¹ Lan yaa po , n bua kaaba nani tin pia laa ñoanianu yeni , tin yaa ye mi candiŋanma nni ki fuagidi ti yula leni yaali n ba joagini ti gbanandi leni ti yantiana kuli . ki juodi ti gagidiŋanma Utienu fangili nni . ² Yin pa ti mani u kaanu yi pala nni kelima ti naa biidi o ba kuli po , tii kuli o ba , tii go dini o ba kuli bonla . ³ N maadi yeni laa tie ke n bua ki jaligi yi ka , ama nani min den kpa yedi yi maama , lan tie miali nni bi kuuma nni ; ⁴ N dugi yi po boncianla , n pia ti jigidi kelima yi po , ba o falaciamo siiga , ti gbie leni i baagi leni li pamancianli . ⁵ Moamoani , tin den pundi Maseduna ya yogunu tii ba fuodima baa waamu . ti den la fala buolu kuli . niini li moali , deeni mo i jeje . ⁶ Ama Utienu wani yua n bagidi ti , den baagi ti leni Tita cuama ti siiga . ⁷ Laa tie Tita cuama bebe ka , ama wani o yaa ba moko n den ba yaa baagi i kani . o den togidi ti yi yankuali , yi ninsiidi leni yi ŋaniali n po , hali li pamancianli den yabidi n niini . ⁸ Ba leni min den biidi yi pala kelima min den diani yi po yaa tili yeni po . mii yedi n yaabi ña mii diani yi ; ba yen laa Tili n biidi yi pala yogunu n ba waamu po yeni ; ⁹ Moala n pali mangi , ki laa tie kelima n biidi yi pala ka , li tie kelima laa pabiili cuani yi po mi lebidima . laa pabiili buolu dagidi Utienu po , lan wani tii biidi yi po li ba . ¹⁰ Kelima U tienu bua yaa pabiili buolu n baa cuani mi yanlebidima , yaa yanlebidimi n baa cuani mi tindima . lan wani ti kan yedi ti yaabi bani tii biidi yi pala . ama ŋanduna yaa pabiili wani yen cuani mi kuuma . ¹¹ Diidi mani ki le, laa pabiili yaali ke U tienu bua , n cuani yi po yaa tiginma yi niini . ki teni ke yi mia sugili , ke yi pala biidi li po ke ti jiwaandi cuo yi ; ke yi go sugini ki lee nni leni li yankuali , ke yua n tudi n ga o tagili panpaani ; li bonli kuli nni yi doagidi wani ke yii pia tagili ba kuli laa bonli yaa niini . ¹² Lan wani n den diani yi laa tili , laa tie yuan tieni yi tagili po ka , bi yua ke bi tudi o po ka , ama li tie ke n bua ki lee yi siiga yin pia yaa ŋaniali ti po U tienu nintuali . ¹³ Lan kuli den baagi ti , laa tie laa baagi bebe ka , ama ti pala go den mangi boncianla kelima ti den la Tita n pia ya pamanli kelima yi den duani o yama . ¹⁴ Baa leni min den pagi n yuli waamu kelima yi po Tita kani , mii la fee li yaa po , ama li doagidi ke min den pagi yi o kani maama yeni tie moamoani . ¹⁵ O yaa tiadi yi kuli n pia yaa tuoma , ke yi go den ga o cangu leni li fangili , leni mi digima ; o buama yi po yabidi ki pugini . ¹⁶ N pali mani kelima li bonli kuli nni , n baa fidi ki dugi yi po .