¹ Sawulu wo yadda da Isitifanos wiyaŋo.Zaaro din ra gurzugay bambata tu Almasihu marga gaa kaŋ go urusalima. Borey kulu mo kar ka say-say yahudiya da samariya laabey ra nangu kulu. Kala diyey hinne no cindi. ² Ganakoy mo na Isitifanos fiji baray bambata te a se . ³ Amma sawulu goono ga Almasihu marga halaci. A goono ga furo fu ka kaa fu ka alborey da wayborey candi k'i daŋ kasu. ⁴ Borey kaŋ yaŋ say-say din mo koy nangu kulu ka sanno waazu. ⁵ Filibos mo koy samaria laabu gallu fo ra ka Almasihu waazo te i se. ⁶ Jama mo na filibos sanno kaŋ a ci ngey se din hangan nda bina folloŋ, waato kaŋ i maa, i di mo alaamey kaŋ a goono ga te. ⁷ Zama i ra boro boobo kaŋ gonda folloyyaŋ, i folloyey goono ga fatta. I goono ga kaati nda jinde beeri. ⁸ Yeenikooni nda laruko boobo mo du baani. Gallo din ra mo borey goono ga farha gumo. ⁹ Boro fo goono mo kaŋ maa siman, kaŋ doŋ moodabal-teeko no gallo ra. A ga samariya laabo borey dambarandi, ka nga boŋ sambu sanda boro beeri. ¹⁰ Borey kulu goono ga hangan a se, za ikaynayey ka koy hal ibeerey gaa. I goono ga ne: boro wo ga ti Irikoy gaabo kaŋ se i ga ne beeraykoy. ¹¹ I goono ga hangan a se mo, zama za gayyaŋ no a goono g'i dambarandi nda nga moodabalo. ¹² Amma waato kaŋ i cimandi waazo kaŋ filibos goono ga te Irikoy koytara da Yesu Almasihu maa boŋ, i te i se baptisma, alborey da wayborey. ¹³ Siman bumbo mo cimandi. Waato kaŋ i te a se baptisma, a lamba filibos gaa. A goono ga dambara gumo waato kaŋ a di alaamey da dabari goy bambatey kaŋ yaŋ goono ga te. ¹⁴ Waato kaŋ diyey kaŋ yaŋ go urusalima maa baaro kaŋ samariya borey na sanno ta mo, i na bitros da yohanna donton i do. ¹⁵ Waato kaŋ i to noodin, i na adduwa te borey din se, zama i ma du biya hanna. ¹⁶ Zama a mana zumbo i ra boro kulu boŋ jina, kala day i te i se baptisma hinne Rabbi Yesu maa ra. ¹⁷ Gaa no bitrosyaŋ na ngey kambey dake i boŋ, biya hanno mo zumbu i boŋ. ¹⁸ Waato kaŋ siman di diyey kambey dakeyaŋ gaa no Irikoy na biya hanno no, a na nooru salle diyey se. ¹⁹ A ne:way mo no dabaro wo, zama boro kulu kaŋ boŋ ay ga kambey dake ma du biya hanno. ²⁰ Amma bitros ne a se: ni nooro ma halaci ni banda zama ni ho hala ni ga du Irikoy nooyaŋo da nooru. ²¹ Ni sinda baa wala fondo kulu muraado wo ra, zama ni bina siino ga saba Irikoy jine. ²² Woodin se ma tuubi ka fun ni izelaalotara di ra ka ŋwaaray Rabbi gaa, hal hambara a ma ni yaafa nda ni bina miilayaŋo wo. ²³ Zama ay di kaŋ ni goono ga to da forti, ni go mo izelaalotaray kumsa ra. ²⁶ Amma Irikoy malayka salaŋ filibos se ka ne: tun ka koy dande kambe haray, fonda boŋ kaŋ ga fun urusalima ka koy gaza kaŋ ga gana ganjo ra. ²⁷ A tun ka koy mo, guna, boro fo go ga kaa kaŋ ethiyopi boro no, mantaw fo no kaŋ gonda dabari boobo kandata cire, kaŋ ga ti etiyopi wayboro bonkoono. A arzaka kulu go mantwo din kamba ra. Mantawo koy urusalima zama nga ma sududu noodin. ²⁸ Waato kaŋ a goono ga koy fu, a go ga goro nga torko ra ka annabi isaya tira caw. ²⁹ Biya hanno mo ne filibos se ma maan ka to torka din gaa. ³⁰ Filibos mo zuru ka koy a do. kal a maa bora goono ga annabi isaya tira caw a ne:ni goono ga faham da haŋ kaŋ no ni goono ga caw? ³¹ Cawka ne:mate n'ay ga te ka faham, da manti ay du boro fo kaŋ ga cab'ay se?A na filibos ŋwaaray a ma kaaru ka goro nga jarga. ³² Nango kaŋ a goono ga caw Irikoy tira hanna ra neeya: i na candi sanda feeji nya kaŋ i goono ga koy wi, sanda feeji'ze kaŋ go ga dangay mo nga hamni hoseko jine, yaadin cine no a mana nga meyo fiti. ³³ A kaynandiyaŋo ra i n'a cimi ciito ta a gaa. May no g'a banda baaro dede? Zama i n'a fundo kaa ndunnya ra. ³⁴ Mantawo mo tu filibos se ja ne: «ga ni ŋwaaray, ma ci ay se: annabo wo may sanni no a goono ga te? Nga bumbo no, wala boro fo gaa no a go?» ³⁵ Filibos mo na nga meyo fiti ka sintin Irikoy tira hanna sanno wo gaa ka Yesu waazo te a se. ³⁶ I dirawo gaa ,kal i to hari fo do. Mantawo ne: guna hari neeya. Ifo no g'ay ganji ni ma te ay se baptisma? Filibos ne: «da ni ga cimandi da ni bina kulu, a ga hin ka te.» ³⁷ A tu ka ne: «ay ga cimandi kaŋ Yesu Almasihu ya Irikoy Izo no.» ³⁸ A lordi ka ne i ma torka kayandi. I boro hinka zumbu ka furo haro ra, nga, filibos da mantawo. A te a se baptisma. ³⁹ Waato kaŋ i fun haro ra, Rabbi biya na filibos hamay ka kond'a. Mantawo mana ye ka di a, amma a na nga dirawo te da farha. ⁴⁰ Amma i di filibos azatos ra. Kaŋ a goono ga bisa noodin, a na baaru hanna waazu kwaarey kulu ra kal a kaa kaysariya kwaara.