Sura 1

1 Ay, bitros, ay ya Yesu Almasihu diya no. Ay go ga tiro wo hantum suubanantey kan go say-sayanteyan se, kan yan ciya yawyan bantos, da galatiya, da kabadosiya, da asiya, da bitiniya laabey ra. 2 Baaba Irikoy n'aran suuban nga waado bon, biya hanno fay waaniyan Irikoy se do. A n'aran suuban hal aran ma Yesu Almasihu gana ka hanan mo a kuro say-sayyano do. Gomni nda laakal kanay ma tonton aran gaa. 3 Iri ma saabu iri Rabbi Yesu Almasihu Irikoyo se, a baabo mo no. A suuji beero ra no a n'iri hay hayyan taji a do hal iri ma du beeje fundikoono Yesu Almasihu tun ka fun buukoy game ra yano do. 4 Iri ma du tubuyan mo kan si halaci, kan si ziibi, kan si daray mo. 5 Irikoy n'a jisi beena ra aran se, aran kan Irikoy dabaro goono ga hallasi aran cimbeero do faaba se kan a soola zama nga m'a bangandi alwati bananta ra. 6 Aran go ga farha gumo woodin sabbay se, baa d'a ga tilas sohon aran biney ma sara alwaati kayna taabi waani-waani ra. 7 Wura ga hallaci, baa kan i g'a soogu nda danji hal a ma hanan. Aran taabi waani-waaney mo g'aran cimbeeri, kan ga bisa wura darza, gosi hal a ma tabbat, hal aran cimbeero gosiyano bananta mo ma ciya sifayan da darza nda beeray hari Yesu Almasihu bangandiyano waate. 8 Aran ga ba Yesu, baa kan aran mana di a. Aran goono g'a cimandi mo, baa kan aran siino ga di a sohon. Aran goono ga farha gumo nda farha kan ga bisa ciyan, kan to da darza mo. 9 Zama aran goono ga du aran cimbeero timmandiyano kan ga ti aran fundey faaba. 10 Annabey kan na annabitaray te gomno bon kan Irikoy soola ka jisi aran se, i na ceeciyan te da anniya ka fintal mo faaba din ciine ra. 11 I goono ga ceeci ngey ma faham alwaati kan no da mate cine no a ga kaa d'a, kan Almasihu biya kan go i ra goono ga cabe, kan i jin ka Almasihu gurzugayey da darza kan ga kaa gurzugayey din banda seeda. 12 Irikoy bangandi annabey din se kan manti ngey bumbey se no i n'a te bo, amma aran se no i na hayey din seeda. Sohon baaru hanna waazukoy n'aran kabarandi nd'ey, biya hanno do kan Irikoy donton a ma fun beena ra. hayey din binde, malaykey ga ba ngey ma faham d'ey gumo. 13 Woodin sabbay se, sanda mate kan boro ga nga bankaaray guddu goy se, w'aran laakaley soola yaadin cine. Wa hin aran bon, w'aran beeja kulu dan gomno bon kan Irikoy ga kande aran se Yesu Almasihu bangandiyano waate. 14 Danga izeyan kan ga baaba gana, wa s'aran bon sasabandi d'aran bon ibaay laaley kan aran gana, alwaato kan aran go jan-ka-bayyan ra. 15 Amma mate kan cine nga kan n'aran ce ya hananyankoy no, yaadin cine no aran bumbey mo ma bara ihannoyan aran gora kulu ra. 16 Zama i n'a hantum ka ne: «Aran ma ciya ihannoyan, zama ay ya hananyankoy no.» 17 Aran goono ga Irikoy ce «Baaba», nga kan ga ciiti manti nda baar'a-baar'a, amma boro kulu goyo bon. Woodin se, w'aran yawtaray gora te da Irikoy humburkumay. 18 Zama aran ga bay kan Irikoy mana aran fansa aran goray yaama gaa kan aran tubu aran kaayey do da hayey kan kan ga halaci, danga nzarfu wala wura. 19 Amma Irikoy n'aran fansa nda Almasihu kuro kan gonda darza, sanda feez'ize kan sinda dollo wala leebu wane kuri. 20 Irikoy navAlmasihu sujban za a mana ndunnya sinji, amma a n'a bangandi aran sabbay se alwaati banantey ra. 21 A do no aran goono ga Irikoy cimandi, nga kan n'a tunandi ka kaa buukoy game ra k'a no beeray mo, zama aran cimbeero d'aran beeja ma bara Irikoy ra. 22 Za kan aran n'aran fundey hanandi aran cimi ganayano ra, hal aran gonda baakasinay kan sinda munaficitaray nya-izey se, aran ma ba care gumo d'aran bine kulu. 23 Zama i n'aran hay hayyan taji, manti nda dumari'ze kan ga sara, amma da wo kan si sara, Irikoy sanno do nooya, kan goono ga funa ka goro hal abada. 24 Zama i ne: «Adam-ize kulu go sanda subu cine, a darza kulu mo sanda subu boosi cine. Subu ga koogu, booso mo ga kan, 25 Amma Rabbi sanno ga duumi hal abada.» Woodin mo no ga ti baaru hanna kan i waazu aran se.