¹ Ay bulos, ay ya Almasihu Yesu diya no Irikoy miila do. ² in da timotiyos, iri nya-izo, iri go ga hanantey da nya-ize naanaykoyey fo kan yan go kolosi kwaara Almasihu ra. ³ Gomni nda laakal kanay ma bara aran banda kan yan ga fun iri Baabo Irikoy do. Iri goono g'iri Rabbi Yesu Almasihu Irikoyo kan ti a baabo saabu,ka adduwa te aran se waati kulu. ⁴ Iri goono ga saabu zama iri maa aran cimbeero baaru Almasihu Yesu ra, d'aran baakasina baaro mo kan aran gonda hananyey kulu se. ⁵ Aran cimbeero d'aran baakasina fun beeja do kan go jisante beena ra aran se. Arah jin ka maa beeja din baaru cimi sanno kan go baaru hanna ra kan kaa aran do. ⁶ Ndunnya kulu ra a goono ga albaka no, a goono ga tonton mo, mate kan cine a goono ga te aran ra, za hano kan hane aran maa ka faham ka boori mo da Irikoy gomno cimo ra. ⁷ Aran na woodin dondon iri baakoy abafaras do, kan ga ti iri tamtaray hangasino. ⁸ Nga ga ti Almasihu saajawko naanaykoy aran sabbay se. A binde n'aran biya ra baakasina baaru dede iri se. ⁹ Woodin sabbay se no iri mo, za hano kan hane iri maa woodin, iri mana fay da adduwa nda gwaaray teeyan aran sabbay se. Iri go ga gwaaray aran ma to da Irikoy miila bayyan, laakal da fahamay ra kan biya hanno ga no. ¹⁰ Iri go ga gwaaray aran ma diraw te kan ga saba nda Rabbi beerandiyano hal a ma maa aran kaani gumo, goy hanney kulu ra mo aran ma albarka no, aran ma tonton mo Irikoy bayray ra. ¹¹ Iri ga gwaaray aran ma ciya dabarikooniyan kan gonda dabari kulu kan aran du a hin darzanta do, hal aran ma hin hay kulu ka suuru nda farhan. ¹² Aran ma baaba saabu kan n'iri to iri ma du baa hanantey tubo gaa kan go annura ra. ¹³ A n'iri faaba kubay dabaro gaa k'iri dan nga Izo kan nga ga ba din koytara ra. ¹⁴ A Izo ra mo no iri du fansayan, iri zunubey yaafayano nooya. ¹⁵ Boro si du ka di Irikoy, amma Almasihu ya Irikoy follonka no kan bangay iri se. ¹⁶ Nga no go no za takahari kulu nana taka. Zama nga no ka hay kulu taka, beene ra waney da ganda ra waney, han kan boro ga di da wo kan boro si di, hala kargey do wala koytarayey wala koyey wala hinkoyey. Nga no na hay kulu taka, a sabbay se mo no i go no. ¹⁷ Nga no go no za hay kulu mana te. Nga no goono ga hay kulu haw care gaa. ¹⁸ Nga no ga ti bono gaahamo se, kan ga ti a marga. Nga no ga ti sintina nda boro jina kan tun ka fun buukoy game ra, zama hay kulu ra a ma ciya ibeero zama a kaan baabo se no nga toonandiyana kulu ma goro Almasihu ra. ¹⁹ A kaan a se mo nga ma hay kulu sasabandi nga do, ²⁰ hal hayey kan go ganda wala hayey kan go beena ra Almasihu do. Kuro kan Almasihu dooru nga kanjiyan bundo bon no ka laakal kana wo dan boro nda Irikoy game ra. ²¹ Waato aran ya mebarawyan no Irikoy se, aran ya a ibareyan mo no aran laakaley d'aran goy laaley ra. ²² Kulu nda yaadin sohon Almasihu n'aran sasabandi nga gaahamo ra nga buuyano do, hal nga m,'aran salle hananteyan kan sinda taali nda foyray mo nga jine. ²³ Woodin ga te da day aran goono ga koy jina cimbeeri ra, sinjanteyan da kayyanteyan kan mana banda bare baaru hanna beeja gaa. Baaru hanno wo ga ti wo kan aran maa, kan i waazu takahari kulu se kan yan go beena cire. Ay, bulos, Irikoy n'ay ciya baaru hanna saajawko. ²⁴ Sohon day, ay goono ga farhan ay gurzuga kulu ra aran sabbay se. Ay goono ga toonandi ay gaahamo ra han kan gaze Almasihu kankamey ra a gaahamo sabbay se, danga Almasihu marga nooya. ²⁵ A se no ay ciya saajawko, mate kan Irikoy n'ay dan goyo wo ra aran sabbay se, zama zy ma Irikoy sanno toonanta waazu. ²⁶ Sanno toonanta din ya gundu no kan go tugante za don alwaatey da zamaney se, amma sohon Irikoy n'a bangandi nga hanantey se. ²⁷ I se no Irikloy ba nga ma gundo wo darza arzakanta bangandi dumi cindey game ra. Gundo neeya: Almasihu go aran ra, nga kan ga ti beeje darzanta. ²⁸ Iri goono ga Almasihu baaro waazu, iri goono ga boro kulu yaamar. Iri goono ga boro kulu dondonandi laakal kulu ra, hal iri ma boro kulu salle toonante Almasihu ra. Miila woodin se no ay goono ga goy. ²⁹ Ay goono ga kookari a dabaro bon kan go ga goy ay ra da gaabi.