¹ Amma alwaatey da zamaney cine ra, ay nya-izey, ² aran si laami iri ma hay kulu hantum aran se i baaro bon. Zama aran bumbey ga bay gumo kan Rabbi zaaro ga kaa danga cin ra zay cine. ³ Waati kan i goono ga ne:«baani nda laakal kanay!» kala halaciyan ma kaa, fap follon! Ka kan i bon mate kan cine hay-zanay ga kaa waykuna gaa. Faaba si no i se mo ba kayna. ⁴ Amma aran wo nya-izey, manti kubay ra no aran go, hala zaaro din m'aran jirsi danga zay cine. ⁵ Zama aran kulu annura izeyan no da kaari izeyan mo. ⁶ Iri manti cin wala kubay wane yan. Yaadin gaa iri ma si jirbi danga boro cindey cine, amma iri m'iri mo hay k'iri bon di. ⁷ Zama borey kan goono ga jirbi, cin ra no i ga jirbi. Borey kan goono ga baji han ka bugu mo, cin ra no i ga bugu. ⁸ Amma iri kan manti cin wane yan, iri ma hin iri bon ka cimbeeri nda baakasinay dan i ma ciya iri se gande gaa kosoray, ka faaba beeja mo dan a ma ciya iri se wongu fuula. ⁹ Zama Irikoy mana iri waadu nga bine futa se, amma faaba duuri se iri Rabbi Yesu Almasihu do. ¹⁰ Nga no ka bu iri sabbay se hal d'iri goono ga mo hay wala d'iri goono ga kani no, iri ma funa nga banda. ¹¹ Woodin sabbay se aran ma care bine gaabandi, wa care gaa jina-koyan ra mo, mate kan cine aran goono ga te. ¹² Sohon iri g'aran gwaaray, nya-izey, aran ma bara nda lalabu borey kan yan goono ga goy aran game se, kan yan goono g'aran candi, kan yan goono g'aran kaseeti mo. ¹³ Aran m'i beerandi gumo baakasinay ra i goyey sabbay se. Lakal kanay ma bara aran game ra. Iri mo g'aran yaamar, nya-izey, aran ma kaseeti borey kan yan goono ga hawfunay goray te gaa. ¹⁴ Aran ma bine kulu kan ga humburu gaabandi. Wa londibuuney gaa. Wa suuru nda boro kulu. ¹⁵ Wa haggoy boro kulu ma si ye ka laala bana nda laala. Amma waati kulu wa ceeci han kan ga ti ihanno care se da boro kulu se mo. ¹⁶ Aran ma farhan alwaari kulu. ¹⁷ Aran ma adduwa te waati kulu. ¹⁸ Hay kulu ra aran ma saabu, zama woodin ga ti Irikoy miiila aran se Almasihu Yesu ra. ¹⁹ Aran ma si biya hanna ganji nga goyo. ²⁰ Aran ma si donda annabitaray. ²¹ Aran ma hay kulu neesi ka ihanno gaay. ²² Aran ma fay da goy laalo kulu dumi. ²³ Irikoy bumbo kan ga laakal kanay no, m'aran hananyano kubandi. Irikoy m'aran boro fo kulu, biya da fun do da gaahamo kulu, gaay kan sinda jance, iri Rabbi Yesu Almasihu kaayano alwaato ra. ²⁴ Irikoy ga woodin te mo, zama nga kan g'arance ya naanaykoy no. ²⁵ Nya-izey wa adduwa te iri se. ²⁶ Wa nya-izey kulu fo da baakasinay garbe sunsumyan hanna. ²⁷ Ay g'aran gwaaray Rabbi maa ra aran ma tira wo caw nya-izey kulu se. ²⁸ Iri Rabbi Yesu Almasihu gomno ma bara aran banda.