1 Don alwaatey ra Irikoy salan iri kaay-kaayey se annabey do. 2 A n'a te sorro boobo ra nda fondo waani-waani mo. Amma sohon, jirbi banantey wo ra, a salan iri se nga Izo ra. Nga no Irikoy dan hay kulu tubuko, a do mo no a na zamaney te. 3 Nga no ga ti Irikoy darza kaaro, d'a alhaalo mo. A goono ga hay kulu yaari da nga sanno dabaro. Waato kan a na zunubey hanandiyano te mo, a goro beena ra, Beeray-Beeri-Koyo kambe gwaaro gaa. 4 Zama a ciya boro kan bisa malaykey beeray mate kan a na maa tubu kan bisa i waney. 5 Zama malayka woofo se no Irikoy salan ce fo ka ne: «Ni ya ay izo no. Hunkuna no ay na ni hay.»? Wala woofo se no a ne: «Ay ga ciya a se baaba, nga mo ga ciya ay se ize.»? 6 Woodin banda, waato kan a kande nga hay-jina ndunnya ra a ne: «Irikoy malaykey kulu mo ma sududu a se.» 7 Malaykey bon a ne: «A ga nga malaykey te haw faaruyan. A ga nga goy-teerey mo te danja beele.» 8 Amma nga Izo bon a ne: «Ya Irikoy, ni koytaray karga ya hal abada abadin wane no. Ni koytaray sarjilla ya sarjilla kayante no. 9 Ni ba adilitaray, ni konna mo ilaalo. Woodin se no Irikoy, kan ti ni Irikoyo, na ni suuban ka farhan jiyo soogu ni bon ka bisa ni hangasinay.» 10 A ne mo: «Ya nin Rabbi, za sintina ni na ganda sinji, beeney mo ni kambe goyo no. 11 I ga halaci, amma ni wo, ni go no duumi. I kulu ga zeen mo danga kwaay cine. 12 Ni g'i kunkuni danga alkuba cine, Ni g'i barmay mo danga bankaaray cine. Amma nin wo, ni si bare, ni jirbey mo sinda me.» 13 Amma malayka woofo se no a ci ce fo ka ne: «Ma goro ay kambe gwaaro gaa, hal ay ma ni ibarey te ni ce taamey se furkange?» 14 Mante malaykey kulu biyayan no, goy-teeriyan no, kan Irikoy ga donton zama i ma saajaw goy te borey kan yan ga faaba tubu se?