ U tienu n baa i tuondi leni wan tieni Tita moko yaa pali nni laa tiginma yi po . ¹⁷ Kelima o den tuo ti miabu , leni li yankoali . leni o yantiaceli , o ñani ti kani ki baa gedi yi poo . ¹⁸ Ti soani o leni ti kpiilo yua ke bi niba kuli tendi o po o siedi a jandiena nni kelima wan tuuni yaa tuonŋanli o labaaŋamo wangimi po . ¹⁹ Wane ke a Jandiena go den gandi wan n tua ti yegini n lielo mi naa todima tuonli yaa sancenli nni . tin tiendi yaa tuonli kelima O Diedo yaa yeli kpiagidi po . ti go bua ki doagidi ki wani yi ke ti moko yama ye lien ni . ²⁰ Ti tiendi yeni kelima tii bua o ba kuli n sugi ki joagini ti yela , kelima laa todicianma po , yaa tuonli ke n gobidi leni i moamoani . ²¹ Kelima tii lingi yaali ŋani O Diedo nintuali bebe ka , ama bi niba moko yaa nintuali . ²² Ti taani ki soani , bani leni ti kpiilo yua ke ti biigi yaama n kaa wa ki sua ke o pia li yankoali ke li go yaabidi ki pugini kelima o dugidi yi po n yaabi ki da maama . ²³ Yaali n tie Tita mo , o tie ti tuonsoanlielo leni ti cianka yi kani . ti kpiiba yaaba n sieni mo tie a jandiena n gandi ki soani yaaba yi kani Kilisiti kpiagidi po . ²⁴ Yin waanba yin buaba maama a jandiena yaaba kuli nintuali , ke bani bi yaaba n bandi ke ti sa moamoane leni tin jigini ti yula maama bi nintuali kelima yi po .