¹ Ay, bulos, da timotiyos, iri ya Almasihu yesu bannyayan no. Iri go ga hanantey da jine borey, da saajawkoy kan yan go Almasihu yesu ra fo, ngey kan yan go filibi kwaara. ² Gomni nda laakal kanay ma bara aran banda kan yan ga fun iri Baabo Irikoy da Rabbi Yesu Almasihu do. ³ Ay g'ay Irikoyo saabu waati kulu kan ay ga fongu aran gaa. ⁴ Alwaati kulu ay adduwey kulu ra ay goono ga gwaarayyan te aran kulu se da farha. ⁵ Ay go ga Irikoy saabu d'aran baaru hanna ra gaakasina, za zaari sintina hala ka kaa hunkuna. ⁶ Nga kan na goy hanno sintin aran ra, a ga toonandi hala Yesu Almasihu zaaro ra. Woone no ay ga tabbatandi. ⁷ A ga saba mo ay ma fongu nd'aran kulu ya-cine, zama aran go ay bina ra. Baa kan ay go hawante kaso ra, wala ay go ga baaru hanna faasa k'a tabbatandi mo, aran kulu ga margu ay banda Irikoy gomno ra. ⁸ Zama Irikoy no ga ti ay seeda mate kan ay go ga faaji aran kulu se da Almasihu Yesu bine bakarawo. ⁹ Han kan ay go ga gwaaray neeya: aran baakasina ma baa ka tonton bayray da fahamay kulu ra hal aran ma neesi ka di hayey kan ga bisa ikulu boriyan. ¹⁰ Woodin ma te hal aran ma bara cimikoyan kan sinda taali kulu, ka koy Almasihu zaaro gaa. ¹¹ Gaa no aran ga bara toonanteyan da adilitaray kan fun Almasihu Yesu do ka koy Irikoy darza d'a sifayano gaa. ¹² Ay ga ba aran ma bay, nya-izey, kan hayey kan du ay sabbay se no, baaru hanna say-say ka tonton. ¹³ Hala faada dogarey da cindey mo bay kan sikka si ay go kasu ra Almasihu sabbay se. Zama ay go kaso ra se mo no, borey baayano kulu du gaabi Rabbi ra. ¹⁴ I bine-gaabo goono ga tonton gumo mo ka Irikoy sanno ci humburkumay si. ¹⁵ Daahir afooyan goono ga Almasihu baaro waazu nda canse nda kusuuma. I goona g'a te fay-ka-ye-waani-waaniyan ra, manti nda bine hanno. ¹⁶ I goono ga miila ngey ma bine saray tonton ay se kan ay go hawante. ¹⁷ Amma afooyan goono ga Almasihu baaro waazu nda gomni miila. I goono g'a te nda baakasinay. I ga bay kan Irikoy n'ay dan ay ma ciya baaru hanna faasako. ¹⁸ Kulu nda yaadin, mate kulu kan no, da munaficitaray wala nda cimi no, i yaa day goono ga Almasihu baaro waazu. ¹⁹ Ay mo maa woodin kaani. Oho ay ga soobay ka maa a kaani mo. Zama ay ga bay kan aran adduwey do, da baakasinay ra kan Yesu Almasihu biya hanna g'ay no, woone kulu kan du ay ga bare k'ay kaa kambe. ²⁰ Zama hay kan ay ga baa gumo d'ay beeja ga ti woone: hay kulu ra ay ma si haaw. Day soho, sanda mate kan ay doona, ay ma to da bine-gaabi waati kulu, hal ay ma Almasihu beerandi ay gaahamo ra, d'ay ga bu wala ay ga funa. ²¹ zama ay wo se fundinga ti Almasihu, d'ay bu mo riiba no. ²² Amma d'ay ga funa gaahamo ra, ay goyo ga te albarka, ay si bay mo wo kan ay ga suuban. ²³ Ay laakalo fay ihinka, ay ga ba ay ma koy ka goro Almasihu banda, zama woodin ga bisa ay se gumo. ²⁴ Amma a ga bisa aran se d'ay ga goro gaahamo ra. ²⁵ Woodin bayray ga tabbat ay se: ay ga goro. Oho ay ga goro aran kulu banda hal aran ma du ka koy jina nda farha cimbeeri ra, hal aran farha ma baa Almasihu ²⁶ Yesu ra ay sabbay se waati kan ay ga kaa aran do koyne. ²⁷ Kala day aran na goray te kan ga saba nda Almasihu baaru hanna, hal ay ma maa aran gora baaro, baa d'ay kaa ka di aran, wala d'ay mana du ka kaa. Ay ma maa kan aran goono ga kay biya follon ra ka gurjay care banda laakal follon ra mo cimbeero se, baaru hanna wane. ²⁸ Aran ma si humburu baa kayna borey kan yan ga gaaba nd'aran. Woodin binde ga ciya i se halaciyan seeda. Amma aran wo, a ga ciya aran se faabayan seeda kan fun Irikoy do. ²⁹ Zama Irikoy n'aran no nga gomno ra, manti aran ma Almasihu cimandi hinne bo, amma aran ma maa taabi mo a sabbay se. Woodin gaa no aran goono ga wongo kan aran di ay te di dumo te. ³⁰ Wongo wo mo ay goono g'a te hal hon, sanda mate kan aran goono ga maa.